VOV4.Êđê- Đang dliê knŭk kna mkuôm Yok Đôn mâo ênhă êbeh 115 êbâo ha, ti dua čar Dak Lak - Dak Nông leh anăn bi knông hŏng čar Mundulkiri, Ala mtao Campuchia. Tinei lu jing đang dliê pla prŏng luh hla hlăm yan không amâodah lŏ pia dliê sui thŭn. Anei jing Đang dliê ala čar sa anăn ti ala čar drei dôk răng kriê mta dliê anei. Čiăng răng mgang êđăp ênang kdrăn dliê ênưih pui ƀơ̆ng, đang dliê knŭk kna Yŏk Đôn leh anăn dŭm êpul bruă alŭ wăl ngă leh, leh anăn dôk pŏk ngă hrăm mbĭt lu hdră msir gang mkhư̆ truih mdjiê klei pui ƀơ̆ng.

Adiê ti Lăn Dap Kngư hlăk čhuang nao hlăm yan bhang không. Hlăm gŭ êyui kmrơ̆ng mơ̆ng đang dliê knŭk kna mkuôm Yok Đôn, mâo lu rơ̆k ƀur, lehanăn hla kyâo luh, mbĭt hŏng rơ̆k srê, hlang, lehanăn alê m'ô... bi krô leh sơăi. Nguyễn Hưũ Tạo, k'iăng khua kiă kriê Anôk bruă răng kriê dliê knŭk kna mkuôm Yok Đôn lač, hlăm yan anei rơ̆k rung ƀur kyâo hla luh thu krô jing ênưih snăk kơ klei pui ƀơ̆ng dliê. Mbĭt hŏng bruă ktir dŭm êbâo met êlan gang pui, lông ngă leh djăp hdră gang mkhư̆ klei pui ƀơ̆ng dliê, êpul êya bruă čuăl krĭng, mghaih msir jih jang djah krô mơ̆ng hnưm mtam.

         “Hlăm đang dliê ară anei mâo truh 17 pôih, êpul gak răng lehanăn hmei hlăk gĭt gai, kiă kriê bruă gang răng hrue mlam mtam. Čiăng hmao ngă jih jang bruă hlăm dliê kmrơ̆ng, mâo dŭm bruă ktir waih jih rơ̆k mda, mkhư̆ hĕ jih djăp mta mnơ̆ng ênưih pui ƀơ̆ng. Čiăng kơ jih jang bruă ngă anăn kñăm dưi mkhư̆ huĭdah mâo klei pui ƀơ̆ng dliê, čiăng kơ dliê dưi đĭ jing jăk"

Êpul bruă djŏ tuôm Đang dliê knŭk kna mkuôm čuăl krĭng, jik čuh rơ̆k rung

Hlăm wăl êngao đang dliê knŭk kna mkuôm Yok Đôn ară anei mâo giăm 30 êbâo gŏ êsei phung ƀuôn sang hdĭp mda, dôk hlăm 7 să dŭm kdriêk Ƀuôn Đon; Êa Sup, čar Daklak, lehanăn kdriêk Čư̆ Jŭt, čar Daknông, jih jang phung ƀuôn sang mnuih djuê ƀiă, klei hdĭp mda ăt adôk jưh knang kơ dliê. H’Khưa Hđơ̆k, Jơ̆ng Lăn, să krông Ana, kdriêk Ƀuôn Đon brei thâo, gŏ sang ñu mbĭt hŏng 19 gŏ êsei mkăn tŭ mă phăn jao răng mgang truh 500ha dliê hrông dôk hlăm đang dliê knŭk kna mkuôm Yok Đôn. Hlăm yan bhang, phung ƀuôn sang mbha ngă mâo 5 êpul hiu suang răng nanao, mđrĭng anăn răng kơ klei pui rôk, gang mkhư̆ klei pui ƀơ̆ng dliê.

