Ti anôk bruă Đảng gưl dlông Trương Thị Mai,  Khua anôk bruă mkŏ mjing gưl dlông kiă kriê leh klei bi kƀĭn plah wah êpul bi ala Đảng drei hŏng êpul bi ala krŭ kdơ̆ng (CCM) păn bruă ti Tanzania mâo Áp-đun-ra-ma Ô-ma Ki-na-na, K’iăng khua kiă kriê Đảng CCM djă akŏ.

 Trương Thị Mai mñă Việt Nam hơ̆k mơak ƀuh klei tŭ dưn Tanzania mâo leh ti gŭ klei Đảng CCM kiă kriê hlăm bruă mđĭ kyar klei duh mkra, bi hrŏ klei ƀun ƀin, mâo leh lu klei bi mguôp hlăm bruă rŭ mdơ̆ng alŭ wăl nah ngŏ Afrĭk êđăp ênang, hơĭt kjăp. Hŏng ai êwa bi hgŭm mbĭt, Dua nah mâo leh klei bi tŭ ư hyuă kjăp hĭn klei bi mguôp dua đảng, mjing atur kjăp kơ bruă kđi čar kjăp mtrŭt mđĭ klei bi mguôp dua nah. Khua gĭt gai dua đảng bi tŭ ư mđĭ hĭn klei bi trông lehanăn bi mjĕ êrô phung khua kiă kriê, klei hgŭm mjuăt bi hriăm phung knuă druh mnuih ngă bruă, mjing klei găl kơ jih jang klei duh mkra mnia mblei, klei duh bi liê mtrŭt klei bi hgŭm, bi mguôp mnuih ƀuôn sang, kyua klei tŭ dưn kơ grăp đảng, grăp lăn čar, kyua klei hnŭk ênang, hơĭt kjăp lehanăn đĭ kyar./.