VOV4.Êđê- Aguah hruê 11/2, ti mrô 58 Quán Sứ, Hà Nội, Sang mđung asăp blŭ Việt Nam mkŏ mjing leh Knăm bi hdơr Hruê mđung asăp tar rŏng lăn hŏng anăn “Mđung asăp lehanăn klei đăo knang” lehanăn klei bi kƀĭn trông kơ bruă klam lehanăn hdră êlan mơ̆ng bruă mđung asăp hlăm ênuk gưl mrâo čiăng kơ bruă mđung asăp jing hdră đăo knang hŏng ƀĭng hmư̆ hdră mđung. Ti anôk bi kƀĭn trông, phung thơ̆ng kơ bruă hlăm ala čar lehanăn tar rŏng lăn bi mklă, mđung asăp ăt jing anôk bruă mđung klei hâo hưn pral, đăo knang, lar bra, khă snăn brei lŏ mđĭ lar klei găl mâo čiăng jak iêu lu hĭn ƀĭng hmư̆ hdră mđung. Hŏng klei đĭ kyar mơ̆ng kdrăp mrâo, mđung asăp lŏ jing klei bi mklă kơ klei lu jơr hdră mđung, lu klei blŭ lehanăn jăk êdi hmư̆ mơ̆ng hdră mđung asăp. Phung thơ̆ng kơ bruă mđung asăp lač, anôk bruă klei mrâo hlăm anăn mâo bruă mđung asăp brei mâo klei bi mlih, mđĭ lar klei găl mâo, ba klei hâo hưn pral, djŏ klă, đăo knang lehanăn mjing klei đăo knang, khăp mđing hmư̆ hĭn hlăm mnuih ƀuôn sang./.

                                                   Pô mblang: H’Nêč Êñuôl