Kahan răng mgang knông lăn čar Daklak bi klei bruă bi leh jăk kơ bruă ruah khua hnưm, lehanăn ƀuăn kơ bruă răng mgang kjăp klei êđăo ênang hlăm wưng mkŏ mjing klei ruah khua. Êpul mă bruă mơ̆ng knơ̆ng kiă kriê kahan răng mgang knông lăn čar Daklak nao ksiêm hlăm dŭm êpul êya mâo; Dŭm kđông kahan răng mgang knông lăn Ea H’Leo, Ia Rvê, Yok M’Bre, Sê Rê Pốk, Bo Heng, Yok Đôn, ƀăng jang knông lănk Ruê lehanăn Tiểu đoàn mjuăt bi hriăm kahan knhăk.

Ti dŭm êpul êya, êpul ngă bruă hmư̆ leh klei hâo mdah kơ boh tŭ dưn klei prăp êmiêt ruah khua, hlăm anăn mđing hlue ngă dŭm asăp mtrŭn mơ̆ng gưl dlông, kơ bruă hâo hưn, bi lar klei bhiăn klei ruah khua truh hŏng knuă druh, lĭng kahan lehanăn mnuih ƀuôn sang hlăm knông lăn, kơ bruă răng mgang klei êđăp ênang hlăm alŭ wăl kơ klei ruah khua, mprăp jăk anôk mplĕ hră, mnơ̆ng pioh kơ bruă ruah khua, huôm mplĕ hră lehanăn mkŏ mjing klei ruah khua hnưm.

Đại tá Đỗ Quang Thấm, Pô ngă bruă kđi čar hlăm knŏng kiă kriê kahan răng mgang knông lăn čar Daklak bi mni kơ klei čŏng mprăp kjăp, mâo bruă klam mơ̆ng dŭm gưl bruă Đảng, bruă sang čư̆ êa alŭ wăl mprăp jih jang bruă kơ klei ruah khua hŏng klei djăp ênŭm, mtă kơ dŭm êpul êya lŏ dơ̆ng ngă bruă hâo hưn truh hŏng knuă druh, lĭng kahan, lehanăn mnuih ƀuôn sang hlăm alŭ wăl thâo săng kơ klei yuôm bhăn mơ̆ng klei ruah khua, jih ai tiê nao ruah khua hŏng klei ênŭm , djŏ klei čoh čuăn. mbĭt anăn, čŏng păn kjăp boh klei hlăm alŭ wăl, boh nik hlăm dŭm anôk mplĕ hră.

Hŏng dŭm êpul êya mplĕ hră hnưm, êpul ngă bruă mtă kơ dŭm êpul bruă Đảng, anôk kiă kriê kahan răng mgang knông lăn mâo klei bi mguôp kjăp hŏng bruă sang čư̆ êa ngă jăk bruă prăp êmiêt, rơ̆ng kơ alŭ wăl mâo klei êđăp ênang hlăm klei mplĕ hră, mplĕ hră djŏ klei bhiăn, lehanăn mprăp dŭm huôm mplĕ hră djă hiu pioh kơ dŭm anôk dôk gak răng ti knông lăn, mjing klei găl kơ phung knuă druh, lĭng kahan dôk ngă bruă, dưi bi leh bruă ruah khua djŏ hŏng klei bhiăn.  Đại tá Đỗ Quang Thấm brei thâo:

“Mâo dŭm klei čiăng mtă kơ diih, lŏ dơ̆ng mâo klei bi mguôp kjăp hŏng dŭm êpul êya ngă jăk bruă hâo hưn kơ mnuih ƀuôn sang, klă sĭt srăng jing hrue mơak hŏng jih jang mnuih hlăm alŭ wăl knông lăn. Tal dua, hâo hưn hlăm êpul êya mđĭ hĭn klei thâo săng kơ phung knuă druh, lĭng kahan bi leh klei ruah khua hnưm, pioh lŏ ngă bruă čuăn răng mgang klei êđăp ênang hlăm jih alŭ wăl knông lăn hlăm gưl ruah khua anei.’