VOV4.Êđê- Ti čar Dak Lak, mŭt hlăm thŭn hriăm mrâo, mâo lu dŭm pluh čô hđeh sang hră, hđeh sang hră gưl prŏng mơ̆ng ala čar Lào hriê hriăm. Thŭn hriăm anei, mâo giăm 60 čô hđeh sang hră gưl prŏng – hđeh sang hră mơ̆ng Lào dôk tui hriăm ti dŭm sang hră hlăm alŭ wăl čar Dak Lak. hŏng klei uêñ mĭn, klei đru mơ̆ng bruă sang čư êa leh anăn dŭm anôk bruă, sang hră mơar, phung hđeh sang hră dôk gĭr mjing klei hmăng hmưi jing klei sĭt.

Sinh viên Thidphaphone Duangphachanh (25 thŭn, ƀuôn sang ti čar Attapeu, ala čar Lào) dôk hriăm aê mdrao, Sang hră gưl prŏng Lăn dap kngư, ti ƀuôn prŏng Ƀuôn Ama Thuôt, čar Dak Lak brei thâo: Knhal jih thŭn 2017, ñu hriê hriăm bruă mdrao mgŭn hŏng hdră đru kluôm. Giăm 6 thŭn dôk hriăm tinei, găn lu klei dleh dlan, klei mdê hlăm knhuah hdĭp, klei bhiăn, klei blŭ hrăm, hŏng klei đru mơ̆ng sang hră, phung nai lehanăn ƀĭng găp, Thidphaphone dưi mâo leh boh tŭ hlăm klei hriăm hră, ƀrư̆ bi sĭt klei čang hmăng dưi jing aê mdrao mơ̆ng pô.

“Ruah hriăm nai aê mdrao kyua khăp kơ bruă anei, hriăm čiăng thâo dlăng kriê mnuih ruă lehanăn mdrao klei ruă. Hriăm dleh leh, mdê klei blŭ hĭn mơh lŏ dleh thâo săng, bruă anei čiăng kơ klei thâo, hriăm lu snăk. Kâo mĭn srăng wĭt ti Lao mă bruă, đru kơ mnuih ƀuôn sang pô”

Sinh viên Thidphaphone Duangphachanh

Bi adei Chansida Inthakhong (18 thŭn, ƀuôn sang ti čar Sê Kông, ala čar Lào) dôk hriăm Sang hră gưl 3 čiêm rông hđeh mnuih djuê ƀiă Lăn dap kngư (hlăm Phŭn bruă lĭng kahan) ti ƀuôn prŏng Ƀuôn Ama Thuôt brei thâo: Giăm 4 thŭn dôk ti Dak Lak, mưng leh hŏng klei bhiăn ti sang hră hluê klei bhiăn lĭng kahan.

        “Dôk ti sang hră hluê klei bhiăn lĭng kahan, ksiêm dlăng kjăp êdi. Êlâo adih dleh dlan mơh ƀiădah mâo sang hră mđing dlăng kơ klei hriăm hră, huă ƀơ̆ng, tlŏ vaccine tơdah bluh mâo klei ruă Covid 19, kâo ƀuh jăk êdi. Jing sa čô hđeh hriê hriăm ti Việt Nam, sang hră msĕ si sang pô yơh, mding kơ pô, ƀĭng găp jăk mơh, đru pô hlăm djăp bruă.

       Hluê ngă hdră bi mjĕ mjing lehanăn kuôl kă bi hgŭm plah wah čar Dak Lak lehanăn dŭm čar Dhŭng Lao, mơ̆ng thŭn 2018 truh ară anei, mâo dŭm êtuh čô hđeh, sinh viên Lào hriăm ti Sang hră gưl prŏng Lăn dap kngư lehanăn Sang hră gưl 3 čiêm rông hđeh mnuih djuê ƀiă Lăn dap kngư dưi đru hriăm kluôm. Hlăm hdră hriăm, phung hđeh mơ̆ng Lao dưi mjing djăp klei găl, msĕ si: Anôk dôk amâo liê prăk, mkăp prăk yua grăp mlan, dưi drông Têt djuê ana Bunpimay mơ̆ng mnuih Lao ti Ƀuôn Đon, bi tuôm hŏng phung hđeh Lao dôk ti Dak Lak.

