Hră klei mrâo Nhân Dân knhal jih hruê kăm (Anăn tal êlâo jing Nhân Dân knăm kjuh) jing hră klei mrâo knhal jih hruê kăm tal êlâo mơ̆ng hră klei mrâo cách mạng Việt Nam. Hlăm boh 35 thŭn êgao, hră klei mrâo kjăp nanao hŏng klei mĭn, hnơ̆ng kčah mơ̆ng sa hră klei mrâo Đảng mbĭt hŏng klei mkra mlih hdră hâo hưn mtô mblang čiăng amâo mdei bi leh hdră mđĭ kyar, mjing knhuah mngač, bi mklă kjăp hŏng êlan nao djