Knơ̆ng bruă bi êran pui kmlă hŏng ai êa Ialy kriê dlăng bi êran 3 sang măi bi êran pui kmlă prŏng hĭn mơ̆ng knơ̆ng kdơ̆ng êa bi êran pui kmă krông Sê San mâo: Sang măi bi êran pui kmlă hŏng ai êa Ialy, Sang măi bi êran pui kmlă hŏng ai êa Sê San 3 leh anăn Sang măi bi êran pui kmlă hŏng ai êa Plei Krông, ti alŭ wăl čar Gia Lai leh anăn Kon Tum. Kluôm hnơ̆ng pui kmlă mơ̆ng 3 sang mă anei jing 1.080 MW, kluôm hnơ̆ng tĭng mkă hruê 30/6/2023 mơ̆ng 3 sang măi anei dưi bi êran leh êbeh 102 êklai 246 êklăk kWh. Ƀiădah hlăm 6 mlan akŏ thŭn 2023, kluôm knơ̆ng bruă dưi bi êran 1 êklai 955 êklăk kWh pui kmlă, mâo 41,68% hdră kčah, bi hrŏ 330 êklăk kWh mkă hŏng wưng anei thŭn 2022.

            Jing sang măi bi êran pui kmlă prŏng hĭn ti krông Sê San, knơ̆ng bruă pui kmlă Ialy dưi hluê ngă bruă klam mơ̆ng sang măi lu mta kñăm: bi êran pui kmlă, bi kna hnơ̆ng êa, bi hrŏ klei êa lêč hlăm yan hjan hlĭm, mkăp êa kơ krĭng nah tluôn ti yan bhang. Mbĭt anăn, đru kơ klei krih êa kơ ana pla mjing ăt msĕ hŏng ba yua tŭ dưn êa jua kơ bruă bi êran pui kmlă. Đinh Viết Thiện, k’iăng khua kiă kriê knơ̆ng bruă pui kmlă Ialy brei thâo:

“Yan bhang thŭn anei yan adiê amâo mâo jăk, ti dŭm mlan knhal jih yan hjan êa đoh hlăm ênao hrŏ. Ti mlan 3 leh anăn mlan 4 êa đoh hlăm êa jing ƀiă êdi, hrŏ truh kơ 90%. Kyuanăn mâo wưng êa hlăm êao hrŏ, čiăng rơ̆ng kơ hnơ̆ng êa jing klei mgô̆, ăt msĕ hŏng hnơ̆ng êa đoh kơ tluôn srăng djŏ klei čuăn. Bi knơ̆ng bruă mâo leh klei hưn hŏng dŭm anôk bruă kriê dlăng êa jua, dŭm anôk bruă kơ dlông jing êpul grŭp ăt msĕ hŏng bruă sang čư êa čar Gia Lai leh anăn Kon Tum bi êdah si srăng ngă ba yua bi kna êa jua, rơ̆ng kơ mta kñăm jing mkăp brei êa jua kơ mnuih ƀuôn sang leh anăn krih kơ ana pla mjing. Truh ti hruê 30/6, bruă rơ̆ng kơ hnơ̆ng êa đoh ti nah tluôn dưi mâo klei bi hơĭt.”

Hồ Trung Đông, Khua hlăm êpul bruă Đảng, khua kiă kriê knơ̆ng bruă bi êran pui kmlă Sê San brei thâo: Yan bhang thŭn anei, hnơ̆ng êa đoh kơ ênoh hrŏ lu mkă hŏng hnơ̆ng kah knar lu thŭn, hrŏ truh 15% mkă hŏng thŭn 2022. Hlăm bruă bi êran sang măi ară anei bi mâo ênŭm jih jang hnơ̆ng čuăn mơ̆ng ala čar. Klei mdê hĭn ti knơ̆ng bruă pui kmlă Sê San jing mâo ênao bi kna ti tluôn tua ƀin bi êran pui kmlă. Kyuanăn bruă bi kna êa kơ nah tluôn dưi čŏng pô leh anăn hmăi ƀiă kơ bruă bi êran pui kmlă. Hồ Trung Đông brei thâo:

