Boh durian lehanăn boh durian. Dŭm hruê knhal jih mlan 8 ti Ƀuôn Jŭng 2 ăt msĕ hŏng lu ƀuôn mkăn ti să Êa Yông, kdriêk Krông Pač, grăp mta mnơ̆ng mâo gru kruăk boh durian sơaĭ, hlăk knăm mơ̆ng tal 2 mơ̆ng anôk bruă anei dưi mphŭn pŏk lehanăn dôk mŭt hlăm wưng mâo lu hdră bruă. Jing ƀuôn Êđê tal êlâo ti Dak Lak pla boh durian kđeh kñĭ asăr pê hŏng hnơ̆ng prŏng, nao hgŭm mjing tur knơ̆ng čiăng kơ Dak Lak čiăng čar mâo hnơ̆ng boh durian prŏng êdi mơ̆ng kluôm ala, ară anei mnuih ƀuôn sang ƀuôn Jung 2 ăt jing pô phŭn mơ̆ng knăm mơak anei.

Tuh êa kơhŏ hang hŏng bruă bi mklă boh durian, Y Rô Ma Niê brei thâo, khădah yan anei mă bruă amâo mdei ƀiădah ayŏng ăt hnêč mprăp nao kơ knăm mơak anei:

Dôk mprăp kơ knăm mơak. Dŭm hruê anei kâo nao čih kač rup hlăm êlan lu mơh, čiăng mprăp kơ knăm mơak boh durian.

Êbeh 20 thŭn nao hgŭm mđĭ kyar ana boh durian, mnuih ƀuôn sang ƀuôn Jung 2 ară anei amâo djŏ knŏng mâo sang prŏng siam, êdeh pui, dŭm đang boh durian prăk êklai ƀiădah lŏ nao hlăm hdră bi mnia mblei boh durian. Dŭm gŏ sang nao hgŭm pla boh durian mơ̆ng akŏ thŭn 2000, ară anei jing pô mdrŏng prăk êklai leh. Phung mdea asei hĭn, khădah mâo leh sang kjăp, êdeh ph’phŭt, êdeh kang… ƀiădah ăt lač pô ƀun mơh. Msĕ si Y Kôt Ayŭn, 37 thŭn, lač pô knŏng mâo sa đang boh durian điêt mrâo hrui pĕ kyua anăn ăt hnêč mă bruă dŭ mdiăng mnơ̆ng čiăng mđĭ hnư hrui wĭt.

Boh durian thŭn anei dưi hrui, ƀiădah knŏng mâo dŭm êtuh kg đuič. Hma kâo điêt, ƀiădah kâo ăt gĭr mă bruă. Kâo nao mdiăng boh durian 12h mlam, 1h aguah kơh wĭt. Mâo hruê truh kơ aguah hruê êdei kơh wĭt.

Jing sa ƀuôn “phŭn” pla boh durian ti kdriêk Krông Pač, ƀuôn Jung 2 ară anei amâo djŏ knŏng ngă bruă duh mkra mdê gŏ sang. Mnuih ƀuôn sang ƀuôn Jung 2 jing mnuih phŭn nao hgŭm hlăm Êpul bruă lŏ hma Êa Yông, thơ̆ng kơ bruă lŏ hma doh lehanăn boh durian doh. Mai Đình Thọ, Kơiăng khua hđăp bruă Đảng kdriêk Krông Pač, Khua Êpul hgŭm brei thâo, Êpul hgŭm mnơ̆ng lŏ hma doh Êa Yôn jing sa boh sang bi hgŭm mguôp, mâo Khua pô mtô ngă khua êpul pla mjing, mâo lu mơh phung đăo yơng nao hgŭm. Mnuih Êđê, Mnông, Tày, Nùng bi trông nanao kơ hdră pla mjing, mnia mblei, kah mbha boh tŭ dưn, hrăm mbĭt mkŏ mkra êpul hgŭm bruă jing sa anôk bruă mâo kơhưm mrô sa ti kdriêk. Hlăm đang boh durian mboh lu êdi giăm wăl knhuah gru hƀuê ênuk Đồn Điền CaDa, êlan nao hlăm đang boh ñu maoa lu mta mnga čuh blang, Thọ ktưn hưn, anei jing anôk mnuih hgŭm hlăm êpul mkăp kơ phung tuê hiu čhưn dlăng knăm mơak anei ƀri wưng hruê mkŏ mjing ala čar lehanăn knăm mơak boh durian.

Diih ƀuh ară anei jing snăn, ƀiădah hŏng ƀĭng ngă lŏ hma, mprăp dŭm mlan leh. Ƀuh tinei, mâo sa đang mnga mtam. Nao mŭt hlăm anei ƀuh sa đang mnga, 2 nah êlan êbat nao dưi mkra hŏng bêtông sơaĭ čiăng kơ phung tuê dưi nao dlăng hŏng klei găl.

Hmei đuê̆ mơ̆ng ƀuôn Jung 2 hlăk adiê lĕ tlam leh, ƀuh Sang êpul êya ƀuôn Jung mâo lu mnuih nao bi kƀĭn, hmư̆ klei blŭ hrăm, klei blŭ kwang bŏ wăl tač. Mnuih ƀuôn sang nao ti knăm anei brei thâo, anei jing klei bi kƀĭn mâo Anôk kriê dlăng lehanăn Anôk bruă Đảng ƀuôn mkŏ mjing. Bùi Đình Thành, Khua kriê dlăng ƀuôn Jung 2 brei thâo, bruă yuôm bhăn jing iêu mtrŭt ai mnuih ƀuôn sang mkra êlan. Hŏng klei găl mâo mơ̆ng hdră duh mkra ti ƀuôn, bruă anei prăl mâo leh klei sa ai, bruă iêu mthưr ba yua êdeh ôtô mơ̆ng dŭm gŏ sang đru kơ knăm mơak boh durian, ăt mâo klei sa ai mơh:

Boh tŭ jăk êdi. Khădah ênoh đru čiăng mkra êlan anei jing lu, grăp gŏ sang 1 êklăk prăk, ƀiădah mâo leh klei sa ai mơ̆ng jih jang 100%. Mta kñăm hmei mkra êlan naie čiăng kơ mnuih ƀuôn sang jăk găl hĭn hlăm klei găn êrô nao kơ msat. Anei jing sa bruă ngă jăk, mnuih ƀuôn sang mơak mơh. Kơ kdrêč knăm mơak snăn lŏ mâo dŭm hdră kdŏ mmuñ, čing čhar. Hlei sang mâo êdeh pui snăn nao hgŭm hlăm êpul êdeh trŭn ruê̆ ti knăm mơak. 

Têt Hnŭk êngiê hrăm mbĭt hŏng Knăm mơak boh durian lehanăn Hruê mơak dhar kreh dŭm djuê ana ti buôn Jung 2, să Êa Yông lehanăn kluôm ƀuôn prŏng phŭn pla durian ti kdriêk Krông Pač, čar Dak Lak. Ênai kwang čing čhar msĕ si nao mbĭt hŏng dŭm êpul êdeh mdiăng boh durin ba čhĭ kơ ala tač êngao; hla čhiăm gru đung phiơr mbĭt hŏng grăp êpul êdeh. Hnŭk êngiê, êđăp ênang, trei mđao, yâo mơak, ngă phŭn mil pô, hgŭm mguôp, mđĭ kyar… dưi bi êdah klă êdi ti krĭng anei./.