VOV4.Êđê -  Khua hlăm phŭn bruă đi čar, k’iăng Khua knŭk kna Phạm Bình Minh bi klă leh hdră mtrŭn mrô 724 mơ̆ng Khua knŭk kna kơ bruă rơ̆ng klei êđăp ênang hlăm êlan klông wưng hruê mdei knăm mkŏ mjing ala čar 2/9. Hlăm anăn Khua knŭk kna mtă, mâo hdră êlan rơ̆ng ai dưi, hnơ̆ng tŭ jăk leh anăn klei êđăp ênang hŏng bruă dŭ mdiăng tuê leh anăn mnơ̆ng dhơ̆ng, boh nik jing bruă dŭ mdiăng tuê êlan êbat jơ̆ng, êlan êa leh anăn êlan êdeh phiơr hlăm wưng hruê mdei 2/9 leh anăn klei êrô êbat mơ̆ng phung hđeh sang hră, hđeh sang hră gưl prŏng, mtă kơ dŭm anôk bruă dŭ mdiăng, phung mkŏ hlă bruă êlan klông, hluê ngă jăk dŭm hdră bhiăn hlăm klei bhiăn ala čar kơ klei êđăp ênang hlăm êlan klông, mâo dưi brei mâo klei bi mmiă, klei kpăk hlăm dŭm kdrŭn êdeh, sang ga, kdrŭn ksĭ, klei mbŏ kniă tuê đĭ êdeh, mdiăng êgao ênoh mnuih soh hŏng hdră bhiăn. Čŏng mkŏ mjing hdră mkŏ mjing klei êđăp ênang hlăm êlan klông, boh nik hlăm dŭm anôk kreh mâo klei bi drăm, dŭm êlan dơ̆ng prŏng mŭt kbiă Hà Nội leh anăn ƀuôn prŏng Hồ Chí Minh.

Čiăng rơ̆ng klei êđăp ênang êlan klông hlăm knăm bi hdơr hruê mkŏ mjing ala čar 2/9, Anôk bruă sang čư̆ êa čar Dak Lak gĭt gai leh dŭm êpul msĕ si: Anôk bruă ksiêm dlăng êlan klông, kahan ksiêm êlan klông, kahan ksiêm klei êđăp ênang… mđĭ hdră ksiêm dlăng, hiu dlăng, msir mghaih klei ngă soh hlăm êlan klông, mđĭ hdră mtô mblang truh kơ mnuih ƀuôn sang, boh nik hlăm sang hră čiăng jih jang mnuih hluê ngă kjăp Hdră bhiăn răng mgang klei êđăp ênang êlan klông. Mbĭt anăn, pŏk êlan đĭng blŭ mjêč ti Anôk bruă ksiêm dlăng êlan klông mơ̆ng Anôk bruă kahan ksiêm čar hŏng mrô: 0262.3692888; Knơ̆ng bruă êlan klông dŭ mdiăng čar Dak Lak dŭm mrô: 0916.107447; 0983.436091 lehanăn Anôk bruă răng mgang klei êđăp ênang êlan klông čar Dak Lak mrô: 0914.032356, čiăng tŭ mă, msir mghaih klei hâo hưn kơ bruă răng mgang klei êđăp ênang êlan klông. Bùi Văn Ngọc – Khua hlăm anôk bruă răng mgang klei êđăp ênang êlan klông čar Dak Lak brei thâo: Mơ̆ng akŏ thŭn truh kơ ară anei, klei truh hlăm êlan klông ti Dak Lak hrŏ jih 3 hnơ̆ng, ênoh klei truh, ênoh mnuih djiê lehanăn êka. Klă klơ̆ng, hlăm êbeh 8 mlan êgao, ti Dak Lak mâo 151 klei truh hlăm êlan klông, ngă 112 čô djiê, 76 čô êka. Mkă hŏng thŭn êlâo, hrŏ 9 klei, 11 čô djiê lehanăn 35 čô êka./.

Klei hưn mơ̆ng Anôk bruă mguôp hnư Kdrŭn mjưh êdeh Hà Nội brei thâo: Kñăm mkăp kơ klei čiăng êrô êbat mơ̆ng mnuih ƀuôn sang hlăm knăm bi hdơr hruê mkŏ mjing ala čar, 2/9, anôk bruă srăng mkăp 580 mta êdeh êdâo mdiăng mnuih ƀuôn sang ti dŭm kdrŭn êdeh. Jao kơ dŭm kdrŭn êdeh čih mkra hdră kčah, mprăp djăp ênŭm mnơ̆ng dhơ̆ng msĕ si: Hră dưi đĭ êdeh, anôk čhĭ hră đĭ êdeh, čhĭ êdeh kơ dŭm anôk mâo lu mnuih đĭ lehanăn gĭt gai dŭm anôk bruă kriê dlăng lehanăn ksiêm dlăng klei êđăp ênang, gang mkhư̆ klei mtuh, bi mdoh wăl hdĭp mda ti kdrŭn mjưh. Mbĭt anăn, bi hgŭm hŏng anôk kriê dlăng êdeh buyt mơ̆ng Knơ̆ng bruă dŭ mdiăng Hà Nội čiăng mđĭ hnơ̆ng ksiêm dlăng lehanăn ênoh êdeh buyt mkăp kơ bruă dŭ mdiăng mŭt hlăm ƀuôn prŏng. Hluê si Anôk bruă mguôp hnư Kdrŭn mjưh êdeh Hà Nội, hnơ̆ng tuê đĭ êdeh hlăm knăm anei đĭ lu, boh nik hlăm tlam hruê 31/8 lehanăn hruê 1/9; hnơ̆ng tuê lŏ truh srăng lu ti hruê 4/9/2022./.

H’Nêč + Y Ƀel pô mblang