Čar Dak Lak mâo êbeh 2,4 êklăk čô hŏng 2.120 anôk mplĕ hră. Hluê si Đại tá Lê Hữu Tuấn, Kơiăng khua anôk bruă kahan ksiêm čar Dak Lak, tĭng truh ară anei, hdră rơ̆ng klei êđăp ênang kơ klei ruah khua ti alŭ wăl čar dưi pŏk ngă kjăp lehanăn mđrăm mbĭt. Êpul kahan ksiêm bi hgŭm hŏng Anôk bruă ruah khua dŭm gưl hluê ngă hdră mrô, mkăp kơ bruă kđăm lehanăn mbha hră mplĕ djŏ hdră bhiăn.

Mbĭt anăn, jih 102 să, ƀuôn hgŭm ti čar mâo ksiêm dlăng, kah mbha krĭng mplĕ hră hluê tlâo gưl čiăng rơ̆ng kjăp hdră răng mgang. Đại tá Lê Hữu Tuấn brei thâo:

“Êpul kahan ksiêm mkŏ mjing 10 êpul ngă bruă hŏng êbeh 300 čô knuă druh, lĭng kahan nao kơ 102 să, ƀuôn hgŭm thâo klă klei mâo lehanăn pŏk hdră rơ̆ng kjăp klei êđăp ênang, mguôp hŏng klei đua klam hlăm hdră ruah khua. Mbĭt anăn hmei mtrŭt mđĭ hdră ksiêm dlăng phung ngă soh êlâo, hlăm lehanăn êdei kơ gưl ruah phung bi ala bruă kƀĭn ala lehanăn Êpul gơ̆ng bruă ƀuôn sang dŭm gưl”.