Găn 65 thŭn, sang krum ti djiêu ênao êa mtah, ti krah đang boh mtah mda jing leh rup jĕ giăm, jing klei bi hmô kơ boh tŭ dưn knhuah hdĭp, klei mĭn leh anăn knuih kniêng mơ̆ng khua gĭt gai Hồ Chí Minh.

Sang krum ti krah ƀuôn prŏng phŭn Hà Nội jing anôk Awa hdĭp leh anăn mă bruă sui hĭn hlăm hƀuê ênuk, mâo boh tŭ dưn yuôm bhăn hlăm wưng knhal tuč klei hdĭp ngă bruă cách mạng mơ̆ng Awa. Ti sang krum anei, hlăm dŭm thŭn Mi mđĭ hĭn klei ksŭng mblah bi rai krĭng kwar Dưr, hruê 17/7/1966, Awa Hồ dôk leh ti jhưng čih klei iêo jăk mnuih ƀuôn sang jih ai bi kdơ̆ng hŏng Mi. Ăt ti anôk anei, mơ̆ng thŭn 1965 – 1969, ñu mâo leh mmông čih klei mtă êlâo kơ djiê bŏ hŏng klei khăp kơ jih jang mnuih ƀuôn sang, kluôm Đảng, jih jang phung lĭng kahan, kơ phung hđek êlăk. Leh anăn ăt mơ̆ng anôk anei, ñu đuê̆ nao lă lar. Mâo 4 thŭn ngă bruă klam răng mgang Awa leh anăn êbeh 30 thŭn ngă bruă kriê pioh, bi lar ngăn dưn Hồ Chí Minh hlăm wăl kriê pioh sang bruă Khua lăn čar, Trần Viết Hoàn, khuă kiă kriê hđăp Wăl kriê pioh khua gĭt gai Hồ Chí Minh ti sang bruă Khua lăn čar brei thâo:

         “Sang krum anei jing anôk Awa mă bruă 11 thŭn, anei jing wưng bi klă klei tŭ dưn mơ̆ng Đảng leh anăn lăn čar. Awa hŏng bruă klam jing khua gĭt gai klam jih. Ti nei amâo mâo măl êa man, ƀiădah sang krum anei nao leh hlăm hƀuê ênuk. Sang krum Awa mâo mă knŏng 2 3 adŭ, ƀiădah hlăm ai tiê, klei mĭn Awa, sang điêt anei amâo nanao angĭn leh anăn klei mngač, mâo na nao mnâo ƀâo mngưi mơ̆ng mnga mnuih. Ti gŭ čuôr sang anei, Awa mâo lu mlan krŏng ală mĭn kơ bruă krŭ kdơ̆ng krĭng kwar Dhŭng, mĭn kơ bruă krŭ kdơ̆ng krĭng kwar Dưr leh anăn mĭn kơ klei bi mguôp tar rŏng lăn. Dŭm thŭn ti nei Awa Hồ mâo leh dŭm hră êlan čiăng rơ̆ng kơ klei krŭ kdơ̆ng Việt Nam mơ̆ng klei dưi anei truh kơ klei dưi mkăn.

            Nai prŏng Hoàng Chí Bảo lač, sang krŭm anei bi êdah klă knhuah hdĭp kpă ênô leh anăn jak siam mơ̆ng Awa:

        Klei jăk siam jing êdah êdi, bi klei bi hmô kơ knhuah hdĭp Hồ Chí Minh. Jih klei hdĭp Awa êbeh 60 thŭn ngă bruă krŭ kdơ̆ng đua klam lu klei ktrŏ dlông mra, ƀiădah ñu knŏng mâo mă sa kdrăp ao kaki leh lă, mơ̆ng mphŭn truh kơ mmông đuê nao ăt čŭt hơô msĕ sơnăn. Hlâo jep ksu nao leh hlăm hƀuê ênuk, dŭm mta mnơ̆ng mơ̆ng ñu hlăm hƀuê ênuk dưi bi êdah leh knhuah hdĭp khua gĭt gai Hồ Chí Minh – sa čô mnuih mtrŭn pô êdi.

            Ară anei, sang krum hlăm wăl kriê pioh khua gĭt gai Hồ Chí Minh ti sang bruă Khua lăn čar jing leh anôk Hrah, anôk bi kƀĭn klei khăp mơ̆ng mnuih ƀuôn sang Việt Nam leh anăn phung khăp kơ klei êđăp ênang tar rŏng lăn. Khua gĭt gai Đảng Nguyễn Văn Linh tuôm lač: Ñu bi lar leh sa ai ktang leh anăn hdĭp hŏng hdră klei mdrŏng amâo mâo dưi mplư, klei knap amâo mâo dưi bi mgei, klei ktang amâo dưi mkhư̆ ai tiê kreh kriăng, mkiêt mkriêm, kpă, ênuah. Ñu hdĭp sa klei hdĭp msĕ sơnăn. Klei ngă bruă, klei mĭn, knhuah mngač mơ̆ng Ñu dôk hdĭp lar lar hlăm ai tiê mnuih ƀuôn sang Việt Nam. Bi kơ Khua mil čhil Russia Putin, khua gĭt gai ala čar tal êlâo hlăm ênuk gưl 21 hriê čuă anôk dôk mơ̆ng khua gĭt gai Hồ Chí Minh mâo leh klei čih: “Kâo klă sĭt êjai dưi ktuê dlăng klei hdĭp mơ̆ng sa čô nai Prŏng mơ̆ng mnuih ƀuôn sang Việt Nam. Jing sa čô mâo anăn dôk hlăm hƀuê ênuk tar rŏng lăn”.