VOV4.Êđê- Ti sang bruă kƀĭn ala, k’iăng Khua bruă kƀĭn ala Trần Thanh Mẫn tŭ drông leh pô bi ala mơ̆ng Khua mil čhil Mi kơ klei mlih yan adiê John Kerry, dôk mâo klei hriê čuă leh anăn mă bruă ti ala čar Việt Nam. K’iăng Khua bruă kƀĭn ala Trần Thanh Mẫn mñă klă: Jing sa hlăm dŭm ala čar tŭ klei hmăi kjham hĭn mơ̆ng klei mlih yan adiê, boh nik jing krĭng dăp mnai krông Cửu Long, kyuanăn Việt Nam bi klă bruă bi mdrơ̆ng hŏng klei mlih yan adiê jing bruă klam kñăm. Hlăm hruê mmông kơ anăp, bruă kƀĭn ala Việt Nam srăng lŏ hrăm mbĭt hŏng knŭk kna mkŏ mjing leh anăn bi kluôm ênŭm dŭm tur knơ̆ng kñăm mtrŭt mđĭ klei di kyar pui kmlă doh msĕ si pui kmlă êran hŏng ai angĭn, pil yang hruê, mkra mlih dŭm mta knăm hlăm klei đĭ kyar mtah, hmăng hmưi Mi lŏ mđĭ hĭn bruă đru brei ngăn prăk, kdrăp mrâo mrang, bruă mkŏ mkra, mtô mjuăt mnuih mă bruă leh anăn klei thâo ngă bruă čiăng kơ Việt Nam dưi tui ngă ênŭm klei ƀuăn rơ̆ng hlăm COP26.

Pô mblang: Y-Ƀel Êban