Leh sa wưng sui mâo klei kpăk, dŭm hdră bi êran pui kmlă hạt nhân Ninh Thuận 1 leh anăn 1 dôk lŏ dơ̆ng ngă ti alŭ wăl Dhŭng čar Khánh Hoà. Bruă ruh mgaih anôk ala mâo klei bi mlih, wăl anôk dôk mrâo dôk duh bi liê, mnuih ƀuôn sang sa ai, mprăp ba jao lăn.

Ƀiădah leh êbeh 15 thŭn, 2 hdră kpăk đuôm, lu boh tŭ dưn mnuih ƀuôn sang hlăm krĭng tŭ klei hmăi. Lăn ala dôk yuôl, mnuih ƀuôn sang amâodưi duh bi liê hlăm wưng sui. Hdră êlan čiu tla ka hmao hŏng ênoh mkra mjing mrâo. Tu Thanh Hường, ti să Phước Dinh brei thâo, mnuih ƀuôn sang mlih mơ̆ng lăn čuah jing rông hdang, rông abao ba wĭt boh tŭ dưn. Êjai hrui wĭt lăn čiăng ngă hdră, boh klei mâo hŏng mnuih ƀuôn sang:

“Sang kâo hrui wĭt hlăm brô 2ha, dôk rông abao leh anăn rông hdang. Ênoh kan hdang ară anei yuôm Đa đa mnuih ƀuôn sang jang lăn kơ hdră, srăng lŏ nao blei lăn hŏng ênoh truh 15 êklai prăk hlăm sa ha”.

Amâo djŏ knŏng klei duh ƀơ̆ng, bruă mkŏ mkra ăt jing klei uêñ mĭn prŏng mơ̆ng mnuih ƀuôn sang krĭng hdră. Ti wăl anôk mnuih ƀuôn sang Vĩnh Tường, krĭng msăt mơ̆ng hdră ti să Phước Dinh, lu bĭt êlan kniă điêt, jhat rai, hmăi truh kơ klei hdĭp aguah tlam leh anăn mđĭ kyar bruă duh mkra. Nguyễn Thị Thanh, ti alŭ Vĩnh Tường brei thâo, êjai nao dôk ti anôk dôk mrâo, mnuih ƀuôn sang čiăng mâo bruă mkŏ mkra hrăm mbĭt, găl ênưih hĭn:

“Mnuih ƀuôn sang Vĩnh Trường mơ̆ng êlâo êlan kniă điêt, dleh dlan êdi, Mdơ̆ng pưk sang ăt mdiăng găn êlan kniă, amâo mâo găl msĕ hŏng anôk mkăn ôh, Kâo hmăng hmưi nao ti anôk mrâo srăng găl, êlan klông prŏng mơh”.

Mơ̆ng boh sĭt anăn, klei čuăn mâo jing mkra mlih hdră êlan kơ boh sĭt, hdră mtrŭn mrô 189/2025 mơ̆ng Bruă Kbĭn ala kơ đa đa hdră êlan duh bi liê kơ rŭ mdơ̆ng sang măi pui kmlă hạt nhân Ninh Thuận pŏk leh hdră bhiăn hŏng dŭm hdră phŭn. Ƀiădah, dŭm hdră êlan anei ăt adôk lŏ ksiêm dlăng, mkra mlih, bi mbŏ čiăng msir dŭm klei kpăk klă klơ̆ng ti alŭ wăl, đru kơ mnuih ƀuôn sang kyua klei bi kdung mơ̆ng hdră sui đei.

