VOV4.Êđê- Mlam anei hrue (26/3) ti Hội An, čar Quảng Nam, phŭn bruă dhar kreh, mjuăt asei lehanăn hiu čhưn ênguê lehanăn knơ̆ng bruă sang čư̆ êa čar Quảng Nam pŏk leh knăm Hiu čhưn ênguê ala čar – Quảng Nam thŭn 2022 hŏng akŏ “Anôk truh kơ klei hiu čhưn ênguê mtah”. Thŭn hiu čhưn ênguê ala čar jing bruă dhar kreh – duh mkra – yang ƀuôn kdlưn hĭn, prŏng ti gưl ala čar, lehanăn hŏng ala tač êngao kreh mkŏ mjing jêñ jêñ. Bruă thŭn anei lŏ bi hdơr kơ Hội An ênuk đưm. Klei mdah anăn bi mguôp ênai, klei mngač ênuk mrâo mbĭt hŏng êbeh 600 čô mdah mâo mjing hŏng lu knhuah gru dhar kreh jăk siam, hưn mthâo kơ klei jing bruă dhar kreh, lehanăn mnơ̆ng dhơ̆ng mâo kơ bruă hiu čhưn ênguê, kñăm ngă klei bi mguôp plah wah bruă hiu čhưn ênguê mơ̆ng dŭm alŭ wăl, čiăng mđĭ k’hưm, klei jăk siam kơ lăn čar, anak mnuih Việt Nam, lehanăn čar Quảng Nam, kñăm tal êlâo jing čiăng kơrŭ wĭt bruă hiu čhưn ênguê, kyua hmăi leh amâo mâo jăk prŏng êdi mơ̆ng klei ruă tưp Covid 19./.

         Pô mblang: Y-Khem Niê