“Grăp gŏ êsei tiŏ nao sa čô mnuih, mjing sa êpul mâo 5 čô, ciăng hiu suăng gak răng dliê kmrơ̆ng hlăm wưng tết. Leh êgao tết snăn ngă dŭm bruă răng mgang huĭ kơ klei pui ƀơ̆ng dliê. Jih jang mnuih hlăm êpul bi mguôp hŏng êpul bruă kiă kriê dliê kmrơ̆ng truh hlăm grăp boh sang mtô mblang mtă mtăn kơ phung ƀuôn sang amâo mâo jah ênah ngă hma hlăm kmrơ̆ng ôh. Jih jang alŭ wăl ênưih tuôm hŏng klei pui ƀơ̆ng, snăn bi hrui mgoh djah djâo, mprăp djăp hdră mkhư̆ klei pui ƀơ̆ng dliê, huĭdah mâo".

Đang dliê knŭk kna mkuôm Yok Đôn jing sa hlăm dŭm bĭt dliê kmrơ̆ng yuôm hin, prŏng êdi hlăm kluôm ala êbeh 115 êbâo ha, dôk lă liă hlăm dua boh čar Daklak, lehanăn Daknông, bi knông hŏng čar Mundulkiri, ala car Campuchia. Ti anei mâo êbeh 220 mta ana kyâo mnơ̆ng dhơ̆ng hdĭp lu jing dŭm mta kyâo yuôm hin; mâo hlăm brô 340 mta hlô mnơ̆ng, boh nik mâo êman dliê, kngâo, krŭ kbang, mja phiơr...

Bi hgŭm hŏng pô dliê, dŭm gŏ êsei păn jao dliê mjing leh êbeh 120 km êlan gang êlan pui ƀơ̆ng

        Phạm Tuấn Linh – Khua kiă kriê đang dliê knŭk kna mkuôm Yok Đôn lač, klei bi mguôp plah wah Êpul kiă kriê dliê kmrơ̆ng, bruă sang čư̆ êa, lehanăn jih jang dŭm gŏ êsei phung ƀuôn sang tŭ mă phăn jao mâo ngă leh jăk bruă răng mgang dliê. Hlăm lu thŭn kơ anei, đang dliê knŭk kna mkuôm Yok Đôn amâo tuôm mâo ôh klei pui ƀơ̆ng dliê prŏng. Hlăm yan bhang anei, đang dliê bi mguôp hŏng dŭm êpul êya bruă djŏ tuôm ngă kjăp jih jang bruă gang mkhư̆ klei pui ƀơ̆ng dliê, bi ktir waih êbeh 120km êlan gang pui, pơ̆ng dŭm êtuh bĭt mdhă čih hưn klei brei răng kơ pui arôk, mkŏ mjing 17 êpul ba anăp nga bruă kăp ksiêm dlăng, gak răng, hâo hưn mtô mblang mtrŭt phung ƀuôn sang mđrăm mbĭt bi răng mgang dliê.

“Čiăng răng mgang dliê, lehanăn mdrơ̆ng hŏng klei pui ƀơ̆ng dliê kmrơ̆ng, snăn hmei bi klă leh bruă răng mgang êlâo yơh jing phŭn. Bruă đang dliê mâo leh hdră hâo hưn kơ êbeh 4 êbâo gưl čô mnuih, lehanăn 5 boh sang hră, čiăng kơ jih jang phung ƀuôn sang, hđeh hriăm hră thâo săng kơ klei yuôm bhăn mơ̆ng dliê. Bi mguôp hŏng knơ̆ng bruă sang čư̆ êa 7 boh să krĭng wăl êngao đang dliê, mâo klei bhiăn bi mguôp mbĭt hiu suăng răng, gang mkhư̆ bi hmao djăp mta klei ngă amâo mâo djŏ hŏng bruă răng mgang dliê. Mbĭt hŏng anăn jing mtă kơ 17 bĭt pôih gak, êpul êya dôk ngă bruă hŏng jih ai tiê suăng răng, gang mkhư̆ phung ngă soh, thâodah phung ƀuôn sang kreh mŭt kbiă hlăm kmrơ̆ng, huĭdah djă ba wăt pui arôk, ênưih ngă klei pui ƀơ̆ng dliê”./.

Pô mblang: Y-Ƀel Êban