Amâo mâo guôn bi leh hdră êlan, čar Khánh Hòa dôk gĭt gai 2 alŭ wăl Vĩnh Hải, Phước Dinh čŏng ngă bruă čiu tla, đru, ngă anôk dôk mrâo. Truh kơ ară anei, bruă čiu tla, anôk dôk mrâo mâo leh boh tŭ dưn. Hdră Ninh Thuận 1 hrui wĭt hlăm brô 450ha, bi klă čiu tlă kơ êbeh 150 čô, ênoh prăk êbeh 168 êklai prăk. Wăl anôk dôk mrâo êbeh 65ha dưi ngă leh hdră êlan. Hdră Ninh Thuận 2 hrui wĭt hlăm brô 320ha, ksiêm dlăng leh êbeh 530 gŏ sang, êbeh 100 gŏ sang dưi tla êjai.

 Nguyễn Văn Nhựt, khua knơ̆ng bruă tuh tia mnia mblei čar Khánh Hoà brei thâo:

“Ti dua să, Bruă sang čư̆ êa čar gĭt gai mtrŭt bi pral klei čiu tla ruh mgaih anôk ala, hŏng ai tiê yua ênoh mơ̆ng hdră mtrŭn mrô 189 ară anei, mbĭt anăn ba yua hdră êlan mkra mlih. Êjai Bruă Kbĭn ala ba mdah klă klơ̆ng mkra mlih, bi mbŏ hdră mtrŭn, alŭ wăl srăng mâo tur knơ̆ng ngă pral.

Klă sĭt brei ƀuh, dua hdră sang măi pui kmlă hạt nhân amâo djŏ knŏng mâo boh tŭ dưn kơ klei mâo djăp pui kmlă ala čar, ƀiădah lŏ đru rơ̆ng klei hơĭt, sui kơ mđĭ kyar lăn čar,leh anăn lŏ pŏk klei găl mkŏ mjing kiêng đĭ kyar mrâo ti Dhŭng Kwar krah. Hŏng boh sĭt jing pui kmlă hnơ̆ng ktang, êwa čhŏ ƀiă, dŭm sang măi anei srăng bi jơr klei mkăp brei, bi hrŏ klei jưh jang kơ mta mnơ̆ng đưm, mđĭ klei čŏng pô mơ̆ng bruă pui kmlă.

Bi alŭ wăl hŏng klei găl ktuê hang ksĭ, bruă mkŏ mkra ƀrư̆ hruê ƀrư̆ kluôm, alŭ wăl anei mâo klei găl mđĭ kyar bruă duh mkra êa ksĭ, hiu čhưn ênguê leh anăn pui kmlă. Nghiêm Xuân Thành, khua bruă Đảng čar Khánh Hoà brei thâo, čiăng kơ dŭm klei găl jing klei sĭt, bruă hmao ruh mgaih dŭm klei kpăk kơ hdră êlan, rơ̆ng boh tŭ kơ mnuih ƀuôn sang leh anăn mprăp bi hrăm mbĭt dŭm klei găl mđĭ kyar ăt jing mta phŭn.

Alŭ wăl čiăng uêñ mĭn hdră duh ƀơ̆ng siu kơ mnuih ƀuôn sang hlăm krĭng hrui wĭt lăn, čŏng ksiêm dlăng, ba anăp wăl anôk mơ̆ng hdră êlan čiăng tă bruă mă, đru mtô mjuăt, mkăp klei bruă knuă. Dŭm mta bruă msĕ si mdei msăn, huă ƀơ̆ng, hlăp lêñ, mbĭt hŏng mđĭ kyar bruă lŏ hma, kan hdang čiăng dưi mprăp hrăm mbĭt. Ciăng dưi iêo jak ai dưi, nao djŏ êlan srăng mâo hdră”.

          Klei tŭ ư mâo leh, anôk ala dôk pŏk, boh klei adôk jing hdră srăng hmao hŏng boh sĭt. Êjai dŭm anôk kpăk dưi ruh mgaih, dua sang măi hạt nhân amâo djŏ knŏng bi leh djŏ hdră kčah, ƀiădah lŏ mkŏ mjing boh kdrŭt sui kơ Khánh Hòa leh anăn alŭ wăl Dhŭng kwar krah.