Leh hmư̆ dŭm anôk bruă mơ̆ng Sang mđung asăp blŭ Việt Nam hưn mdah bruă hluê ngă bruă mprăp kơ Klei bi lông mđung asăp blŭ kluôm ala gưl tal 17, blŭ hrăm bi klă hlăm mmông mă bruă, k’iăng khua Sang mđung asăp blŭ Việt Nam Phạm Mạnh Hùng, Khua êpul mkŏ mjing klei bi lông mđung asăp kluôm ala đăo knang, hŏng klei mkŏ mjing leh anăn mprăp êmiêt jăk, Klei bi lông mđung asăp kluôm ala tal anei srăng mdưm gru kruăk đĭ kyar mrâo kơ mđung asăp kluôm lăn čar leh anăn phung čih klei mrâo, phung čih mkra, phung mkra mjing dưi mâo ai tiê mprăp hrăm mbĭt hŏng djuê ana čiăng bi sĭt dŭm mta kñăm đĭ kyar mơ̆ng lăn čar hlăm ênuk mrâo.

Dŭm klei bi lông gưl anei hlăm lu mta phŭn mơ̆ng klei mrâo mđung asăp msĕ si: Mđung asăp ti mmông anăn mtam, klei čih ksiêm duah, hdră mđung asăp blŭ, hdră mđung asăp mnuih djuê ƀiă. Bih nik, gưl bi lông anei jing gưl tal êlâo, Sang mđung asăp blŭ Việt Nam ba hlăm klei bi klă klă klơ̆ng Podcast - mta mđung asăp dôk đĭ kyar ktang hlăm wăl anôk mrô, mkŏ mjing klei kƀĭn trông prŏng leh ană knăm mphŭn pŏk hŏng hdră kdŏ mmuñ “Ênai mđung ênuk mrâo” mkŏ mjing ti wăl tač 30/10, ƀuôn prŏng Hạ Long hŏng klei nao hgŭm mơ̆ng lu phung kdŏ mmuñ hing ang leh anăn dŭm pluh êbâo čô nao dlăng.