Sang rang mdah Hoàng Sa dôk ti êlan Hoàng Sa, sa hlăm dŭm êlan ktuê hang ksĭ siam êdi hlăm ƀuôn hgŭm Thọ Quang, kdriêk čar Sơn Trà, ƀuôn prŏng Đà Nẵng. Hlăm dŭm hrue anei, mâo lu phung hđeh hriăm hră, phung hriăm gưl prŏng, phung êdam êra, êpul phung kahan hđăp, phung tue hiu čhưn hlăm ala čar, lehanăn tue mơ̆ng ala tač êngao mbĭt hŏng jih jang mnuih khăp kơ klei êđăp ênang lehanăn bŏ hŏng klei thâo khăp kơ êa ksĭ, plao ksĭ lăn čar, nao čuă lehanăn duah klei thâo săng. Nao dlăng lu pŏk rup lač kơ Hoàng Sa, Trường Sa mâo yuôl mdah leh ti sang rang mdah Hoàng Sa, Lê Khánh Ly, mnuih dôk hriăm ti sang hră gưl prŏng bruă nai mtô Đà Nẵng lač: 

“jing sa čô hđeh mrâo hriê čuă dlăng sang rang mdah Hoàng Sa, lŏ sa blư̆ kâo mâo klei thâo săng hĭn kơ klei dưi êngiê wăl êa ksĭ, plao ksĭ lăn čar pô, boh nik hŏng dua wăl plao ksĭ Hoàng Sa lehanăn Trường Sa. Phung mda asei msĕ hŏng hmei knư hĭn mơh brei mâo klei thâo săng, bi yăl dliê truh hŏng mnuih riêng gah thâo kơ klei dưi êngiê êa ksĭ, plao ksĭ lăn čar pô. Hoàng Sa lehanăn Trường Sa jing dŏ Việt Nam”.

Dŭm pŏk hla kak rup lăn, hră mơar đưm, mâo leh hŏng anei dŭm êtuh thŭn, lehanăn lu mta rup lehanăn hră mơar, wăt hŏng lu mta mnơ̆ng msĕ si čuah, tôk ƀriăng... jih jang klei bi knăl kơ bruă pơ̆ng gơ̆ng, mdơ̆ng mdhă bi knăl kơ anôk pô, jing lăn êa Việt Nam hlăm dua wăl plao ksĭ Hoàng Sa lehanăn Trường Sa. Anei jing dŭm klei bi kñăl yuôm bhăn êdi kơ klei dưi êngiê mơ̆ng Việt Nam hŏng wăl plao ksĭ Hoàng Sa; bruă klam yuôm bhăn mơ̆ng êa ksĭ, plao ksĭ hŏng bruă rŭ mdơ̆ng lehanăn răng mgang lăn čar. Trung uý Lê Xuân Thiêm, K’iăng khua êpul mtrŭt mjhar, kđông kahan răng mgang knông lăn Sơn Trà, Knơ̆ng bruă kahan răng mgang knông lăn ƀuôn prŏng Đà Nẵng lač: 

“Hlăm wưng leh êgao, knuă druh lĭng kahan mơ̆ng kđông răng mgang knông lăn Sơn Trà hgŭm leh hŏng dŭm gưl bruă Đảng, bruă sang čư̆ êa alŭ wăl, dŭm dhar bruă djŏ tuôm kreh mkŏ mjing nanao klei hâo hưn. Hŏng dŭm klei hâo hưn prŏng lehanăn điêt, ăt ƀơ̆k bâo nanao kơ dŭm klei kñăm mđĭ klei thâo săng, boh tŭ djŏ tuôm hŏng êa ksĭ, plao ksĭ Việt Nam drei. Hmei kreh mkŏ mjing klei hâo hưn mđrĭng hŏng bruă mkŏ mjing klei duh mkra ala ƀuôn, ktrâo atăt kơ phung hiu trah mă kan hlăm alŭ wăl mđrăm mbĭt hung nao hlăm wăl êa ksĭ, plao ksĭ pô, mbĭt anăn bi răng mgang klei dưi êngiê kơ êa ksĭ plao ksĭ lăn čar Việt Nam drei”.

