Ti krah adiê mđiă ktang mơ̆ng yan bhang, Lê Hùng, ti êpul 4, alŭ Tiến Cường, să Quảng Tiến, kdriêk Čư̆ Mgar, čar Dak Lak pŏk đĭng êa mơ̆ng anôk mkăp êa ti krah đang kphê čiăng krih gưl tal 3 kơ ana kphê. Êa ktang hlăm đĭng mdưm leh êlâo, krih kơ grăp phŭn kphê, durian leh anăn tiu. Lê Hùng brei thâo, dŭm pluh thŭn mă bruă, anei jing thŭn tal êlâo ñu mâo klei ênang ti kreh yan bhang. Dŭm thŭn êlâo, hlăm wưng anei, gŏ sang ñu dôk bi ktŭng đĭng dŭm êtuh met nao kơ hnoh êa, leh anăn kăp êa čiăng pom krih kơ ana pla mjing. Ƀiădah thŭn anei, êa truh ti đang hma, Lê Hùng hơ̆k mơak êdi:

“Êlâo dih gŏ sang kâo yua êa hnoh mmông mâo mmông hơăi, kƀah êa, suăi êmăn êdi. Ƀiădah hruê anei êa krih mâo klei hơĭt. Ăt kyua mâo êa mkăp brei kơ mnuih ƀuôn sang hmei, kâo ƀuh dŭm ana kphê, tiu, durian mâo klei mtah mda. Mnuih ƀuôn sang hmei hơ̆k mơak êdi”.

Dŭm êtuh gŏ sang ti alŭ Tiến Cường, să Quảng Tiến dôk bi hơ̆k mơak kyua mâo êa wĭt truh ti hma, boh nik jing thŭn anei, yan bhang mđiă ktang, klei čiăng kơ êa krih jing lu êdi. Phan Phụ, ti êpul 1, alŭ Tiến Cường brei thâo, boh klei dleh hĭn jing êa krih dưi mgaih msir, mnuih ƀuôn sang dưi tĭng kơ bruă duuh bi liê kơ ana pla mjing čiăng ba wĭt boh tŭ dưn hĭn.”

         Ară anei knŭk kna duh bi liê êa anei mnuih ƀuôn sang grăp čô mơak sơnăk. Găl êdi kơ mnuih ƀuôn sang, kyuadah ară anei yua êa msĕ hlăm sang, pŏk leh anăn krih yơh, găl kơ mnuih ƀuôn sang. Boh nik durian hlăm wưng rông boh čiăng êa krih lu êdi, 3 hruê srăng krih sa blư̆”.

Dlăng kơ êa dưi mđoh truh ti hma mnuih ƀuôn sang, Vũ Đức Côn, k’iăng khua kiă kriê knơ̆ng bruă lŏ hma leh anăn mđĭ kyar krĭng ƀuôn sang čar Dak Lak, pô bi ala duh bi liê kơ hdră mkăp êa krih ti alŭ Tiến Cường hơ̆k mơak mbĭt hŏng mnuih ƀuôn sang. Ƀiădah, nah tluôn kleo hơ̆k mơak, ăt dôk mâo lu klei hŭi hyưt hlăm hdră anei. Vũ Đức Côn, brei thâo, bruă hluê ngă hdră anei tuôm hŏng lu klei amâo mao jăk klă hĭn ti thŭn 2020, êjai lông bi êran, đĭng phŭn knŏng dlông mă 5km ƀiădah mčah truh kơ 13 blư̆. Mrâo anei, ti krah mlan 2/2024, đĭng phŭn lŏ mčah sa blư̆ leh anăn dŭm tĭng djŏ tuôm hmar mkra bi jăk, mgaih msir. Ară anei, hdră anei dôk lŏ dơ̆ng lông yua bi êran čiăng mkra mlih êla tơl mâo kleo hơĭt kơh dưi ba jao yua klă klơ̆ng. Hluê si Vũ Đức Côn, ka dưi thâo klă ôh hdră anei mâo klei truh amâo jăk amâodah hơăi:

