Anôk kriê dlăng dliê Thạch Nham mâo čar Kon Tum jao kriê dlăng răng mgang 32 êbâo ha dliê hlăm alŭ wăl 5 să mơ̆ng kdriêk Kon Plŏng siă knông hŏng dŭm kdriêk Sơn Hà, Sơn Tây, Ba Tơ, čar Quảng Ngãi lehanăn kdriêk Dhŭng Trà My, čar Quảng Nam.

Alŭ wăl prŏng siă knông hŏng 2 čar boh taih êbeh 50 km kyua anăn hdră răng mgang dliê tuôm hŏng lu klei dleh dlan. Phan Quốc Vũ, Khua anôk bruă kriê dlăng, răng mgang dliê Thạch Nham, brei thâo bruă bi hgŭm kjăp hŏng dŭm pô dliê ti Quảng Ngãi lehanăn Quảng Nam jing hdră jăk hĭn čiăng răng mgang dliê tŭ dưn:

 “Êpul êya pŏk leh klei bhiăn bi hgŭm hŏng dŭm êpul bruă, pô dliê ƀĭng găp lehanăn mâo hdră hiu suang dlăng, ksiêm dlăng grăp wưng. Dua nah ăt bi trông, mâo klei bi mjĕ hâo hưn lehanăn mkŏ mjing dŭm gưl hiu suang dlăng ti krĭng siă knông, mtô mblang, mtrŭt mjhar kơ mnuih ƀuôn sang ti krĭng anei. Mơ̆ng hdră bi hgŭm hŏng dŭm êpul siă knông snăn ênhă dliê anei dưi kriê dlăng, răng mgang jăk hĭn”

 Dŭm kdrăn dliê siă knông plah wah kdriêk Ia Hdrai, čar Kon Tum hŏng 2 kdriêk Ia Grai lehanăn Čư̆ Pah, čar Gia Lai jing anôk jêñ kreh mâo klei tlĕ uă kyâo soh hdră bhiăn lehanăn čuh dliê ngă pưk hma. Boh nik, ti krĭng ênao êa phŭn pui kmlă Sê San 3 A lehanăn Sê San 4, phung tlĕ kyâo kreh mčhua yua êlan êa anei dŭ mdiăng kyâo, tơdah tuôm hŏng êpul Kon Tum tiŏ snăn diñu đuê̆ phă Gia Lai lehanăn mklăk hŏng snăn. Mơ̆ng thŭn 2018, leh klei bhiăn bi hgŭm hlăm hdră kriê dlăng, răng mgang dliê, mnơ̆ng hlăm dliê ti krĭng siă knông 2 čar Kon Tum lehanăn Gia Lai mâo bi mklă, dŭm êpul dua nah bi hgŭm nao kriê dlăng mbĭt kyua anăn klei ngă soh dưi hrŏ. Nguyễn Tiến Dũng, Kơiăng khua Anôk bruă sang čư̆ êa kdriêk Ia Hdrai brei thâo:

 “Hdră bi trông klei hâo hưn lehanăn bi hgŭm hiu suang dlăng hlăm krĭng siă knông plah wah dŭm êpul djŏ tuôm hŏng 2 kdriêk mơ̆ng čar Gia Lai mâo mđing hluê ngă kñăm bi hrŏ klei bi rai dliê ba wĭt leh boh tŭ dưn. Mơ̆ng grăp thŭn, klei ngă soh ăt hrŏ. Truh kơ ară anei, hlăm krĭng siă knông mơ̆ng kdriêk hŏng dŭm kdriêk mkăn mơ̆ng čar Gia Lai amâo lŏ jing anôk jêñ kơ klei ngă soh hŏng Hdră bhiăn dliê kmrơ̆ng”.

Čar Kon Tum siă knông hŏng dŭm čar Quảng Nam, Quảng Ngãi, Gia Lai hŏng boh taih êbeh 440 km. Hluê ngă klei bhiăn bi hgŭm, 5 thŭn êgao, êpul răng mgang dliê dŭm čar mkŏ mjing leh dŭm êbâo gưl hiu suang dlăng dliê siă knông. Mơ̆ng anăn, ƀuh 370 klei ngă soh hŏng hdră bhiăn dliê kmrơ̆ng, msir mghaih klei ngă soh jhat êbeh 30 klei, hrui giăm 1.000m3 kyâo djăp mta… Nguyễn Văn Nam, Khua knơ̆ng bruă răng mgang dliê kmrơ̆ng čar Kon Tum brei thâo, hdră bi hgŭm răng mgang dliê ti krĭng siă knông ƀrư̆ hruê ba wĭt leh boh tŭ dưn klă sĭt.

 “Êpul êya pô dliê siă knông rơ̆ng leh boh tŭ klă sĭt hlăm hdră bi hgŭm kriê dlăng, răng mgang dliê. Tui ksiêm, bi trông klei hâo hưn, mâo hdră bi hgŭm hluê ngă jăk bruă kriê dlăng, răng mgang dliê ti dŭm krĭng siă knông djŏ hŏng anôk mâo jao kriê dlăng. Pral mâo hdră gang mkhư̆ klei bi rai dliê, ksĭng mmiă lăn dliê, tlĕ mă, dŭ mdiăng mnơ̆ng hlăm dliê soh hŏng hdră bhiăn, boh nik hlăm wưng têt hat, knăm mơak”.

Čar Kon Tum ară anei mâo êbeh 616.000 ha dliê, hlăm anăn păt čiăng jih jing dliê čŏng mâo, hnơ̆ng luôm dliê mơ̆ng čar êbeh 63% lu êdi krĭng Lăn dap kngư. Čar ăt dôk lu ênhă dliê čŏng mâo hŏng hnơ̆ng kyâo lu ana kyâo prŏng, mâo lu mta hlô mnơ̆ng yuôm hin. Kyua pral mâo hdră bi hgŭm plah wah dŭm anôk bruă djŏ tuôm lehanăn hŏng dŭm čar siă knông, Kon Tum dôk gĭr krơ̆ng kjăp klei mtah mda kơ dŭm kdrăn dliê, răng mgang wăl hdĭp mda ti anăp klei mâo dleh dưi ksiêm dlăng mơ̆ng yan adiê lehanăn anei ăt jing bruă krơ̆ng kjăp hdră duh ƀơ̆ng kơ êpul êya mnuih ƀuôn sang djuê ƀiă ti alŭ wăl./.