Hluê anăn thŭn 2023 mkiêt mkriêm ngăn prăk knŭk kna 83 êbâo êklai prăk. Khua phŭn bruă ngăn prăk Hồ Đức Phớc brei thâo, thŭn 2023, hnư knŭk kna hrui wĭt mâo 1 êbâo 754 êklai prăk. Hnư bi liê prăk knŭk kna mâo 2 êbâo 109 êklai prăk, knar hŏng 101,6% klei tĭng mkă, đĭ giăm 74 êbâo êklai prăk. Mkiêt mkriêm ngăn prăk knŭk kna jing 83 êbâo klei prăk. Bruă kriê dlăng, mblei mnơ̆ng dơ̆ng  hlăm dŭm Phŭn, dhar bruă leh anăn alŭ wăl mâo klei mlih, mkiêt mkriêm.

Thŭn 2023, Phŭn bruă ngăn prăk bi klă hdră êlan dăp mrâo, mgaih msir êbeh 376 sang dôk, lăn ala mơ̆ng dŭm Phŭn, dhar bruă gưl dlông. Thŭn 2024, Khua knŭk kna ba mdah leh hdră ngă bruă kơ klei mkiêt mkriêm, gang mkhư̆ klei luč liê mang hŏng 9 bruă klam leh anăn 5 hdră êlan, mñă kơ dŭm Phŭn, dhar bruă, alŭ wăl mkŏ mjing hdră êlan hluê ngă dŭm mta kñăm, hnơ̆ng čuăn mkiêt mkriêm hlăm grăp bruă. Lŏ dơ̆ng ksiêm dlăng, mkra mlih dŭm hdră bhiăn djŏ tuôm hŏng klei ngă mkiêt mkirêm, gang mkhư̆ klei luč liê mang, rơ̆ng kơ klei hrăm mbĭt, mgaih msir klei lăp wĭt lăp nao. Hruê anei 21/5, Bruă kƀĭn ala bi trông kơ dŭm hdră êlan êlan klông, bi lông blei ngăn dŏ leh anăn lŏ dơ̆ng ksiêm dlăng, bi klă bruă mnuih mă bruă.