VOV4.Êđê -  Hruê 21/7, ti Anôk bruă Đảng gưl dlông, Trương Thị Mai, Khua hlăm Phŭn bruă kđi čar, Khua hlăm bruă Đảng gưl dlông, Khua Anôk bruă mkŏ mjing gưl dlông, Khua Êpul hgŭm bi mjĕ Việt Nam-Japon drông leh Khua Êpul hgŭm kriê dlăng Knơ̆ng prăk bi hgŭm hŏng lu ala čar Japon (JBIC) Ma-ê-đa Ta-đa-si. Ti mmông drông, Trương Thị Mai mñă klă, Việt Nam dôk pŏk ngă Hdră mtrŭn Klei bi kƀĭn tal XIII mơ̆ng Đảng, gĭr čiăng mâo hdră kñăm jing ala čar đĭ kyar hlăm krah êtuh thŭn 21, bi mklă klei mĭn hlue ngă hdră êlan hŏng tač êngao, êngiê, êđăp ênang, bi hgŭm leh anăn mđĭ kyar, lu tĭng klei bi hgŭm, hlăm anăn dlăng myuôm klei bi hgŭm hdră bruă hŏng Japon. Trương Thị Mai mtă JBIC lŏ dơ̆ng mđĭ lar klei bhiăn bi hgŭm plah wah JBIC hŏng dŭm anôk bruă Việt Nam, mđĭ klei bi hgŭm hŏng dŭm anôk bruă Knŭk kna Việt Nam, mbĭt anăn ksiêm hriăm pŏk mlar ênoh čan kơ dŭm anôk bruă duh mkra Việt Nam amâodah dŭm anôk bruă duh mkra bi hgŭm Japon-Việt nam hrăm mbĭt duh bi liê ti Việt Nam./.

H’Zawut pô mblang