Hlăm adiê êăt yan không ti lăn dap kngư, ti wăl tač Tiểu đoàn Mjuă t bi hriăm – kahan knhăk răng mgang knông lăn čar Daklak, ti să knông lăn Krông Ana, kdriêk Buôn Đon, dŭm pluh čô kahan mrâo dôk bi mdoh, dŭ klam kyâo ngă mnư̆ mnang, pla gơ̆ng anôk kliêng mnah, hlăm sang bi kƀĭn mâo lu kahan mrâo mkăn dôk hmư̆ klei mtô kơ bruă kđi čar, kơ klei bhiăn lĭng kahan, lehanăn ngă klei mkă dlăng klei suaih pral. Binh nhất Lê Thành Huy (18 thŭn), ti ƀuôn prŏng Ƀuôn Ama Thuôt, mrâo mŭt kahan thŭn 2024 lač, dŭm hrue tal êlâo dôk hlăm kahan, kâo tuôm hŏng lu klei ngĭ ngư̆, ênguôtt kơ sang, ƀiădah leh mâo phung khua kiă kriê mđĭ ai, snăn amâo lŏ jăk hnĭng ôh, knŏng mprăp ai tiê kơ klei hriăm mjuăt:

 “Dôk hlăm Tiểu đoàn Mjuăt bi hriăm – kahan knhăk, kâo mâo phung khua êpul jing Tiểu đội trưởng, Trung đội trưởng mđĭ ai, ktrâo atăt, mtô mblang kơ piăt êmiêt, klei huă ƀơ̆ng, klei boh čhum ao, kih sang, klăp mnơ̆ng, knă êsei djam, tui gưt jih klei bhiăn kahan, ep mjuăt bi djŏ. Ară anei klei suaih pral kâo ăt jăk, mprăp leh ai tiê kơ klei hriăm mjuăt mâo dŭm mta: Hmư̆ gưt asăp mtrŭn, hriăm bi mjeh, hriăm êrui hlăm kdrăm mblah, mnah phao mâo tui si Tiểu đoàn mtrŭn.”

 Binh nhất Nguyễn Xuân Điền (24 thŭn), ƀuôn sang ti Ninh Diêm, wal krah Ninh Hòa, čar Khánh Hòa mŭt kahan gưl anei mơh lehanăn djŏ tiŏ hriê hlăm Tiểu đoàn Mjuăt hriăm – kahan knhăk răng mgang knông lăn čar Daklak lač, Ama lehanăn ayŏng ñu tuôm jing kahan leh sơăi. Mơak mơh kyua klei anăn, khădah dôk ngă bruă hlăm anôk bruă hiu čhưn ênguê hŏng ênoh prăk mlan truh giăm 10 êklăk/mlan, ñu ăt čih anăn akâo nao mŭt kahan: 

 “Čhuang nao hlăm wưng mjuăt hriăm anăp anei, kâo mprăp leh ai tiê klei suaih pral pô, lehanăn hŏng klei mĭn kjăp čiăng bi leh jih hdră êlan ep mjuăt. Klei kâo hmăng hmưi êdi jing ktưn ciăng dưi jing sa čô kahan Awa Hồ jăk, gĭr duh myơr mâo sa kdrêč ai tiê điêt dhiêt pô hŏng lăn čar”.

Yan mŭt kahan thŭn 2024 anei, Tiểu đoàn Mjuăt bi hriăm – kahan knhăk răng mgang knông lăn čar Daklak mâo leh ênoh čuăn mjuăt bi hriăm truh 190 čô kahan mrâo, hlăm anăn, 70 čô jing mnuih hlăm čar Daklak, 120 čô jing kahan mơ̆ng čar Khánh Hòa. Đại úy Lê Anh Vũ Niê K'đăm - Đại Đội trưởng Tiểu đoàn brei thâo, jih jang phung kahan mrâo mŭt hlăm thŭn anei dưi mkă dlăng mâo djăp klei suaih pral sơăi, mâo klei hriăm hră mơar kdlưn hĭn mơh mkă hŏng dŭm thŭn êlâo, kyua anăn bruă nao hlăm klei hriăm mjuăt anei srăng ênưih hĭn mơh. Tiểu đoàn ăt mprăp leh mơh ƀhĭ ênŭm kơ gưl mjuăt bi hriăm mrâo:

