Klei bi mlih yan adiê hlăk ba lu klei hmăi amâo jăk. Anei jing klei hưn ti Anôk bi kƀĭn kluôm ala kơ hdră gang mkhư̆ klei yan adiê ngă lehanăn tui duah mnuih mâo klei truh thŭn 2024 mâo K’iăng khua knŭk kna Trần Lưu Quang gĭt gai aguah hruê 10/5. Ksiêm yap mơ̆ng Knơ̆ng bruă đăo knăl yan adiê êa juôr, Phŭn bruă Ngăn dŏ wăl hdĭp mda, brei thâo hnơ̆ng adiê kah knar 4 mlan akŏ thŭn ti dŭm krĭng hlăm kluôm ala đĭ hĭn mkă hŏng grăp thŭn mơ̆ng 0,5-1,5 độ C. Krĭng Lăn dap kngư lehanăn kwar Dhŭng mâo leh gưl mđiă ktang êdi.

Klei trô̆ kma msĭn mâo ti kwar Dhŭng mơ̆ng hnưm lehanăn ktang hĭn mkă hŏng yang đar thŭn. Hluê si Hoàng Đức Cường, K’iăng khua Knơ̆ng bruă đăo knăl yan adiê êa juôr, klei bi mlih yan adiê dôk hmăi amâo jăk kjham êdi, thŭn anei klei truh mơ̆ng yan adiê mâo klei mđiă ktang, trô̆ kma msĭn, angĭn đrŭng, hjan prŏng. Klei El Nino mâo adiê mđiă ktang hlăk êdu năng ai srăng mâo klei La Nina hŏng hnơ̆ng hjan, angĭn êbŭ, êa lip lu hlăm knhal jih thŭn./.