VOV4.Êđê - Mơ̆ng sa klei iêo mthưr bi mkrum mguôp blei êmô mjeh mơ̆ng khua bruă Đảng nah gŭ să Čư̆ Pui, kdriêk Krông Bông, čar Dak Lak hlăm mbah internet yang ƀuôn, truh kơ ară anei, să krĭng taih kbưi anei mâo leh sa knơ̆ng mkăp brei êmô mjeh, đru kơ dŭm gŏ sang ƀun ƀin mâo klei găl gĭr ktưn, kpưn đĭ hlăm klei hdĭp. Bruă klam mơ̆ng pô ba anăp leh anăn ai tiê bi mguôp mơ̆ng êpul êya bruă Đảng nah gŭ tinei, jing leh ai dưi klă klơ̆ng leh anăn mâo boh tŭ dưn.

Hmei bi tuôm hŏng ayŏng Vàng Seo Vư, ti alŭ Ea Rớt, să Čư̆ Pui, kdriêk Krông Bông, čar Dak Lak hlăk ñu dôk mprăp kơ bruă đru phung mdơ̆ng sang. Ti krah ƀrik, čuah, čhum ao bŏ čuah xi măng ƀiădah ayŏng Vư mơak snăk, kyua hruê mâo sang mrâo giăm leh. Ayŏng Vư yăl dliê: thŭn 1996, gŏ sang ñu mơ̆ng Hà Giang hriê ti krĭng taih kbưi Ea Rớt. Amâo guôp hŏng yan adiê, mô̆ ñu khăng êngoh duam, gŏ sang lu anak anăn mâo lu klei dleh dlan hĭn. Boh sang mdhă jhat rai leh lu thŭn ƀiădah amâo mâo prăk mkra. Thŭn 2017, ñu mâo sa drei êmô ana mđai mâo ênoh 15 êklăk prăl mơ̆ng “Hdră đru mjeh êmô” hlăm să. Leh sa thŭn kriê dlăng, êmô ana mđai sa drei êđai êmô leh anăn ñu lŏ ba wĭt êmô ana kơ hdră čiăng ba kơ gŏ sang mkăn lŏ rông. Truh ară anei, leh 4 thŭn kriê dlăng, êmô ana lŏ mđai 3 drei thiăm. Klei hdĭp gŏ sang ƀrư̆ hruê ƀrư̆ hơĭt kjăp. Leh să dưi iêô mthưr mkrum mguôp mâo 60 êklăk prăk đru ñu mdơ̆ng sang, snăn gŏ sang ăt mâo thiăm 20 êklăk prăk, čiăng mdơ̆ng sang prŏng siam hĭn. Ayŏng Vàng Seo Vư lač: “Bi mni lač jăk kơ să brei leh gŏ sang kâo êmô pioh rông. Mơ̆ng anăn, ñu mđai 3 drei, ară anei gŏ sang čhĭ 2 drei mprăp mdơ̆ng sang. Gŏ sang bi mni lač jăk kơ alŭ wăl mđing dlăng”.

Msĕ snăn mơh, ayŏng Vũ Văn Sinh jing gŏ êsei ƀun, ti alŭ Ea Rớt, ăt mrâo mă êmô mjeh. Ayŏng Sinh brei thâo, pô srăng gĭr rông bi jăk čiăng êmô mđai, pral mkra mđĭ klei hdĭp gŏ sang” “Mâo êmô mjeh đru, gŏ sang kâo mơak snăk. Kâo srăng gĭr rông čiăng kơ ñu mđai, mđĭ kyar bruă duh mkra gŏ sang, hơĭt klei hdĭp mda. Bi mni kơ să leh anăn alŭ wăl mđing kơ gŏ sang”

Hlue si Vàng Seo Măng, Khua ƀuôn alŭ Ea Rớt: Hlăm dŭm thŭn êgao, kyua mâo bruă sang cư̆ êa alŭ wăl đru, dŭm gŏ êsei ƀun mâo êmô gĭr kriê dlăng, rông ba leh anăn lŏ dơ̆ng bi lar gru hmô êmô hŏng klei čăng hmăng pral tlaih ƀun. “Giăm 80% mnuih ƀuôn sang dưi ba jao, grăp gŏ êsei sa gưl mđai. Kyua anăn klei hdĭp mnuih ƀuôn sang tinei dưi bi mlih. Gŏ êsei ƀun ăt lu ƀiădah lu mnuih, lu gŏ êsei amâo lŏ ư̆ êpa ôh”

Alŭ Ea Rớt, să Čư̆ Pui, kdriêk Krông Bông dưi thâo jing alŭ dleh dlan hĭn ti čar Dak Lak.  Hdră đru êmô mjeh jing sa hlăm dŭm klei mĭn čiăng đru kơ mnuih ƀuôn sang gĭr ktưn. Khua Knơ̆ng bruă sang čư̆ êa să, Nguyễn Văn Tâm jing pô ba anăp, ñu čih iêô mthưr hlăm hla pŏk web ala ƀuôn duah ênoh đru. Leh dŭm drei êmô tal êlâo dưi đup brei kơ gŏ êsei ƀun ti alŭ wăl, bruă ngă anei mâo phung hlăm bruă Đảng, knơ̆ng bruă sang čư̆ êa să mđing lar ƀar. Leh 5 thŭn, truh ară anei mâo leh 43 drei êmô mjeh dưi mđup brei kơ gŏ êsei, đru mnuih ƀuôn sang ƀrư̆ gĭr ktưn. Ară anei, Nguyễn Văn Tâm ngă Khua dlăng bruă Đảng să, bi să Čư̆ Pui mâo leh sa hdră đru êmô mjeh. Tâm brei thâo:  Hŏng klei jĕ giăm hlăm bruă gĭt gai mđĭ kyar bruă duh mkra, msir klei ư̆ êpa, bi hrŏ klei ƀun knap, bruă phung hlăm bruă Đảng să klă klơ̆ng nao đru mnuih ƀun, mjing thiăm klei tŭ dưn êdah êdi: “Truh ară anei êmô đĭ leh truh 67 drei. Mâo gŏ sang truh ară anei  mâo mjut truh 3 drei. Mâo mnuih mơ̆ng klei đru anăn rông êmô prŏng čhĭ mguôp prăk ngă sang. Mnuih ƀuôn sang mơak snăk, hdră đru êmô rông Ea Rớt truh wưng mâo klei tŭ dưn prŏng snăk”.

Amâo djŏ knŏng gĭr čih hlăm hla pŏk web ala ƀuôn iêô mthưr phung mâo ai tiê kmah mguôp mbĭt ôh. Mơ̆ng Khua dlăng bruă Đảng truh phung knuă druh să Čư̆ Pui lŏ iêô jak gŏ sang, ƀĭng găp hrăm mbĭt mguôp ai, đru blei thiăm êmô mjeh kơ mnuih ƀun. Bruă ngă yuôm bhăn phung knuă druh, đảng viên ti să đru leh kơ lu gŏ êsei ƀun tinei hơĭt klei hdĭp mda./.