VOV4.Êđê- 15 hruê êgao, ti kdriêk Kon Plŏng, čar Kon Tum mâo dŭm pluh gưl mgei lăn lehanăn ktư̆ yơ̆ng. Boh nik, tlam hruê 23/8, mâo klei mgei lăn 4,7độ, ktang êdi hlăm 100 thŭn êgao. Ti anăp klei anei, bruă rơ̆ng klei êđăp ênang dŭm knơ̆ng kdơ̆ng êa kñăm mdrơ̆ng hŏng klei mgei lăn ti Kon Tum dôk mâo anôk bruă sang čư̆ êa lehanăn êpul êya kriê dlăng bruă anei mđing êdi. Lê Đức Tín, K’iăng khua anôk bruă sang čư̆ êa kdriêk Kon Plŏng, bruă sang čư̆ êa kdriêk mđĭ leh hdră kriê dlăng, ksiêm dlăng dua knơ̆ng kdơ̆ng êa prŏng mâo: Đăk Đrinh êbeh 248 êklăk m3 êa lehanăn Knơ̆ng kdơ̆ng êa Akŏ Kon Tum êbeh 145 êklăk m3 êa.

Mbĭt hŏng 3 anôk mkă dlăng hnơ̆ng mgei lăn dưi mkŏ dưm, Anôk bruă phŭn pui kmlă Akŏ Kon Tum bi hgŭm hŏng Knơ̆ng ksiêm dlăng kơ lăn ala lŏ dơ̆ng mkŏ dưm 3 anôk mkă dlăng hnơ̆ng mgei lăn čiăng pral hưn brei răng lehanăn mkăp kơ bruă ksiêm dlăng klei mgei lăn hlăm krĭng wăl./.

                                                    Pô mblang: H’Nêč Êñuôl