Sang dôk mơ̆ng mduôn Rơ Châm Dik amâo mâo êdah hŏng klei kdrưh kơăm, klei siam, ƀiădah êdah hŏng klei doh, khuăt leh anăn lu hră pah mni. Hlăm đang war mtah mda, êbeh 300 phŭn kphê dôk bi ktrŏ boh. Ti djiêo anăn jing đang ksu 3000 phŭn dôk reh ktăk. 76 thŭn, ƀiădah ñu amâo mâo mdei. Mmông nao kơ hma, mmông nao kơ đang ksu, đa đa nao kƀĭn êngao ƀuôn hgŭm, amâodah nao čuă găp djuê hŏng êpul kriê dlăng ƀuôn čiăng bi trông bruă ƀuôn. Thŭn leh khua ƀiădah ăt nao êlâo dưn yua kdrăp mrâo hlăm klei mkra mjing, hdĭp thâo khăp hŏng grăp čô. Mduôn ƀuôn Rơ Châm Dik jing gru mngač kơ mnuih ƀuôn sang ƀuôn Mook Den hluê ngă. Ñu brei thâo, hŏng mnuih Jarai, klei hâo hưn, mtrŭt mjhar knŏng tŭ dưn êjai pô hâo hưn ăt jing pô thâo bruă, mâo mnuih ƀuôn sang đăo knang.

“Kphê kâo ăt pla, ksu kâo ăt pla, bi hmô kơ mnuih ƀuôn sang čiăng msir lăm klei ư̆ êpa ƀun ƀin, tơdah knŏng blŭ ƀiădah amâo mâo mă, blŭ hlŏng mă yơh mnuih ƀuôn sang hluê ngă. Êlâo đih amâo mâo êdeh đĭ, ară anei mâo êdeh đĭ kâo lač đĭ êdeh đua đuôn mgang kŏ, amâo dưi mdiăng 3 mdiăng 4. Hlei pô amâo đua đuôn mgang kŏ kâo lač tơdah mâo klei bi drăm mčah kŏ, mgang kơ kŏ pô, mgang kơ asei mlei pô”.

Hlăk thŭn mda mơ̆ng mduôn Rơ Châm Dik nao mbĭt hŏng klei ngă Kahan. Nao kahan thŭn 1966, hriăm sang hră Sĩ quan Lục quân leh anăn mŭt Đảng thŭn 1973, ñu mâo knuih hdĭp siă suôr mơ̆ng sa čô lĭng kahan leh anăn thâo săng hlăm yang ƀuôn. Kyuanăn, mơ̆ng klei mă bruă knuă, hlăm klei hdĭp grăp hruê, djăp mta bruă mơ̆ng ñu mâo mnuih ƀuôn sang ƀuôn Mook Đen đăo knang. Siu Hải, knuă druh dhar kreh – yang ƀuôn ƀuôn hgŭm Ia Dom, sa čô anak mơ̆ng ƀuôn brei thâo:

Ñu jing sa čô mâo kơhưm hlăm ƀuôn, ti ƀuôn hgŭm Ia Dom mâo 5 boh ƀuôn, mnuih ƀuôn sang kreh iêo ñu nao bi mgrăng, bi mgrăng ung mô̆, gŏ sang mâo klei amâo thâo bi djŏ, ñu srăng ngă klei bi mgrăng msĕ si kdrông mkŏ kơ mnuih ƀuôn sang ti alŭ wăl

Leh lu thŭn mduôn Dik bi hmô, mtrŭt mjhar, mnuih ƀuôn sang Mook Đen lui leh dŭm klei bhiăn kthŭl mluk msĕ si bi kuôl ung mô̆, djiê brŭ lu hruê, mnăm kpiê lu, mbha ngăn kơ mnuih djiê, mdrao klei ruă hŏng klei ngă yang, dôk ung mô̆ mda, anak amiêt awa. Amai Siu H’ơn, sa čô tuôm mâo klei mĭn dôk ung mơ̆ng 15 thŭn brei thâo, kyua mâo mduôn Dik ñu thâo dŭm klei amâo mâo jăk mơ̆ng klei dôk ung mơ̆ng mda.

“Kyua amĭ ama luč ưm, ăt huĭ mơh amâo mâo pô rông ba pô, kyuanăn mĭn dôk ung hnưm. Mduôn Dik lač djăp thŭn kơh dưi dôk ung, mơ̆ng 18 – 20 thŭn, ka djăp thŭn amâo dưi ôh, tơdah mâo anak kăn mâo pô dlăng kriê. Ñu kreh nao mtrŭt mjhar truh thŭn kơ dưi dôk ung mô̆, kyua truh thŭn kơh knŭk kna brei.