Nguyễn Ngọc Phan, Khua Sang hră gưl 3 čiêm rông hđeh mnuih djuê ƀiă Lăn dap kngư brei thâo, thŭn anei, mâo 45 čô hđeh Lao hriăm tinei. Mbĭt hŏng prăk đru hriăm hră mơ̆ng knŭk kna, sang hră ăt iêu mtrŭt klei đru mơ̆ng yang ƀuôn čiăng mđĭ hnơ̆ng tŭ hdră mtô bi hriăm kơ phung hđeh.

“Kluôm prăk mtô bi hriăm phung hđeh mâo sang hră đru, wăt hŏng klei đru mơ̆ng phung knuă druh, nai mtô ti sang hră hgŭm kngan čiăng mđĭ kyar krĭng tlâo kiêng ăt msĕ mơh mđĭ hĭn klei bi mjĕ dua ala čar. Hlăm wưng ti anăp, hmei srăng gĭr hŏng čar Sê Kông, dŭm čar Dhŭng Lao lŏ mđĭ kyar bruă mtô bi hriăm jăk hĭn.

 Khua Êpul hgŭm mjĕ mjuk Việt Nam – Lào čar Dak Lak mđup brei mnơ̆ng kơ hđeh Lao dôk hriăm ti sang hră gưl 2, gưl 3 Lăn Dap Kngư

Hluê Lê Văn Nghĩa, Khua Êpul hgŭm mjĕ mjuk Việt Nam – Lào čar Dak Lak, čiăng mđĭ lar klei bi mjĕ jăk siam mơ̆ng dua ala čar Việt Nam – Lao, Dak Lak bi mklă sa hlăm dŭm bruă klam phŭn jing ngă jăk hdră mtô bi hriăm phung hđeh, sinh viên Lao dôk hriăm ti čar. Čar Dak Lak ăt bi hgŭm, đru, ksiêm dlăng hdră mjuăt bi hriăm, mjing klei găl kơ giăm 60 čô hđeh, sinh viên Lao dôk hriăm ti dŭm sang hră hlăm čar Dak Lak. Mđĭ lar dŭm boh tŭ dưi mâo, 2 ala čar srăng čih mkra hdră kčah mă bruă klă klơ̆ng. Krơ̆ng kjăp bruă hâo hưn, bi hgŭm kñăm pŏk ngă kjăp hdră mjuăt bi hriăm phung hđeh, sinh viên.

“Drei đru, mjing klei găl kơ anak mnuih, mnơ̆ng dhơ̆ng nah gŭ, mjing klei jăk hĭn kơ bruă mjuăt bi hriăm phung hđeh Lao ti čar. Hmei akâo kơ bruă Đảng čar, phung khua kiă kriê lehanăn gĭt gai hdră bi mjĕ mjing plah wah mnuih ƀuôn sang Dak Lak hŏng phung hđeh Lao, mơ̆ng anăn digơ̆ srăng mâo sa boh sang h’uh mđao ti Dak Lak kñăm krơ̆ng kjăp knhuah gru lehanăn mjing klei găl h’ĭt ai tiê dôk hriăm. Hmei srăng iêu mtrŭt klei đru mơ̆ng yang ƀuôn čiăng hluê ngă klei kuôl kă hgŭm bruă mơ̆ng 2 čar Dak Lak lehanăn Sêkông. Dua čar srăng ksiêm dlăng boh tŭ hdră kriê dlăng, mjuăt bi hriăm ti Sang hră gưl tlâo čiêm rông hđeh mnuih djuê ƀiă Lăn dap kngư lehanăn Sang hră gưl prŏng Lăn dap kngư hŏng phung hđeh Lao dôk hriăm ti 2 sang hră anei.

Thŭn hriăm mrâo 2022-2023 truh leh. Mbĭt hŏng phung hđeh Việt Nam, phung hđeh Lao dôk hriăm ti Dak Lak hlăk lŏ dơ̆ng ktuê êlan tui tiŏ klei čang hmăng, gĭr hriăm hră čiăng mkŏ mkra ƀuôn sang ƀrư̆ hruê ƀrư̆ jăk siam hĭn./.

                                                    Pô mblang: H’Nêč Êñuôl