Hluê si klei hưn mơ̆ng čar, anôk bruă lŏ hma – wăl hdĭp mda mơ̆ng alŭ wăl ngă bruă hơĭt kjăp, ƀiădah bluh mâo dŭm klei “Kpăk đuôm”. Hlăm anăn, hdră čuăl mkă, jao lăn, brei mưn lăn, čiu hnô, lŏ mkŏ anôk dôk mrâo hlăk mtŭk mtŭl, dŭm klei kčah mtrŭn kpăk đuôm hlăk klei dưi mơ̆ng dŭm gưl ka dưi bi mklă; êpul mă bruă ksiêm dlăng dliê kmrơ̆ng, mnơ̆ng rông, răng mgang mnơ̆ng dôk tuôm hŏng klei dleh kơ mnuih mă bruă lehanăn hdră mtrŭn đru; klei čih mkra hdră čuăl mkă, hdră kčah ba yua lăn wưng thŭn 2026 – 2030 dôk êmưt kyua kƀah jar klei bhiăn lehanăn hdră ngă bruă; dŭm bruă ngă hră mơar msĕ si bi mklă mrô krĭng pla, đŭng hruh, mkăp hră dưi yua êa drao răng mgang mnơ̆ng pla mjing ka mâo klei sa ai, ngă kơ hdră duh mkra pla mjing, ba čhĭ mnơ̆ng kơ ala tač êngao dôk dleh dlan.

Klah čŭn ti anôk mă bruă, Kơiăng khua phŭn bruă Phùng Đức Tiến bi mni klei pral mơ̆ng Khánh Hòa hlăm bruă hưn mdah sĭt, čiăng kơ Khánh Hòa lŏ dơ̆ng mđing duh kơ mrô, klei bhiăn bruă lăn ala, rơ̆ng klei sa ai mơ̆ng dŭm gưl, mjing tur knơ̆ng bi mklă ênoh lăn lehanăn čuăl mkă lăn hlăm wưng mrâo. Dŭm êpul thơ̆ng kơ bruă mơ̆ng Phŭn bruă brei bi hgŭm hŏng alŭ wăl ktrâo lač, kñăm rơ̆ng hdră kriê dlăng knŭk kna hlăm bruă lŏ hma – wăl hdĭp mda mkŏ mjing tŭ dưn, mkăp djŏ hŏng klei čiăng ba yua gru hmô bruă knŭk kna 2 gưl./.