VOV4.Êđê - Tlam 8/2, nao čhưn, hơêč hmưi Tết leh anăn mă bruă hlăm Phŭn bruă sang hră mtô bi hriăm, Khua hlăm Phŭn bruă kči čar, K’iăng Khua Bruă kƀĭn ala Trần Thanh Mẫn mtă hlăm wưng kơ anăp mđing hĭn kơ bruă mtô bi hriăm knhuah hdĭp, klei mĭn mbruă, jing bi hriăm ai tiê thâo khăp kơ lăn čar, ktưn hưn, mpŭ djuê ana… kơrŭ wĭt mđĭ kyar lăn čar mdrŏng sah, jăk mơak. Lač kơ klei êdu kƀah hlăm anăn mâo dua bruă dưi mđing dlăng jing mlih mrâo kluôm ênŭm bruă mtô bi hriăm leh anăn rơ̆ng hnơ̆ng jăk mtô leh anăn hriăm hlăm boh klei ruă Covid-19, Trần Thanh Mẫn mtă, bruă sang hră brei ksiêm hriăm bi jăk dŭm mta phŭn ba klei amâo jăk, mâo hdră msir ti anăp, sui, klă klơ̆ng čiăng msir mgaih. Mbĭt anăn mtă, Dhar bruă dhar kreh - mtô bi hriăm leh anăn Phŭn bruă sang hră mtô bi hriăm brei bi hgŭm nanao, tŭ dưn, čiăng hmao msir mgaih dŭm bruă mâo hlăm klei hdĭp; brei bi mguôp tliêr kjăp klei mtô bi hriăm hŏng klei ksiêm hriăm, pŏk ngă, ba yua dŭm klei tŭ dưn kreh knhâo leh anăn kdrăp mrâo; hluê ngă klei mtô bi hriăm hluê si klei čiăng kơ mnuih mă bruă.

 H’Zawut pô mblang