Leh hmư̆ dŭm klei hưn mdah, Khua knŭk kna Phạm Minh Chính yap yuôm bhăn dŭm klei blŭ mguôp, mâo bruă đua klam, klă hŏng boh sĭt, mâo hnơ̆ng tŭ jăk mơ̆ng phung k’iăng Khua knŭk kna leh anăn phung bi ala hlăm klei kƀĭn. Boh nik, bi mni kơ ai tiê ksiêm hriăm, jhŏng mĭn, jhŏng ngă, jhŏng lač mơ̆ng dŭm knơ̆ng bruă nao hlăm klei kƀĭn, đru kčĕ dŭm boh klei kdlưn hĭn, bi mlih klei mĭn êjai hrăm mbĭt mgaih msir dŭm boh klei mơ̆ng lăn čar.

Khua knŭk kna jao kơ adŭ bruă knŭk kna gĭt gai, bi mguôp hŏng Phŭn bruă mkŏ mkra leh anăn dŭm phŭn, dhar bruă djŏ tuôm mđing hmư̆ dŭm klei blŭ mguôp, mâo klei bi klă hlăm klei kƀĭn čiăng gĭt gai, ktrâo lač. Hlăm wưng kơ anăp, Khua knŭk kna mñă kơ phung khua gĭt gai dŭm Phŭn, dhar bruă, alŭ wăl, dŭm knơ̆ng bruă bi klă hluê ngă dŭm hdră kñăm, dŭm hdră yuôm bhăn mơ̆ng lăn čar hŏng klei tŭ dưn, djŏ hdră kčah, mta kñăm, mdưm boh kdrŭt čiăng ngă bruă bi mrâo mrang lăn čar.