“Hlăm bruă mlih ênao kdơ̆ng êa mrô 215 mơ̆ng Khua knŭk kna thŭn 2018, mâo klei čuăn hŏng hmei kơ yan bhang hmei srăng bi mâo ƀiă êdi 195 m3 hlăm sa secon kơ krĭng nah tluôn. Hlăm klei bi êran hmei ăt mâo đa đa ênao bi kna čiăng mghaih msir kơ bruă tơdah hmei bi êran lu srăng bi mbŏ êa hlăm anăn, êjai mmông hmei amâo mâo bi êran srăng pŏk êa mơ̆ng ênao bi kan Sê San 4. Hlăm wưng êgao hmei ăt bi mâo djăp êa rơ̆ng kơ krĭng nah tluôn kơ krông Mê Kông. Mbĭt anăn, hlăm dŭm wưng dleh dlan hĭn, êjai mâo mâo djăp êa bi êran pui kmlă, hmei čŏng hưn hŏng Dhar bruă krông Mê Kông, čŏng hưn mdah hŏng Anôk bruă ngăn dŏ leh anăn wăl êa čiăng kơ dŭm tĭng bi mguôp hlăm bruă gĭt gai.”

Knơ̆ng bruă bi êran pui kmlă Ƀuôn Kuô̆p kriê dlăng 3 sang măi bi êran pui kmlă hŏng ai êa krông Sêrêpôk plah wah 2 čar Dak Lak leh anăn Dak Nông jing: Sang măi bi êran pui kmlă hŏng ai êa Buôn Tuôr Srah, Sang măi bi êran pui kmlă hŏng ai êa Ƀuôn Kuô̆p leh anăn Sang măi bi êran pui kmlă hŏng ai êa Srêpôk 3. Kluôm hnơ̆ng bi êran pui kmlă mơ̆ng 3 sang măi anei jing 580 MW. Nguyễn Đức, k’iăng khua kiă kriê knơ̆ng bruă pui kmlă êran hŏng ai êa Ƀuôn Kuô̆p brei thâo, 6 mlan êgao, hnơ̆ng bi êran pui kmlă mơ̆ng 3 sang măi anei jing 915 êklăk kWh, knŏng knar mă 79% mkă hŏng wưng anei thŭn 2022. Hnơ̆ng pui kmlă hroh kyua kƀah êa mơ̆ng knhal jih yan hjan, leh anăn kƀah kjham hĭn ti mlan 3 leh anăn mlan 4 mrâo êgao. Ƀiădah čiăng dưi bi êran hluê si hdră kčah mlir ênao mơ̆ng Knơ̆ng bi êran pui kmlă hŏng ai êa Ƀuôn Kuôp ăt dưi hluê ngă djŏ.

“Knơ̆ng bruă čŏng bi mguôp hŏng anôk bruă bi kna hnơ̆ng pui kmlă ala čar čiăng bi kna êa rơ̆ng kơ klei hdĭp, klei ngă bruă krĭng nah tluôn. Truh ti mlan 5 êa hrŏ lu hŏng ênao akŏ êa Ƀuôn Tuôr Srah, knơ̆ng bruă hưn leh boh klei anei kơ bruă sang čư êa čar čiăng mâo klei mtô ngă bruă mkra mjing leh anăn ba yua djŏ guôp. Hlăm mlan 5 bruă sang čư êa čar jao leh kơ knơ̆ng bruă tuh tia gĭt gai mmông mă bruă hŏng knơ̆ng bruă. Hluê anăn ti krah mlan 5, mâo leh hdră êlan pŏk êa kơ krĭng nah tluôn hlăm hnơ̆ng ƀiă hĭn, bi kdơ̆ng êa đru kơ bruă krĭn ana pla mjing kơ yan bhang. Truh ti knhal jih mlan 5, hnơ̆ng êa ti ênao Ƀuôn Tuôr Srah wĭt leh ti hnơ̆ng djŏ klei čuăn mơ̆ng hdră bi êran mlir ênao kdơ̆ng êa.