Mlan 12 ti dŭm krĭng nah Yŭ čar Lâm Đồng ăt mâo hjan. Ti dŭm ktuê êlan phŭn mơ̆ng čar, msĕ si: Êlan dơ̆ng prŏng 20, 27, 27C, 28, 28B… ênưih snăk ƀuh dŭm anôk klưh hroh wăt ti ta luy âm lehanăn ta luy dương hlăk dôk msir mghaih. Mbĭt hŏng anăn, jing dŭm klei luič liê kyua klei adiê hjan êa lêč ngă ti dŭm kčŭn čư̆, mơ̆ng Frenn, Mimosa, D’ran truh kơ Đại Ninh, Sông pha, Gia Bắc…

Kyua adiê hjan êa lip, lu mlan hŏng anei, dŭm êpul djŏ tuôm mơ̆ng čar Lâm Đồng tuh êyuh jih ai tiê dôk gak jih hruê mlam ti dŭm anôk êngăp êa, klưh hroh huĭ hyưt lehanăn mprăp mkŏ mjing anôk gak răng mrâo kñăm rơ̆ng klei êđăp ênang kơ mnuih ƀuôn sang. Ayŏng Nguyễn Duy Hưng, kahan ƀuôn să Hiệp Thạnh, čar Lâm Đồng kreh nao gak răng ti anôk êngăp êa ti êlan dơ̆ng prŏng mrô 20 ti êlan ktlah mtlâo K’Rèn, brei thâo:

“Hmei dôk gak răng kñăm rơ̆ng klei êđăp ênang găn êrô kơ mnuih ƀuôn sang, ktrâo atăt êlan nao amâo găn ôh dŭm ktuê êlan êngăp êa. Ayŏng amai adei kah mbha 2 êpul dôk ti tĭng nah anei lehanăn tĭng nah dih êlan. Kâo dôk gak tinei čiăng răng mgang klei êđăp ênang kơ mnuih ƀuôn sang găn êrô krĭng anei găl hĭn”.

Hlăm gưl adiê hjan êa lip lêč êgao, êpul kahan ksiêm êlan klông mơ̆ng Anôk bruă kahan ksiêm čar Lâm Đồng mă bruă amâo mdei, amâo uêñ hruê mlam dôk ti êlan kñăm ktrâo lač lehanăn đru kơ klei găn êrô êđăp ênang. Thiếu tá Nguyễn Duy Hùng, kahan ksiêm să Đơn Dương, brei thâo, dŭm hruê adiê hjn êa lip, knuă druh, lĭng kahan ba nao jih êpul nao ngă bruă klam:

“Kahan ksiêm să Đơn Dương ba nao leh êpul nao gak răng jih hruê mlam 24/24. Hŏng mnuih ƀuôn sang dleh dlan amâo thâo dŭ ba mnơ̆ng, mâo êpul đru nao mbĕ đuê̆ mơ̆ng krĭng huĭ hyưt. Ti dŭm ktuê êlan, kahan ksiêm êlan klông bi hgŭm hŏng êpul kahan ksiêm să kăp ktrâo lač êlan găn êrô ti dŭm alŭ wăl huĭ srăng mâo klei êngăp êa kjham”.

Hlăm gưl adiê hjan êa lip lêč mơ̆ng hruê 16/11 truh kơ hruê 5/12 ti dŭm ktuê êlan mơ̆ng čar Lâm Đồng mâo leh êbeh 350 anôk klưh hroh. Mâo anôk, Đà Lạt dôk tlă anăp hŏng klei bi ktlah hlăk kčŭn čư̆ D’ran, Mimosa, Frenn klưh hroh amâo dưi găn êrô, bi dua kčŭn čư̆ dôk, mâo: Sacom Tuyền Lâm, Tà Nung ăt dôk tlă anăp hŏng klei klưh hroh, gun kpăk dleh găn êrô. Čiăng krŭ wĭt, krơ̆ng ktuê êlan găn êrô phŭn, phung khua kiă kriê čar Lâm Đồng mbĭt hŏng dŭm knơ̆ng, dhar bruă djŏ tuôm êjai adiê hjan, klưh hroh ăt nao truh ti djăp ktuê êlan, ba nao djăp êpul mă bruă, kdrăp mnơ̆ng, đru msir mghaih êjai, lŏ bi kjăp êlan găn êrô, msir mghaih anôk klưh hroh. Nguyễn Hồng Hải, Kơiăng khua knơ̆ng bruă sang čư̆ êa čar Lâm Đồng ti anôk klưh hroh mkŏ mjing leh Klei bi kƀĭn mjêč êjai mlam, hưn mdah dŭm mta phŭn ngă truh klei klưh hroh lehanăn hdră msir mghaih.

