Tết truh, ti lăn hang, grăp boh sang bi kuh kŭm ênŭm ênap djiêô hlao êsei, phung hlăm gŏ sang bi yơr kčok kpiê hơêč hmưi sa yan mnga êbâo klei jăk mơak. Bi ti dŭm anôk hlăm plao ksĭ ti plao ksĭ Trường Sa, knuă druh, lĭng kahan hrăm mbĭt hlăm ai êwa mơak mñai drông yan mnga, kwang asăp mmuiñ drông thŭn Giáp Thìn 2024.

Tết ti Trường Sa amâo mâo kpiê, ƀiêr, amâo mâo hăt, amâo mâo phao briêng ôh ƀiădah jăk mơak nanao leh anăn hơuh mđao kyua klei khăp kahan hŏng mnuih ƀuôn sang kjăp hĭn. Kdrêč dưi čang hmăng hĭn hlăm mlam drông yan mnga mrâo ti krĭng plao ksĭ taih kbưi jing hdră mjĕ êrô dhar kreh plah wah knuă druh, lĭng kahan leh anăn mnuih ƀuôn sang. Hlăm wăl anôk kƀĭn hơuh mđao, grăp čô kwang asăp mmuiñ bi hgŭm, bi êdah klei gĭr răng mgang klei dưi plao ksĭ yuôm bhăn mơ̆ng čar kwar. Trung Tá Đặng Văn Tài, pô ngă bruă kđi čar ti plao ksĭ Song Tử Tây brei thâo. Thŭn anei jing thŭn tal 2 ñu drông tết ti plao ksĭ. Wăt tơdah kbưi hŏng gŏ sang, ƀiădah grăp blư̆ drông Tết ti plao ksĭ ăt jing klei ktưn hưn leh anăn dưi dlăng amâo dưi wơr.

Tết ti plao ksĭ hơuh mđao mơ̆ng lăn hang mơĭt, mâo ana boh kruê̆, mnga sung gơr, điŏ. Anei jing klei khăp plah wah mnuih ƀuôn sang, phung anak čô, gŏ sang hlăm lăn hang hŏng lĭng kahan ti plao ksĭ. Anei jing klei mguôp kjăp čiăng mđĭ ai bi kah mbha hŏng knuă druh lĭng kahan êngao plao ksĭ djă phao răng mgăng kjăp klei dưi hlăm êa ksĭ, plao ksĭ, krĭng lăn yuôm bhăn mơ̆ng čar kwar.

Hŏng lĭng kahan mda asei tal êlâo drông Tết kbưi hŏng sang jing sa klei dleh wơr. Hlăm hdră nao ti plao ksĭ mơ̆ng grăp čô kahan jing rup ƀuôn sang, amĭ ama, găp djuê. Anăn jing boh kdrŭt thiăm ai ktang đru kơ lĭng kahan kjăp hĭn hŏng bruă klam ti plao ksĭ taih kbưi. Lĭng kahan Hà Quang Huy (ƀuôn sang ti Khánh Hòa) brei thâo: Gưl tal êlâo drông Tết ti plao ksĭ mgei ai tiê snăk. Ƀiădah phung mda asei brei dưi hriăm mjuăt leh anăn Huy bŏ hŏng ktưn hưn kơ klei anăn.

Ăt hnĭng mơh ƀiădah kyua bruă klam pô gĭr bi leh. Kâo čang hmăng mơĭt kơ amĭ ama hŏng găp leh anăn ayŏng amai ti sang jing amĭ ama đăm rŭng răng ôh kyua tinei mâo gưl dlông leh anăn khua kiă kriê hŏng ƀĭng kahan đru jăk snăk. Kâo čang hmăng amĭ ama hơĭt ai tiê leh dua thŭn nao kahan, ngă jăk bruă klam mơ̆ng kahan snăn kâo srăng wĭt hŏng amĭ ama.

Bi lĭng kahan Nguyễn Hữu Em, ƀuôn sang ti Khánh Hòa brei thâo wăt tơdah kbưi hŏng pưk sang ăt hnĭng kơ găp djuê ƀiădah anei jing Tết mâo lu klei bi hdơr hlăm klei hdĭp pô.

