Hŏng klei hdĭp mnuih Lăn Dap Kngư lu jing ngă bruă mkra mjing ti alŭ wăl, lu mnuih ka tuôm kbiă mơ̆ng ƀuôn sang hlăm lu thŭn. Kyua anăn, bruă hâo hưn mtô mblang, boh nik hâo hưn kơ plao ksĭ brei thâo mbruă, hŏng lu hdră mdê mdê, bi mguôp plah wah hâo hưn leh anăn čung ba mnuih ƀuôn sang. Knơ̆ng bruă Tân Cảng Sài Gòn bi hgŭm leh hŏng dŭm alŭ wăl, anôk bruă mkŏ mjing dŭm pluh hruê hâo hưn mtô mblang kơ êa ksĭ, plao ksĭ, iêô jak phung mă bruă kơ êbeh 4 êbâo čô knuă druh, đảng viên, phung kahan hđăp, mnuih ƀuôn sang, phung mă bruă leh anăn hđeh sang hră ti Lăn Dap Kngư. A Bớt, K’iăng Khua Anôk bruă Đảng čar Kon Tum brei thâo:

 “Tân Cảng Sài Gòn tiŏ nao leh phung mă bruă ti dŭm kdriêk taih kbưi mơ̆ng čar čiăng hâo hưn đru kơ phung knuă druh đảng viên, mnuih ƀuôn sang boh nik phung hđeh sang hră thâo săng hĭn kơ bruă klam plao ksĭ Việt Nam. Klei bi kƀĭn jing gưl čiăng Anôk bruă hâo hưn mtô mblang dŭm čar ksiêm dlăng kơ boh klei hlue ngă bruă bi hgŭm leh anăn bi tuôm tui hriăm, bi trông klei thâo kơ hdră ngă mnêč hlăm bruă ngă bruă klam kđi čar mơ̆ng Đảng leh anăn Knŭk kna.”

Klei bi lông ksiêm hriăm online “Tân cảng Sài Gòn 35 thŭn kpưn ti hnơ̆ng dlông rŏng lăn, mkŏ kluôm rŏng lăn” iêô jak giăm 50 êbâo gưl čô hlăm 63 čar, ƀuôn prŏng hgŭm; mjing klei lar bra kơ anôk, bruă klam hnơ̆ng yuôm bhăn mơ̆ng êa ksĭ, plao ksĭ Việt Nam hlăm kluôm ala leh anăn mơ̆ng Tân Cảng Sài Gòn. Čiăng mđĭ bruă bi hgŭm hâo hưn mtô mblang kơ plao ksĭ, êa ksĭ hŏng dŭm alŭ wăl, Huỳnh Thế Mạnh, Khua Anôk bruă hâo hưn mtô mblang čar Gia Lai mtă:

 “Tiŏ nao pô bi ala bruă nao kơ Anôk bruă mtô mblang gưl dlông kơ dŭm kdriêk hâo hưn kơ boh klei mrâo, bruă klam hnơ̆ng yuôm bhăn mơ̆ng plao ksĭ Việt nam, boh klei êa ksĭ ară anei… Lŏ dơ̆ng mkŏ mjing klei bi lông jing yuôm bhăn, klă sĭt, lar bra klei khăp plao ksĭ mnuih ƀuôn sang.”

Đại tá Nguyễn Năng Toàn, Khua dlăng bruă Đảng, Khua Knơ̆ng bruă Tân Cảng Sài Gòn bi mklă: Hlăm thŭn 2024, Knơ̆ng bruă Tân cảng Sài Gòn bi mklă srăng mđĭ hĭn dŭm hdră bi hgŭm hŏng Anôk bruă hâo hưn mtô mblang dŭm čar Lăn Dap Kngư wăt kơ hnơ̆ng prŏng leh anăn ênoh. Hlăm anăn kƀĭn mlih mrâo, bi lu jơr dŭm hdră hâo hưn, mđing pŏk mlar thiăm phung hâo hưn mtô mblang, mbĭt anăn bi hgŭm mkŏ mjing bruă hâo hưn mtô mblang kơ êa ksĭ, plao ksĭ hŏng bruă “Hdơr knga tla ai”, đru kơ klei hdĭp mda ala ƀuôn, kñăm mđĭ hnơ̆ng jăk leh anăn tŭ dưn kơ bruă hâo hưn mtô mblang kơ klei hâo hưn kơ mnuih ƀuôn sang.

Srăng lŏ dơ̆ng đĭ ênoh phung hâo hưn wĭt kơ dŭm alŭ wăl, lŏ dơ̆ng mlih mrâo hâo hưn mtô mblang truh hŏng lu phung hĭn hŏng mnuih Lăn Dap Kngư, lŏ dơ̆ng pŏk mlar phung srăng hmư̆ klei hâo hưn, mđing kơ phung hđeh sang hră, anôk bruă duh mkra, ƀĭng hgŭm, phung bi liê leh anăn mđĭ lar ai ktang bi kƀĭn, iêô mkrum jih hnơ̆ng djăp klei găl čiăng mđĭ boh tŭ dưn bruă hâo hưn mtô mblang.

 Khua kahan Đỗ Văn Yên, K’iăng Khua bruă Đảng kahan brei thâo: Bruă Đảng, Khua bruă kahan êa lŏ dơ̆ng bi hgŭm tliêr kjăp, pŏk ngă hlue ngă jăk leh anăn êbeh hnơ̆ng kčah, bruă klam, lŏ dơ̆ng ksiêm hriăm boh phŭn, hdră msỉ mrâo; bi mguôp mđĭ lar hdră: “Kyua êa ksĭ, plao ksĭ Việt Nam” leh anăn hdră bruă “Kluôm ala kyua Trường Sa, Trường Sa kyua kluôm ala”.

 “Bruă klam răng mgang klei dưi hlăm êa ksĭ, plao ksĭ hlăm boh klei mrâo kčah lu hĭn hŏng bruă hâo hưn mtô mblang. Êpul kahan êa lŏ dơ̆ng hlăm wưng kơ anăp bi hgŭm hŏng čar, ƀuôn prŏng hlăm anôk bruă mđĭ hnơ̆ng jăk hâo hưn kơ êa ksĭ, plao ksĭ, bi mklă anei jing bruă klam phŭn…”

 Knơ̆ng bruă ngă tŭ dưn bruă hdră êlan, klei êđăp ênang ala ƀuôn ti 3 čar bi siñê leh; rông ba jih klei hdĭp Phung amĭ Việt Nam jhŏng ktang, găp djuê phung êngiă asei ti alŭ wăl, đru rŭ mdơ̆ng 15 boh sang klei khăp, mđup brei hnư prăk hriăm hră “kuč mngač klei čang hmăng” kơ phung hđeh sang hră ƀun hriăm thâo. Mđup brei mnơ̆ng kơ phung knŭk kna dlăng ba, phung mâo ai hŏng lăn čar, phung mâo klei hdĭp dleh dlan, kahan êka êkeh ti alŭ wăl./.