VOV4.Êđê- Tlam 30/5, Êpul mă bruă mrô 8 mơ̆ng Anôk bruă gĭt gai gưl dlông kơ hdră gang mkhư̆ klei ƀơ̆ng ngăn (Anôk bruă gĭt gai) mâo Lê Minh Trí, Khua hlăm bruă Đảng gưl dlông, Khua Sang phat kđi yang ƀuôn gưl dlông, Khua Anôk bruă gĭt gai ngă khua êpul mâo leh mmông mă bruă hŏng bruă Đảng kahan ksiêm gưl dlông čiăng pŏk ngă Hdră kčah mrô 18 mơ̆ng Anôk bruă gĭt gai.

 Blŭ hrăm ti anôk mă bruă, Lê Minh Trí brei thâo, hdră kñăm mơ̆ng klei ksiêm dlăng tal anei jing čiăng lač kơ klei tŭ dưi mâo, dŭm klei êdu kƀah, mta phŭn hlăm bruă gĭt gai leh anăn mkŏ mjing hlue ngă. Mơ̆ng anăn, thâo ƀuh, akâo msir mgaih dŭm klei mta mâo klei bi knăl ngă soh kơ bruă ƀơ̆ng ngăn, bruă duh mkra ƀiădah amâo dưi msir mgaih amâodah msir mgaih hlue si klei kčah mtrŭn mơ̆ng Đảng leh anăn Hdră bhiăn knŭk kna, msir mgaih amâodah akâo đŭ bi kmhal bi djŏ klei ngă soh hdră bhiăn, hngah kơ klei bi mklă amâo mâo tur knơ̆ng, kčĕ bruă klam, hdră msir čiăng mđĭ klei tŭ dưn hŏng bruă thâo ƀuh, ba jao, tŭ mă, msir mgaih klei hâo hưn kơ phung ngă soh leh anăn bruă bi mklă./.

                                               Pô mblang: H’Zawut Ƀuôn Yă