VOV4.Êđê- Ti anôk bruă knŭk kna, K’iăng khua knŭk kna Vũ Đức Đam gĭt gai leh Klei bi kƀĭn kluôm ala kơ bruă pŏk ƀăng sang hră ti dŭm alŭ wăl. Klah čŭn ti anôk bi kƀĭn, K’iăng khua knŭk kna mñă: Klei hriăm hră mŏng phung hđeh jing yuôm êdi, amâo djŏ hlăm wưng dôk mâo klei ruă ară anei ôh ƀiădah wăt hlăm wưng amâo mâo klei ruă. Phung hđeh dôk ti sang sui huĭ srăng mâo dŭm klei amâo jăk, amâo djŏ hlăm klei thâo săng, ƀiădah lŏ hmăi truh kơ klei đĭ prŏng mơ̆ng phung hđeh. Bi mklă hdră gang mkhư̆ klei ruă Covid 19 jing sui, K’iăng khua knŭk kna Vũ Đức Đam mñă leh ai tiê lŏ krŭ wĭt dŭm hdră mđĭ kyar bruă duh mkra – ala ƀuôn hlăm klei găl mrâo hŏng hdră  hdĭp êđăp ênang, ksiêm dlăng tŭ dưn klei ruă tưp. K’iăng khua knŭk kna mtă bruă mđing tal êlâo jing hdră tlŏ vaccine Covid 19 kơ hđeh mơ̆ng 5 truh 11 thŭn. Mbĭt anăn, boh sĭt brei hđeh nao sang hră snăn mđrĭng hŏng ênoh hđeh tưp djŏ klei ruă srăng đĭ, yuôm bhăn hĭn jing ksiêm dlăng hnơ̆ng tưp lar, mâo hdră msir mghaih F0, F1 djŏ guôp./.

                                                   Pô mblang: H’Nêč Êñuôl