“Kčŭn cư̆ Frenn mkra leh ƀiădah ară anei leh găn êrô bluh mâo lu klei. Kƀah mtih gang kyua anăn čuah kreh klưh hroh. Êlan mđoh êa điêt ngă kơ êa dleh dưi mŭt săn êa anei kreh mlai ti ta luy âm. Mơ̆ng dŭm klei snăn brei mâo hdră msir bi knar mơh. Pral kah mbha bruă klam kơ dŭm krĭng, dŭm hdră bruă huĭ srăng klưh hroh čiăng pral mâo hdră msir mghaih, ksiêm dlăng êlâo, hlăm lehanăn êdei kơ adiê hjan êa lip”.

Hlăk klei adiê hjan êa lip, klưh hroh mâo dleh dưi ksiêm dlăng, păt ciăng jih ti dŭm alŭ wăl, klei gĭr mơ̆ng bruă knŭk kna lehanăn êpul djŏ tuôm čar Lâm Đồng hlăm bruă rơ̆ng kjăp klei êđăp ênang mâo mnuih ƀuôn sang dưi tĭng dlăng myuôm. Ayŏng Trần Văn Hoàng, krĭng Nhà Chung, ƀuôn hgŭm Xuân Hương- Đà Lạt, brei thâo:

“Kâo ƀuh kahan ksiêm êlan klông, lĭng kahan, kahan ƀuôn đru kơ mnuih ƀuôn sang jăk êdi. Êpul djŏ tuôm ƀuh ngă bruă jăk êdi”.

Hồ Văn Mười, Khua knơ̆ng bruă sang čư̆ êa čar Lâm Đồng, mñă:

“Hlăm gưl adiê hjan êa lip mrâo êgao, ti alŭ wăl kreh mâo dŭm klei truh kluh hroh ti dŭm ktuê êlan. Dŭm anôk bruă kđi čar ngă bruă jăk lehanăn boh nik êpul kahan ksiêm lehanăn lĭng kahan. Dŭm ktuê êlan kluh hroh brei hnưm dưi msir mghaih amâo lui gun kpăk ktuê êlan nao phă Đà Lạt boh nik ti kčŭn čư̆ Mimosa lehanăn Frenn. Phung khua Phŭn, dhar bruă gưl dlông tĭng dlăng myuôm êdi. Kčŭn čư̆ Mimosa hlăm 8 hruê drei dưi mkra lŏ brei êdeh êrô jing pral êdi. Phŭn bruă rŭ mdơ̆ng bi mklă êlâo leh kơnăn kơh brei êdeh êrô”.

Hlăm dŭm hruê adiê hjan êa lip mrâo êgao, klei ngă bruă kjăp mơ̆ng anôk bruă knŭk kna čar Lâm Đồng mbĭt hŏng ai tiê đua klam, amâo uêñ hruê mlam mơ̆ng êpul djŏ tuôm, lĭng kahan, kahan ksiêm đru krơ̆ng kjăp ktuê êlan găn êrô mơ̆ng čar. Bi mklă klei yan adiê ngă ƀrư̆ hruê ƀrư̆ mâo dleh dưi ksiêm dlăng mbĭt hŏng bruă mjêč msir mghaih klei luič liê čiăng rơ̆ng klei êđăp ênang êlan klông, čar Lâm Đồng ăt pral mâo dŭm hdră klă klơ̆ng kñăm mkŏ mjing ktuê êlan kjăp, êđăp ênang hĭn”./.