Rơ Châm Nin, sa čô hlăm ƀuôn, ăt mâo klei mtô mơ̆ng mduôn Dik. Êlâo dih, anak êkei ñu 20 thŭn ƀiădah ka nao kahan. Leh lu blư̆ mtrŭt mjhar, ñu thâo nao kahan jing bruă klam, jing wăl mjuăt ktang asei mlei. Bi mlih klei hêñ mơ̆ng klei čŏng pô dưi bi klă hdră hâo hưn mă boh tŭ, bruă klam leh anăn klei hriê kơ prŏng jing mta kñam mơ̆ng mduôn Dik.

“Kâo mâo dua čô anak nao kahan, leh wĭt diñu dôk mô̆ leh anăn nao ngă hma. Leh mâo mduôn Dik hâo hưn thâo klei nao kahan jing bruă klam, tinăn dưi mjuăt ktang asei mlei, knhuih hdĭp, čiăng hriê kơ prŏng, mơ̆ng anăn jing pô tŭ dưn hlăm yang ƀuôn”.

Ƀuôn Mook Đen mâo êbeh 1000 čô, lu hĭn jing mnuih djuê ƀiă. Kyua hdră mkŏ mkra krĭng ƀuôn sang mrâo, bruă mkŏ mkra duh bi liê hrăm mbĭt, êlan klông bêtông, pui kmlă truh kơ grăp sang, êlan mnga, mnư̆ mnang mtah, pui mtrang mngač. Sang dôk êjai dưi mlih hŏng sang kjăp, klei hdĭp đĭ kyar hĭn, 100% gŏ sang mâo êdeh đĭ, mnuih ƀuôn sang thâo yua kdrăp mrâo, êdeh êdâo mkra mjing, hnư hrui wĭt kah knar grăp čô mâo 42 êklăk prăk sa thŭn.

Lač kơ mduôn ƀuôn Rơ Châm Dik, Nguyễn Đình Tiến, k’iăng khua Bruă sang čư̆ êa ƀuôn hgŭm Ia Dom brei thâo, lu thŭn êgao, ñu bi lar knhuah lĭng kahan awa Hồ, jing gru mngač hlăm yang ƀuôn. Dua čô anak ñu ară anei dôk ngă bruă ti dŭm kdông kahan knông lăn Gia Lai, lŏ čuê kơ bruă ama, đru răng mgang klei kiă kriê lăn čar. Hŏng dŭm klei đru mguôp, mduôn Rơ Châm Dik mâo gưl dlông leh anăn alŭ wăl mđup brei lu hră pah mni hlăm klei đru mtrŭt mjhar mnuih ƀuôn sang, mđĭ kyar klei hdĭp mda, mkŏ mjing klei bi mguôp djuê ana ti knông lan Ia Dom.

Mduôn Rơ Châm Dik jing sa čô êdah êdi hlăm phung mduôn ƀuôn mơ̆ng ƀuôn hgŭm đru kơ Bruă sang čư̆ êa alŭ wăl leh anăn mnuih ƀuôn sang mâo lu boh tŭ dưn jăk. Bi kơ bruă čung ba mnuih ƀuôn sang, mtô mnuih ƀuôn sang kơ klei duh ƀơ̆ng, mtô lač anak čô, brei phung anak nao sang hră mơar. Ñu lŏ đru kơ gŏ sang ƀun, gŏ sang dleh dlan ti alŭ wăl, đru brei kdrăp yua đru kơ mnuih ƀuôn sang, jing gru mngač čiăng kơ grăp čô hluê ngă. Nguyễn Đình Tiến lač:

Klei kjăp, bi hmô leh anăn klei đăo knang hŏng Đảng, hŏng ƀuôn sang mjing leh mduôn Rơ Châm Dik jing sa gru mngač, pô djă pioh klei êđăp ênang ƀuôn sang. Gru mngač mơ̆ng ñu amâo djŏ knŏng jing kơ hjăn Mook Đen 1, ƀiădah lŏ jing klei bi klă kơ knuă druh jih ai tiê, blŭ hlŏng ngă, yua klei hdĭp pô čiăng bi mlih hŏng klei hơĭt kjăp.