Ti anôk bi kƀĭn, Êpul khua kiă kriê bruă Đảng čar Khánh Hòa bi êdah leh bruă tiŏ nao, ruah mdưm Trần Minh Thái, Khua bruă Đảng ƀuôn hgŭm  Bảo An, mŭt hlăm êpul khua kiă kriê, lehanăn păn ngă khua bruă Đảng ƀuôn hgŭm Vĩnh Hải, wưng păn bruă 2025 – 2030. Hồ Xuân Ninh, Khua knơ̆ng bruă tuh tia mnia mblei, păn ngă khua bruă Đảng ƀuôn hgŭm Ninh Sơn. Trần Văn Thống, K’iăng khua anôk bruă mkŏ mjing bruă Đảng, păn ngă khua bruă Đảng ƀuôn hgŭm Bảo An. Blŭ hrăm ti anôk bi kƀĭn, Nghiêm Xuân Thành, Khua bruă Đảng čar Khánh Hòa, hơêč hmưi kơ phung knuă druh mâo ruah mdưm tiŏ nao păn bruă anăn, jing leh mnuih mâo hrŏng ruah hŏng klei kjăp djŏ guôp hŏng bruă kčah jao.

Ñu čang hmăng phung knuă druh anei pral bi hơĭt bruă knuă pô, mă bruă bi djŏ hŏng dŭm hdră mtrŭn mơ̆ng klei bi kƀĭn prŏng Đảng čar Khánh Hòa gưl tal I, wưng păn bruă 2025 – 2030; mđĭ ai dưi, klei thâo pô mlih mrâo hdră elan mă bruă kñăm bi leh jăk bruă kčah jao hlăm thŭn 2025 lehanăn hlăm dŭm thŭn tinăp./.