 “Hŏng jih jang hdră mjuăt bi hriăm msĕ si: Hlue gưt asăp mtrŭn hlăm lĭng kahan, klei bhiăn kahan jơ̆ng bi blah, hriăm mnah phao AK-71, hriăm bhĭr boh mtuh 71, hriăm kơ put mtuh 71… Jih jang klei hriăm anei mâo êpul êya mprăp leh ƀhĭ ênŭm. Hmei mbha leh bruă, jao bruă čuăn kơ phung khua kiă kriê dăp hdră mjuăt bi hriăm, hlue ngă hdră mjuăt bi hriăm djŏ hŏng hdră leh dăp, mtô ti adŭ hriăm lehanăn bi hriăm hlăm kdrăn, jih jang djăp mta bruă mâo mprăp leh ênŭm”.

          Hlăm 47 thŭn mkŏ mjing lehanăn đĭ hriê kơ prŏng, Tiểu đoàn Mjuăt bi hriăm -  Kahan knhăk răng mgang knông lăn čar Daklak mâo mjuăt bi hriăm leh truh 72 gưl, ba jao kơ anôk bruă kahan răng mgang knông lăn čar Daklak, Gia Lai, Kon Tum, Dak Nông, Khánh Hòa, Bình Định lehanăn Quảng Ngãi, ngă jăk bruă răng mgang klei êđăp ênang knông lăn ala čar. Mbĭt hŏng anăn, dŭm êbâo čô kahan mkăp ti alŭ wăl ăt mâo mjuăt bi hriăm, mprăp ai tiê kơ klei bi blah răng mgang klei êđăp ênang kơ lăn čar.

Tui si Thiếu tá Phạm Kiều Hưng – k’iăng khua Tiểu đoàn, păn kjăp klei bhiăn mâo leh mơ̆ng êpul kahan, yan mŭt kahan thŭn 2024 anei, kñăm čiăng kơ jih jang kahan mrâo, hur har hlăm klei bi ktưn ep mjuăt. Bruă Đảng, Êpul khua kiă kriê Tiểu đoàn mkŏ mjing leh hdră êlan kơ klei mă bruă, mkŏ mjing jar tŭ jum, mjuăt bi hriăm kahan mrâo, rơ̆ng kơ jih jang hdră êlan jing “Păn kjăp, hlăm klei klă, mâo klei kjăp”. Thiếu tá Phạm Kiều Hưng lač:

"Tui si knơ̆ng bruă kiă kriê kahan krăng mgang knông lăn čar daklak jao, mơ̆ng phŭn tal êlâo mtam, mâo anôk bruă Đảng, Êpul khua kiă kriê Tiểu đoàn mâo bi mklă leh anei jing bruă čuăn yuôm bhăn, lehanăn mâo mkŏ mjing ksiêm dlăng bruă mprăp dơ̆ng mơ̆ng klei mĭn mơ̆ng Đảng, lehanăn kơ anôk dôk, anôk huă ƀơ̆ng, lehanăn kơ jih jang bruă nah tluôn hlăm klei mjuăt bi hriăm, ciăng dưi mtô bi hriăm kahan mrâo hŏng klei kjăp”.

Adiê ti čar Daklak hlăm yan bhang, ana kyâo mtao bi knăt bi čuh blang mnga bŏ hlăm čư̆ dliê, ƀiădah jing dôk hlăm yan bhang hlơr ktang. Snăn phung kahan mrâo ti Tiểu đoàn Mjuăt bi hriăm – kahan knhăk răng mgang knông lăn čar Daklak srăng găn hlăm dŭm klei lông dlăng ti kdrăm ep mjuăt bŏ hŏng mdiă lehanăn hlơr. Hŏng ai tiê hur har mơ̆ng phung mda asei, anei jing klei lông găn klă mngač kñăm lŏ mđĭ ai tiê bi kjăp klei mĭn phung kahan răng mgang knông lăn, anăp truh kơ klei bi leh bruă čuăn răng mgang kjăp klei êđăp ênang knông lăn ala čar pô hlăm djăp anôk jao ngă bruă./.