Adiê mrâo truh mmăt, dŭm pui mtrang yua pil yang hruê mơ̆ng hdră bruă kuč mngač êlan knông lăn ti să knông lăn Krông Ana, kdriêk Ƀuôn Đon, lŏ dơ̆ng mtrang mngač. Đại úy Y- Hán Hwing -  Khua êpul mtrŭt mjhar mnuih ƀuôn sang, Kđông kahan răng mgang knông lăn Sêrêpôk, Lĭng kahan răng mgang knông lăn Dak Lak, brei thâo, mâo pui kmlă mtrang mngač hiu suang dlăng, diñu ƀrư̆ kjăp ai tiê hlăk ngă bruă klam:

          "Mơ̆ng leh hdră bruă kuč mngač êlan knông lăn dưi mkŏ dăp hlăm êlan hiu suang dlăng ti knông lăn snăn găl ênưih kơ phung knuă druh, lĭng kahan hlăm anôk bruă kơ klei hiu suang dlăng, rơ̆ng êđăp ênang. Tal dua, đru hmao thâo ƀuh phung mâo klei bi knăl bi rai êlan knông lăn, mơ̆ng anăn găl ênưih hlăm hdră kriê dlăng, răng mgang knông lăn mơ̆ng anôk bruă”.

 Hdră kuč mngač êlan knông lăn mơ̆ng Kđông kahan răng mgang knông lăn Sêrêpôk kriê dlăng mâo boh dlông hlăm brô 3km, mâo 20 kdrăp pui kmlă mtrang êran hŏng pil yang hruê, mkŏ dăp ti krĭng gơ̆ng knông lăn mrô 45(2), đa đa gơ̆ng kăp ksiêm dlăng mkăn leh anăn dŭm êlan hiu suang dlăng mơ̆ng kđông kahan răng mgang knông lăn. Hdră bruă mâo bruă êdam êra čar Dak Lak leh anăn dŭm anôk bruă đru hlue ngă hlăm mlan 3 anei, ƀri gưl bi hdơr 65 thŭn hruê knhuah gru lĭng kahan knông lăn.

Amai H’Giang Niê, Khua dlăng bruă Đảng êpul êdam êra brei thâo, kđông kahan răng mgang knông lăn Sêrêpôk jing anôk bruă tal 2 ti čar dưi pŏk ngă hdră bruă kuč mngač êlan knông lăn thŭn anei. Anei ăt jing sa hlăm 2 bruă phŭn phung mda asei Dak Lak pŏk ngă hlăm thŭn kñăm bi lông ktưn kkuh drông 120 thŭn mkŏ mjing čar Dak Lak.

"Thŭn anei snăn hmei gĭr mkŏ mjing 27 km mâo pui mtrang mngač êlan knông lăn. Hlăm wưng ară anei snăn hmei mtrŭt mjhar klei găl hlăm leh anăn êngao čar, hơ̆k mơak snăk kyua dưi hgŭm, mđing truh mơ̆ng phung êdam êra leh anăn klei hrăm mbĭt, kăp đru mơ̆ng dŭm anôk bruă duh mkra, dŭm čar mkăn čiăng hmei dưi ngă hdră mtrŭn. Anei jing hdră bruă čiăng hrăm mbĭt hŏng phung lĭng kahan krĭng knông lăn, grăp gơ̆ng pui srăng jing sa gơ̆ng bi mklă klei dưi ti knông lăn Việt Nam.”

Thượng tá Rơ Lan Ngân, K’iăng Khua bruă Đảng kahan răng mgang knông lăn Dak Lak lač: dŭm hdră bruă kuc mngač êlan knông lăn amâo djŏ knŏng bi êdah klei mđing dlăng mơ̆ng êpul êdam êra hŏng êpul kahan răng mgang knông lăn ôh, ƀiădah lŏ đru mtô bi hriăm knhuah gru krŭ kdơ̆ng, klei dưi răng mgang êđăp ênang knông lăn kơ phung êdam êra. Hŏng djăp hdră dưi tŭ mă dŭm anôk bruă srăng ksiêm dlăng nanao, mkra mđĭ ba yua tŭ dưn, sui.

"Hmei ktưn hưn mâo klei mđing dlăng mơ̆ng khua gĭt gai dŭm gưl. Hlăm anăn bruă êdam êra čar Dak leh anăn bruă êdam êra čar Bình Dương đru hmei pui mtrang mngač êlan knông lăn. Hmei srăng yua djŏ hdră kñăm leh anăn rơ̆ng êđăp ênang hlăm hdră pŏk ngă leh anăn đru hlue ngă tŭ dưn bruă klam kđi čar dŭm anôk bruă jao kơ kahan răng mgang knông lăn čar, ngă bruă klam hlăm wưng kơ anăp”.

Čar Dak Lak mâo hlăm brô 73km êlan knông lăn, bi knông hŏng čar Mondulkiri, ala mtao Campuchia. Hŏng hdră kuč mngač êlan knông lăn kyua phung mda asei Dak Lak hlue ngă hlăm thŭn anei, mĭn tĭng srăng mtrang mngač hlăm dŭm gơ̆ng knông lăn kyua Lĭng kahan răng mgang knông lăn Dak Lak kriê dlăng, răng mgang. Hŏng grăp gơ̆ng pui dưi, amâo djŏ knŏng mjing klei găl kơ phung knuă druh, lĭng kahan răng mgang knông lăn hlăm ktuê hiu suang dlăng răng mgang knông lăn ôh, ƀiădah lŏ mtrang mngač klei dưi hlăm djăp kdrêč lăn yuôm bhăn ti knông lăn čar kwar./.