Sang rang mdah Hoàng Sa mâo knơ̆ng bruă sang čư̆ êa kdriêk Hoàng Sa, ƀuôn prŏng Đà Nẵng kiă kriê. Gah sang wir pha êa ksĭ Ngŏ, mâo rŭ mdơ̆ng hŏng ênhă prŏng truh 1.300m2. Sang anei mâo bi leh, lehanăn dưi ba yua hlăk mlan 3/2018, pŏk ƀăng brei mnuih ƀuôn sang lehanăn phung tue nao mŭt dlăng amâo mâo mă prăk ôh. Grăp thŭn, anôk anei mâo drông dŭm pluh êbâo čô mnuih ƀuôn sang lehanăn tue hriê tui duah ksiêm hriăm kơ hƀuê ênuk. 300 hlăm êbeh dŭm pluh êbâo mta hră mơar, mnơ̆ng mnuă ba rang mdah kñăm bi mklă kơ klei dưi êngiê kơ êa ksĭ, plao ksĭ ti dŏ Việt Nam hŏng dua wăl plao ksĭ Hoàng Sa lehanăn Trường Sa. Lê Tiến Công, Khua adŭ bruă sang čư̆ êa kdriêk Hoàng Sa, jing khua kiă kriê sang rang mdah Hoàng Sa lač:

“Čiăng mă bruă jăk hĭn kơ phung tue hriê dlăng, lehanăn hŏng hlei pô mâo klei čiăng hriăm êmuh kơ plao ksĭ Hoàng Sa, hmei mâo hdră lehanăn ngă leh klei đru kơ bruă anăn hŏng kdrăp mrô hưn lač jih ênŭm, wăt kơ anôk rang mdah ti Sang rang mdah Hoàng Sa mdưm hlăm wedsite mơ̆ng anôk bruă pioh kơ jih jang mnuih čiăng dưi pŏk dlăng tui duah djăp mta hră mơar kơ klei dưi êngiê mơ̆ng Việt Nam hŏng plao ksĭ Hoàng Sa”.

Võ Ngọc Đồng, Khua kiă kriê bruă knuă, hlŏng jing khua knơ̆ng kiă kriê bruă sang čư̆ êa kdriêk Hoàng Sa, ƀuôn prŏng Đà Nẵng lač:

"Hmei kiă kriê sang rang mdah Hoàng Sa mkŏ mjing hdră hâo hưn, kñăm mđĭ klei thâo săng lu hĭn, lehanăn čiăng kơ jih jang mnuih ƀuôn sang mâo bruă klam hŏng klei dưi êngiê, êa ksĭ, plao ksĭ Hoàng Sa. Hmei bi mguôp bruă hâo hưn hŏng bruă kăp ksiêm, tui duah hră mơar, klei mjuăt bi hriăm kơ hbuê ênuk alŭ wăl, hlăm dŭm boh sang hră ti alŭ wăl.

 Hmei hgŭm hŏng bruă êdam êra ƀuôn prŏng, knơ̆ng bruă sang hră mơar, knơ̆ng bruă hiu čhưn ênguê čŏng ba hră mơar kơ Hoàng Sa truh hŏng phung tue hlăm ala čar, lehanăn tue mơ̆ng ala tač êngao. Boh nik, mkŏ mjing klei hiu rang mdah truh hlăm dŭm boh sang hră gưl prŏng, sang hră hđeh hriăm hră kñăm čiăng kơ jih jang phung hriăm lehanăn hđeh hriăm hră, phung mda asei dưi ksiêm hriăm, dŭm klei bi knăl klă mngač kơ hƀuê ênuk, djŏ hŏng klei bhiăn lehanăn kjăp kơ klei dưi êngiê plao ksĭ Hoàng Sa".

          Hoàng Sa lehanăn Trường Sa mơ̆ng sui jing sa kdrêč amâo mâo dưi ktlah ôh mơ̆ng lăn čar Việt Nam. Việt Nam mâo leh djăp ênŭm klei bi mklă kơ klei dưi êngiê hŏng dua wăl plao ksĭ Hoàng Sa lehanăn Trường Sa jing dŏ Việt Nam./.