VOV4.Êđê- Têt Trung thu jing wưng phung hđeh hlăp m’ak, djă pui mtŭ, dlăng kdŏ anak rai. Khă snăn, hŏng phung hđeh krĭng taih kbưi, krĭng mnuih djuê ƀiă snăn Têt trung thu amâo dah pui hruh mngač jing dŭm mta mnơ̆ng amâo duah mâo ôh. Dŭm hruê anei, lu êpul bruă iêu mtrŭt leh djăp klei găl mâo čiăng ba kơ phung hđeh mnuih djuê ƀiă sa yan Têt trung thu tŭ yuôm. Ti să Pa Ủ, kdriêk Mường Tè, čar Lai Châu, phung nai aê mdrao Sang êa drao kahan hŏng mnuih ƀuôn sang 354 (Knơ̆ng bruă nah tluôn), Dhar bruă ênoh mnuih, gŏ sang lehanăn phung hđeh mơ̆ng Phŭn bruă lĭng kahan mkŏ mjing leh hdră ksiêm mkă, mbha êa drao amâo liê prăk kơ 367 čô hđeh ti Sang hră gưl 3 čiêm rông hđeh mnuih djuê ƀiă Pa Ủ. Hlăm hdră “Trung thu kơ phung hđeh thŭn 2022”, giăm 700 čô hđeh lŏ dưi hlăp čhưn m’ak, mâo mđup brei lu hnư mnơ̆ng mâo Anôk bruă mkŏ mjing lehanăn phung mâo ai tiê kmah brei. Hnư mnơ̆ng lehanăn prăk đru hriăm hră truh giăm 4 êklai 500 êklăk prăk.

Ti krĭng knông lăn čar Thừa Thiên Huế, dŭm êklăk čô hđeh ti Sang hră gưl 1 – gưl 2 Hồng Thuỷ, să knông lăn A Lưới dưi drông drông thu hơ̆k m’ak. Dŭm bruă ngă mơ̆ng êpul, phung mâo ai tiê kmah đru leh kơ phung hđeh krĭng dleh dlan, krĭng mnuih djuê ƀiă, krĭng knông lăn… bi êdah knhuah gru “Khăp kơ pô mkăn msĕ si khăp kơ drei pô” mơ̆ng djuê ana drei./.

Pô mblang: H’Nêč Êñuôl