VOV4.Êđê - Klei bi lông hriăm jih gưl 3 leh anăn hrŏng ruah hđeh hriăm gưl prŏng, bi hriăm bruă thŭn anei dưi mkŏ mjing hlăm 2 hruê 7 leh anăn 8/7 ti jih jang dŭm čar, ƀuôn prŏng hlăm kluôm ala. Knơ̆ng bruă pui kmlă kwar Krah pral mâo hdră mkăp pui kmlă kơ klei bi lông, rơ̆ng êđăp ênang ti dŭm čar, ƀuôn prŏng krĭng kwar Krah - Lăn Dap Kngư. Knơ̆ng bruă pui kmlă kwar Krah mtă kơ Knơ̆ng bruă pui kmlă dŭm čar, ƀuôn prŏng pral bi hgŭm hŏng Anôk bruă gĭt gai, dŭm Êpul hgŭm bi lông gưl 3 ti alŭ wăl čiăng thâo klei čiăng yua pui kmlă, čih mkra hdră msir leh anăn rơ̆ng djăp pui kmlă kơ klei bi lông. Dưi thâo, ti 13 čar, ƀuôn prŏng kyua Knơ̆ng bruă pui kmlă kwar Krah mkăp pui kmlă mâo 422 anôk bi lông. Dŭm alŭ wăl mâo lu anôk bi lông msĕ si Quảng Nam (55 anôk), Bình Định (43 anôk) leh anăn Gia Lai (40 anôk). Ară anei dŭm Êpul ngă bruă, êpul kriê dlăng, Êpul mkra mjing mjêč mkŏ mjing gak răng mđĭ klei msir mgaih klei truh hlăm dŭm klei lông…

H’ Zawut pô mblang