Kâo ƀuh mmông anei ăt mâo mơh klei ênguôt ƀiădah mâo ayŏng adei hrăm mbĭt hlăk drông Têt kbưi hŏng sang. Hŏng ayŏng adei đŭng điŏ, čŭt mnga ktiăm. Êlâo dih mâo phung hlăm sang mprăp ƀiădah amâo ngă ôh, bi ară anei ngă hŏng ayŏng adei mơak snăk. Kâo hơêč hmưi kơ amĭ ama suaih pral, êđăp ênang, tơdah hnĭng kơ kâo snăn amâo dih nei ôh, tinei drông Tết hŏng ayŏng adei ăt mơak mơh, đăm rŭng răng kơ kâo ôh. Hơêč hmưi kơ amĭ ama drông Tết hơ̆k mơak, drông sa thŭn mrâo jăk mơak.

Ayŏng Cao Văn Giáp, K’iăng Khua Sang čư̆ êa să Song Tử Tây brei thâo: lĭng kahan leh anăn mnuih ƀuôn sang ti plao ksĭ khăng drông Tết hnưm, tơdah dŭm gưl hô̆ pui ba mnơ̆ng dhơ̆ng mơ̆ng lăn hang mâo hla êdru, braih điŏ, mnga ktiăm, mnga sung gơr leh anăn wăt hbŭ ana boh kruê̆ mtah siam… Bi mlam drông yan mnga mrâo, ti plao ksĭ ăt mơak mơh, lĭng kahan hŏng mnuih ƀuôn sang bi tuôm hơ̆k mơak, bi mă kiê kngan, blŭ tlao hao hao hơêč hmưi sa thŭn mrâo lu klei suaih pral leh anăn tŭ jing.

Tinei phung ayŏng lĭng kahan hŏng mnuih ƀuôn sang ăt jing găp djuê pô leh anăn kâo ăt jing găp djuê diñu. Ai êwa Tết ăt msĕ si kluôm ala mơh, amâo kƀah ôh, mâo điŏ, mnga ktiăm, mnga sung gơr. Ti sang mlan drông yan mng mrâo ênŭm ênap, bi hmei nao hơêč hmưi Tết kơ anôk bruă, bi blŭ tlao, mđĭ ai tiê. Mâo tăp năng mgei ai tiê hlŏng bi hia jih jang lač hnĭng kơ amĭ.

Gŏ sang, amĭ ama, mô̆ anak, găp djuê jing phung nah tluôn kjăp ktang. Hŏng phung êkei mrâo mŭt kahan snăn mơh leh anăn hŏng phung khua kahan siă suôr êbeh pluh thŭn hơô ao kahan ăt snăn mơh. Thượng Tá Nguyễn Văn Khương, sa čô ngă bruă kđi čar ti plao ksĭ Song Tử Tây ktưn hưn: Ƀuôn sang jing anôk knang kjăp ktang čiăng kơ grăp čô kahan ti plao ksĭ taih kbưi mđing truh:

Êngao kơ asăp hơêc hmưi Tết, êngao kơ mnơ̆ng dhơ̆ng snăn lŏ mâo mnơ̆ng yuôm bhăn hĭn jing hră kâo čih kơ mô̆ anak, tơdah dlăng hră anăn srăng thâo kơ ai êwa drông Tết mơ̆ng ung ti plao ksĭ taih kbưi, ama tơdah ƀơ̆ng Tết kbưi hŏng sang, thâo kơ ai tiê klei mĭn ama diñu.

       Ayŏng Khương ăt msĕ hŏng ƀĭng kahan pô thâo săng, ai tiê klei mĭn grăp čô kahan mđing kơ sang, mâo klei hnĭng kơ mô̆, kơ anak, kơ ƀuôn sang ƀiădah jih jang kyua bruă klam răng mgang čar kwar. Kyua čar kwar hlăm ai tiê mnuih Việt Nam jing anôk hơuh mđao, jing ama, jing amĭ, jing drei pô. Kyua anăn, Tết hŏng phung lĭng kahan ti krĭng plao ksĭ jing klei ktưn hưn, hlăk djă phao răng mgang klei êđăp ênang kơ krĭng êa ksĭ, wăl adiê čar Kwar, kơ klei êđăp ênang mơ̆ng yan mnga ƀuôn sang Việt Nam./.