Khua gĭt gai Đảng Tô Lâm lehanăn Khua knŭk kna Phạm Minh Chính nao leh ti Knăm rŭ mdơ̆ng Sang hră mlir gưl sa, gưl dua Đồng Đăng, să Đồng Đăng, čar Lạng Sơn. Knăm rŭ mdơ̆ng dưi mkŏ mjing ti 17 anôk phŭn lehanăn 104 anôk mdah online hlăm kluôm ala. Blŭ ti knăm anei, Khua gĭt gai Đảng Tô Lâm mñă, hlăm wưng Cách mạng, Đảng, Knŭk kna mđing dlăng, duh nanao kơ hdră mđĭ kyar bruă mtô bi hriăm ti krĭng knông lăn. Phŭn bruă kđi čar bi mklă duh kơ 248 boh sang hră čiêm rông phung hđeh mlir gưl ti 248 să knông lăn. Anei jing sa hdră êlan djŏ klă, bi êdah klei mđing mơ̆ng Đảng, Knŭk kna hŏng mnuih ƀuôn sang krĭng knông lăn, krĭng taih kbưi adôk dleh dlan.

Khua gĭt gai Đảng mtă kơ bruă Đảng, bruă knŭk kna dŭm alŭ wăl ksiêm dlăng lehanăn mtrŭt hdră hluê ngă hŏng klei pral, tŭ dưn, mprăp kơ thŭn hriăm mrâo 2027 - 2028. Mbĭt anăn, hdră rŭ mdơ̆ng sang hră brei mđing kơ bruă mkŏ mjing anôk bruă mtô bi hriăm mrâo, kluôm dhuôm. Mbĭt hŏng bruă mtô boh hră, brei mđing kơ hdră mtô knhuah hdĭp mnuih, klei čang hmăng kpưn đĭ lehanăn klei ktưn hưn kơ ƀuôn sang pô.