VOV4.Êđê -  Êbeh mkrah mlan êgao, ti kdriêk Kon Plŏng, čar Kon Tum mâo dŭm pluh klei mgei lăn lehanăn ktư̆ yơ̆ng. Boh nik, tlam hruê 23/8 mâo leh klei mgei lăn 4.7, hnơ̆ng ktang êdi hlăm 100 thŭn êgao. Ti anăp klei mâo dleh dưi ksiêm dlăng mơ̆ng boh klei anei, bruă rơ̆ng klei êđăp ênang knơ̆ng kdơ̆ng êa kñăm mdrơ̆ng hŏng klei mgei lăn ti Kon Tum mâo leh bruă sang čư̆ êa alŭ wăl mđing dlăng.

Kriêk Kon Plong, čar Kon Tum, anôk mkrah mlan êgao mâo klei dŭm pluh klei mgei lăn leh anăn ară anei mâo 6 hdră bruă pui kmlă leh anăn 125 hdră bruă knơ̆ng kdơ̆ng êa. Lê Đức Tín, K’iăng Khua knơ̆ng bruă sang čư̆ êa kdriêk Kon Plong brei thâo ti anăp klei mgei lăn mâo nanao, dleh ktuê dlăng, bruă sang čư̆ êa kdriêk mđŏ bruă kriê dlăng, ktuê dlăng hŏng dua knơ̆ng kdơ̆ng êa pui kmlă prŏng, mâo: Đăk Đrinh hŏng hnơ̆ng mgơ̆ng êbeh 248 êklăk m3 leh anăn ênao mgơ̆ng êa phŭn pui kmlă akŏ Kon Tum hŏng hnơ̆ng êbeh 145 êklăk m3 êa: “Kdriêk khăng ktuê dlăng bruă hlue ngă mgơ̆ng êa mơ̆ng pô hdră bruă phŭn pui kmlă. Mơ̆ng bruă ktuê dlăng diñu hlue ngă klei gĭt gai mơ̆ng Gưl dlông hŏng čar, amâo mgơ̆ng jih hnơ̆ng hlue si hnơ̆ng mơ̆ng ênao mgơ̆ng. Tal dua mtă kơ diñu mđĭ pral bruă dăp dŭm Anôk ksiêm dlăng. Mđĭ thiăm Anôk ksiêm dlăng snăn klei hâo hưn djŏ klă hĭn. Hlăk yan adiê ngă snăn hlue si klei bhiăn ngă bruă mâo klei bi hgŭm tliêr kjăp plah wah pô hdră bruă hŏng bruă sang cư̆ êa alŭ wăl leh anăn Anôk bruă gĭt gai gang mkhư̆ angĭn êbŭ mơ̆ng kdriêk”.

Dưi dlăng jing sa hlăm dŭm klei hmaĭ kơ klei mgei lăn ti kdriêk Kon Plong, čar Kon Tum, bruă kriê dlăng, ba yua ênao mgơ̆ng êa pui kmlă Akŏ Kon Tum ară anei hlăk dưi hlue ngă tliêr kjăp. Hŏng 3 anôk ksiêm dlăng klei mgei lăn dưi mkŏ mdăp, Knơ̆ng bruă pui kmlă Akŏ Kon Tum bi kuôl kă hŏng Anôk bruă ksiêm dlăng kơ lăn ala lŏ dơ̆ng dăp thiăm 3 anôk ksiêm dlăng čiăng hmao hưn brei răng leh anăn ngă bruă ksiêm hriăm kơ klei mgei lăn hlăm krĭng wăl. Anôk bruă anei ăt mưn phung thơ̆ng kơ bruă ksiêm yap mĭn tĭng gưl mgei lăn gưl 7. Trần Công Đàm, Khua knơ̆ng bruă pui kmlă Akŏ Kon Tum, hlăm Knơ̆ng bruă pui kmlă Vĩnh sơn - Sông Hinh bi mklă, anôk bruă hlue ngă kjăp hdră ba yua mlir ênao mgơ̆ng êa leh anăn ăt mtrŭn leh hdră mdrơ̆ng hŏng klei mgei lăn: “Knơ̆ng bruă ba yua ênao mgơ̆ng êa hlăm anăn mâo bruă hnơ̆ng mgơ̆ng êa yan adiê hjan ăt msĕ I yan không hlue ngă kjăp hdră mlir ênao êa hlăm êa krông Sê San leh anăn hdră ba yua ênao êa akŏ Kon Tum mơ̆ng Phŭn bruă tuh tia mnia blei bi mklă. Hlue ngă dŭm klei bhiăn ksiêm dlăng hlue si djŏ Hdră mtrŭn 114 leh anăn dŭm hdră mtrŭn gĭt gai mkăn mơ̆ng Gưl dlông hŏng alŭ wăl. Knơ̆ng bruă mtrŭn leh hdră mdrơ̆ng hŏng klei mgei lăn čiăng tơdah mâo klei mgei lăn phung knuă druh mơ̆ng Knơ̆ng bruă srăng hmao ngă hdră msir mdrơ̆ng amâo guôn mâo klei gĭt gai mơ̆ng gưl dlông ôh ngă êmưt ngă bruă”./.