Anei jing hnư mnơ̆ng bruă bruă Đảng čar, Bruă sang čư̆ êa leh anăn mnuih ƀuôn sang čar Quản Ninh mơĭt kơ 3 alŭ wăl tŭ klei hmăi kjham hlăm gưl hjan hlĭm êa lip mrâo êgao, grăp čar 5 êklai prăk. K’iăng khua Bruă Kbĭn ala Nguyễn Khắc Định nao hgŭm leh anăn bi myuôm bruă ngă jăk siam mơ̆ng Quảng Ninh, dlăng anei jing klei bi hmô kơ ai tiê bi mguôp, thâo khăp, thâo pap, đru kơ mnuih ƀuôn sang krĭng êa lip hnưm găn hgao klei dleh dlan.

K’iăng khua Bruă Kbĭn ala mñă kơ dŭm alŭ wăl lŏ dơ̆ng tiŏ nao êpul ngă bruă đru kơ mnuih ƀuôn sang bi hơĭt klei hdĭp, mbĭt anăn iêo mthưr dŭm anôk bruă, êpul bruă leh anăn grăp čô lŏ dơ̆ng hrăm mbĭt čiăng đru mgaih msir boh jhat, krŭ wĭt klei mă bruă knuă leh anăn rơ̆ng klei hdĭp kơ mnuih ƀuôn sang. Klei hrăm mbĭt anei hmăng hmưi dưi bi lar ktang ai tiê êpul êya hlăm bruă bi mdrơ̆ng leh anăn bi hrŏ klei truh yan adiê.