Thŭn hriăm anei jing thŭn tal êlâo Uông Hân kbưi hŏng gŏ sang hriăm ti sang hră. Klei hriăm tal êlâo hđeh sang hră adŭ 6, djuê ana M’Nông dưi hriăm ti sang hră mrâo, amâo djŏ mơ̆ng hdruôm hră ôh, ƀiădah klei bhiăn hlăm wăl anôk dôk, kơ klei thâo kriê dlăng asei mlei pô, khuăt, doh. Dŭm hruê tal êlâo nao sang hră, ñu khăng dôk hjăn păn hia hjăn kyua hnĭng kơ sang. Hlăk êjai anăn, nai kiă adŭ nao bi juh ñu, čiăng kơ ñu thâo ƀuh klei hơuh mđao dưi ƀiă hnĭng kơ sang. Klei anei ăt đru kơ phung amĭ ama msĕ si amai H’Yên Ƀuôn Krông, amĭ Uông Hân hơĭt ai tiê brei anak hriăm ti sang hră:

 “Êpul adŭ 6 bi blŭ hrăm hŏng phung nai nanao, mâo ya klei nao hưn hlăm đĭng blŭ, hia amâodah amâo tuč klei hriăm nai ăt hưn kơ pô thâo kơ anak pô anăn pô hơĭt ai tiê. Anôk hdĭp leh anăn hriăm hră ti nei jăk snăk pô amâo rŭng răng ôh”.

Bi hŏng phung hđeh sang hră adŭ prŏng hĭn, Sang hră gưl dua mnuih djuê ƀiă knŭk kna rông ba kdriêk Lăk ară anei mưng leh anăn jing sang mbĭt kơ phung hđeh. Grăp cô nai jing amĭ, ama tal dua kriê dlăng, mđĭ ai, kah mbha leh anăn mñă kơ phung hđeh hriăm hră. Adei H’Wion Sruk, hđeh sang hră adŭ 9 brei thâo:

 “Nai mtô sang hră hmei khăp snăk kơ hđeh sang hră leh anăn kriê dlăng hmei jih ai tiê mơ̆ng bruă điêt hĭn msĕ si klăp băn, kih sang leh anăn mtô lu klei mkăn.  Klei kâo ƀuh ai tiê bi juh, ăt hnĭng kơ sang ƀiădah mâo klei mđing dlăng mơ̆ng phung na snăn dưi ƀiă kơ pô”.

Hŏng nai Hoàng Thị Bảy, 16 thŭn siă suôr hŏng Sang hră gưl  2 knŭk kna rông ba kdriêk Lăk, wưng ñu ti sang hră lu hĭn kơ sang. Nai Bảy brei thâo, wăt tơdah klei jing sang hră gưl 2 anăn hđeh sang hră hriăm leh anăn hdĭp mda sa anôk mơ̆ng knăm sa truh knăm 7, knŏng truh knhal jih hruê kăm phung hđeh mâo amĭ ama drông wĭt, boh nik hŏng lu hđeh dleh dlan, sang kbưi đei, grăp thŭn, bruă wĭt sang knŏng ƀiă. Hĭn mơh, phung hđeh jing mnuih lu djuê ƀiă hriê mơ̆ng lu anôk mdê mdê tơdah phung nai amâo klă sĭt thâo săng, kah mbha leh anăn hrăm mbĭt dleh snăk čiăng kơ phung hđeh pŏk ai tiê pô. Nai Hoàng Thị Bảy brei thâo:.

“Kyua phung hđeh jing dŭm djuê ƀiă mdê mdê. Phung hđeh bi blŭ hrăm hŏng klei b;ŭ djuê ana leh anăn klei anăn brei hmei bi thâo săng klei blŭ anăn. Čiăng thâo snăn hmei hriăm čiăng thâo mâo sa klei blŭ hŏng phung hđeh, mâo klei bi kah mbha leh anăn čiăng kơ phung hđeh ƀuh ti sang hră ăt msĕ ti sang mơh”

Hlue si Nguyễn Thị Thuỳ Diễm, Khua sang hră gưl 2 knŭk kna rông ba kdriêk Lăk, thŭn hriăm 2023-2024, kluôm sang hră mâo 152 čô hđeh hriăm. Hlue anăn, 96% jing hđeh sang hră mnuih djuê ƀiă hŏng 8 djuê ana. Lu jing phung hđeh hriê mơ̆ng dŭm să krĭng taih kbưi, krĭng mnuih djuê ƀiă ti kdriêk. Klei hdĭp mda gŏ sang phung hđeh adôk lu klei dleh dlan. Kyua anăn, grăp čô nai bi mklă, êngao kơ bruă pô snăn kriê dlăng hđeh sang hră lŏ jing bruă klam leh anăn klei khăp. Hlăm adŭ, phung nai jing phung nai nmtô kơ hđeh klei thâo. Kbiă mơ̆ng adŭ hriăm truh kơ wăl anôk dôk, phung nai msĕ si phung ama, phung amĭ kriê dlăng kơ phung anak pô mơ̆ng klei huă ƀơ̆ng truh kơ đih pĭt.

 “Phung nai ti sang hră ăt msĕ si phung knuă druh, ohung mă bruă jĕ giăm nanao hŏng phung hđeh. Phung hđeh hriê tinei mơ̆ng adŭ 6, ăt msĕ si anak pô. Kyua anăn phung nai, knuă druh, phung mă bruă ti sang hră hrăm mbĭt nanao čiăng ktrâo lač jăk hĭn kơ phung hđeh tơdah hriê hriăm ti sang hră”.

 Mơ̆ng klei khăp, klei mđing dlăng, kriê dlăng phung amĭ, ama tal dua anei mjing leh boh kdrŭt čiăng kơ phung hđeh ti Sang hră gưl 2 knŭk kna dlăng ba kdriêk Lăk gĭr hriăm, mtô mjuăt hŏng klei đăo “Hruê anei nao sang hră kbưi/ Êlan klei hdĭp êdei anăp jing giăm”. Leh anăn hlăm ktuê êlan anăn, mâo nanao klei hrăm mbĭt, kah mbha mơ̆ng phung nai, sang hră./.