Ƀăng jang knông lăn Lệ Thanh dôk ti êlan dơ̆ng mrô 19,  mkŏ hŏng kdrŭn ksĭ Quy Nhơn (235km) leh anăn dŭm čar Lăn Dap Kngư, mâo klei găl kơ bruă dŭ mdiăng mnơ̆ng dhơ̆ng. Anôk bruă duh mkra bi knông hŏng čar Ratanakiri (Campuchia). Ƀăng jang knông lăn dôk hlăm 3 kiêng đĭ kyar Việt Nam – Lào -  Campuchia, mâo klei găl jing anôk mnia mbleh hluh knông lăn.

Yap truh jih mlan 8/2025, hnơ̆ng klei mnia mblei găn ƀăng jang knông lăn Lệ Thanh mâo 155 êklăk USD. Hlăm anăn ba čhĭ mâo 63 êklăk USD hŏng dŭm mta mnơ̆ng thơ̆ng phŭn msĕ si msei hjei, hbâo pruê̆, êmô hdĭp, klei dŭ mdiăng, lu jing mtei mtah đĭ 59% mkă hŏng wưng anei thŭn dih. Ênoh êdeh êdâo leh anăn phung tuê găn êrô ăt đĭ. Ƀiădah, hluê si dŭm knơ̆ng bruă, bruă mnia mblei găn ƀăng jang knông lăn ăt tuôm hŏng lu klei dleh dlan, mâo hră mơar êrô êbat, prăk jia ăt dleh ksiêm dlăng, ênoh amâo mâo klă klơ̆ng  leh anăn ênoh yuôm ngă truh klei kpĭ prŏng, boh nik jing boh mnga. Bi kơ bruă mkŏ mkra, 5 sang hjiê ară anei dôk ti nah êngao alŭ wăl ƀăng jang, ngă truh klei dleh kơ bruă logistics; yan lu kreh êgao hnơ̆ng. Mmông mă bruă amâo mâo hrăm mbĭt plah wah ƀăng jang knông lăn Lệ Thanh (20h00) leh anăn Oyadav (17h30) ăt bi kpăk kơ klei dŭ mdiăng.

Bùi Trần Nhân Trí – K’iăng khua kiă kriê THILOG (knơ̆ng bruă dŭ mdiăng mnơ̆ng dhơ̆ng Trường Hải) lač:

Mâo sa hră mơar khădah điêt, ƀiădah ăt ngă bi êmưt kơ knơ̆ng bruă. Anăn jing hră mơar ksiêm dlăng ana pla mjing. Hluê si klei čuăn, hră tŭ yap mâo Campuchia mkăp ti Phnompen. Hlăm lăn čar čiăng kơ hră phŭn. Ƀiădah mơ̆ng Phnom Pênh truh kơ ƀăng jang knông lăn Lệ Thanh truh kơ 2; 3 hruê, êjai anăn grăp hruê mâo hră mơar sơăi. Akâo kơ anôk bruă ksiêm mkă ana pla mjing tŭ ư hră scan hŏng oniline êlâo, mkŏ mjing klei pral hĭn kơ knơ̆ng bruă. Kyua hmei ba čhĭ mtei mtah, tơdah guôn 2 truh tlâo hruê srăng êmưt yơh.”

Phạm Anh Tuấn –K’iăng khua bruă Đảng čar, khua bruă sang čư̆ êa čar Gia Lai mñă, dŭm knơ̆ng, dhar bruă, mjêč ksiêm dlăng, mgaih msir mtam dŭm klei akâo mjêč mơ̆ng knơ̆ng bruă, mbĭt anăn mlih mrâo hră mơar knŭk kna, mlih mrâo ai tiê mă bruă hluê hdră hrăm mbĭt, ngă klei đru. Bi kơ wưng sui, čar srăng čuăl mkă ƀăng jang knông lăn Lệ Thanh leh anăn bi kluôm hdră êlan mđĭ kyar anôk bruă duh mkra ƀăng jang knông lăn, mbĭt anăn mă bruă hŏng čar Ratanakiri (Campuchia) hlăm mlan 10/2025 čiăng ruh mgaih klei kpăk gun.

