VOV4.Êđê- Hruê mbruê, K’iăng Khua knŭk kna Vũ Đức Đam bi klă leh asăp mtrŭn mơ̆ng Khua knŭk kna kơ bruă rơ̆ng klei êđăp ênang, klei êđăp ênang hlăm bruă hiu čhưn ênguê wưng hruê mdei knăm 30/4 – 01/05/2022. Khua knŭk kna mtă kơ dŭm phŭn bruă, anôk bruă mđơr phŭn bruă, dŭm anôk bruă knŭk kna, bruă sang čư êa dŭm čar, ƀuôn prŏng gưl dlông kñăm gĭt gai hluê ngă hrăm mbĭt, ktang phĭt, mâo boh tŭ dưn dŭm hdră êlan rơ̆ng klei êđăp ênang yang ƀuôn, bi doh wăl hdĭp mda, rơ̆ng klei doh mnơ̆ng ƀơ̆ng huă, mđĭ hĭn hnơ̆ng tŭ jăk bruă hiu čhưn ênguê. Hluê anăn, mđĭ hĭn bruă hâo hưn, mđĭ klei thâo săng mơ̆ng dŭm knơ̆ng bruă, gŏ sang mnia mblei, tuê hiu čhưn ênguê hlăm bruă hluê ngă dŭm hdră êlan gang mkhư̆ klei ruă tưp Covid-19, bi doh wăl hdĭp mda, rơ̆ng klei doh mnơ̆ng ƀơ̆ng huă… Hlăm dŭm wăl, anôk hiu čhưn ênguê, gĭt gai kơ dŭm alŭ wăl mđĭ hĭn bruă ksiêm dlăng, rơ̆ng klei êđăp ênang hlăm bruă hiu čhưn ênguê, rơ̆ng klei êđăp ênang kơ phung tuê êjai nao hlăm êlan klông, boh nik jing dŭm anôk kreh mâo klei dleh kpăk, bi drăm êdeh êdâo hlăm êlan klông.

Pô mblang: Y-Ƀel Êban