      Hmei mkra wĭt, pătdah dưi mgaih msir dŭm anôk ka jăk, ƀiădah, năng ai mâo dŭm bĭt anôk ka jăk, êjai bi êran kơh dưi bi êdah. Mrâo anei mâo sa anôk, pia jing co dlông hlăm brô 1,2m ka djŏ hŏng hdră mkra mjing. Kdrăp krih hlăm brô 6.000m đĭng phŭn leh anăn dŭm pluuh km đĭng kƀiêng, hlăm klei bi êran, kyuadah jing đĭng ksu, hnơ̆ng êa ktang, nao hlăm anôk pla mjing mơ̆ng mnuih ƀuôn sang, mâo dŭm klei kjăt kƀla ăt dleh dưi ksiêm dlăng.

Hdră mkăp êa ti alŭ Tiến Cường, să Quảng Tiến, kdriêk Čư̆ Mgar mâo bruă sang čư êa čar Dak Lak bi klă mâo ênoh duh bi liê giăm 73 êklai prăk, mphŭn rŭ jing mơ̆ng thŭn 2019, hdră kčah bi leh ti mlan 10/2020 ƀiădah êmưt hŏng hdră kčah. Hdră anei dưi bi klă jing čiăng êdi leh anăn mao klei hmăi prŏng hŏng krĭng jêñ jêñ tuôm hŏng klei kƀah êa msĕ si Quảng Tiến, ƀiădah bruă hluê ngă ăt mao lu klei amâo mâo hơĭt. Mâo lu wưng, phung ngă bruă leh anăn pô duh bi liê amâo mâo klei blŭ mbĭt, mâo blư̆ bi mplĕ klei soh hdơ̆ng pô. Mmông mâo lu blư̆ đĭng mđah, pô rŭ mjing lač klei soh mơ̆ng pô mkra mjing, pô duh bi liê plĕ kơ phung ngă bruă.

Thŭn 2022, Ksiêm duah mơ̆ng Phŭn bruă lŏ hma leh anăn mđĭ kyar krĭng ƀuôn sang ăt bi klă mâo đa đa klei dôk mâo, klei êdu kƀah mơ̆ng wưng mrao kčưm, bi klă hdră, bi lông ngă bruă truh kơ rŭ mjing, ksiêm dlăng, tla prăk kơ hdră. Hŏng klei gĭt gai ktang phĭt mơ̆ng Phŭn bruă lŏ hma leh anăn mđĭ kyar krĭng ƀuôn sang leh anăn bruă sang čư êa čar Dak Lak, truh ti knhal jih thŭn 2023, anôk bruă dưi mkra wĭt, mgaih msir đĭng êa phŭn, hmao bi êran čiăng mkă êa kơ yang bhang thŭn anei. Ară anei, mâo giăm 400 gŏ sang hŏng hlăm brô 350 ha ana pla mjing dưi tŭ klei jăk mâo êa krih mơ̆ng hdră.

Ƀiădah hlăm klei hơ̆k mơak, ăt dôk mâo klei huĭ kơ đĭng mčah. Tơdah lŏ mâo klei truh, mnuih ƀuôn sang amâo mâo êa krih, pô duh bi liê leh pô ngă bruă mĭn kơ ênoh prăk mkra wĭt, mmông mkra wĭt, mgaih msir.  Klei anei ciăng kơ dŭm anôk bruă thơ̆ng kơ bruă mơ̆ng Phŭn bruă lŏ hma leh anăn mđĭ kyar krĭng ƀuôn sang leh anăn bruă sang čư êa čar Dak Lak srăng lŏ dơ̆ng ksiêm dlăng, bi klă klei hơĭt, klei tŭ dưn mơ̆ng hdră êlâo kơ ba jao, ba yua hlăm wưng sui./.