Khua bruă sang čư̆ êa čar Gia Lai ăt iêo mthưr dŭm knơ̆ng bruă čŏng ksiêm dlăng anôk mnia mblei, pŏk mlar êlan nao mrâo, boh nik jing bruă boh mnga mơ̆ng krĭng pla jing hlăm lăn čar leh anăn Campuchia čiăng ba čhĭ. Phạm Anh Tuấn ƀuăn bruă sang čư̆ êa srăng hră mbĭt, mkŏ mjing klei găl, mđing truh kơ mta kñăm ba hnơ̆ng mnia mblei mơ̆ng ƀăng jang knông lăn Lệ Thanh mâo mơ̆ng 2 – 3 êklai USD hlăm thŭn 2030.

“Bi knơ̆ng bruă, kâo mñă brei ngă bruă mtam, ngă hră mtam. Hlei čiăng ngă logistics, hlei čiăng mkra mjing boh mnga, dŭm ha, ya bruă ngă, ti anôk krĭng pla mjing? Ai tiê srăng bi kƀĭn jih krĭng pla mjing ti krĭng anei leh anăn dŭm čar mơ̆ng Campuchia, wĭt tinei, mkra mjing êlam, leh anăn ba čhĭ hŏng êlan dơ̆ng mrô 1, bi ti krŭn ksĭ êa êlam Phù Mỹ, kdrŭn Quy Nhơn. Bi êdah jih jang klei čiăng êdi, kơ jia, kơ ngăn prăk. Knơ̆ng bruă srăng nao mbĭt hlăm klei čuăl mkă, mkŏ wĭt anôk bruă duh mkra ƀăng jang knông lăn Lệ Thanh hlăm wưng kơ anăp.”

Klei kƀĭn bruă Đảng čar Gia Lai gưl tal 1, wưng thŭn 2025 – 2030 srăng mkŏ mjing mơ̆ng hruê 2 – 4/10, Bruă Đảng leh anăn mnuih ƀuôn sang čar Gia Lai hŏng klei gĭr ba čar Gia Lai  jing čar đĭ kyar. Wưng thŭn 2025 – 2030 dưi bi klă jing wưng kdlưn hĭn hŏng mta kñăm đĭ kyar bruă duh mkra êbeh 10% sa thŭn.

Hồ Quốc Dũng, Khua dlăng bruă Đảng čar Gia Lai brei thâo, čiăng dưi mâo mta kñăm, hnơ̆ng čuăn hlăm wưng thŭn 2025 – 2030 ba čar Gia Lai jing čar đĭ kyar, čar bi klă 5 kmeh gơ̆ng đĭ kyar, 4 klei kdlưn hĭn, hlăm anăn, mâo đĭ kyar bruă logistics kdrŭn ksĭ nao mbĭt hŏng êlan klông leh anăn êlan dơ̆ng pral Quy Nhơn - Pleiku, ƀăng jang knông lăn Lệ Thanh, krŭn ksĭ Quy Nhơn.

“Tal 1 jing mđĭ kyar bruă tuh tia, boh jing bruă mkra mjing hluê si klei găl mơ̆ng čar. Tal 2 jing mđĭ kyar bruă hiu čhưn ênguê, ba yua klei găl mơ̆ng krĭng čư̆ čiăng, krĭng ksĭ, klei găl hƀuê ênuk, dhar kreh, anôk hing ang leh anăn wăl mnơ̆ng hdĭp čiăng ba Gia Lai  jing anôk truh jăk mơ̆ng alŭ wăl leh anăn lăn čar.  Ba čar Gia Lai  jing anôk truh jăk hlăm hla kak hiu čhưn ênguê mơ̆ng lăn čar leh anăn alŭ wăl. Tal 3 jing mđĭ kyar bruă logistics kdrŭn ksĭ nao mbĭt hŏng êlan klông leh anăn êlan dơ̆ng pral Quy Nhơn - Pleiku, ƀăng jang knông lăn Lệ Thanh, krŭn ksĭ Quy Nhơn, mkŏ mjing bruă Logistics êlan knhal Ngŏ Yŭ čiăng mkŏ mjing sa hlăm dŭm kmeh gơ̆ng mđĭ kyar mơ̆ng čar.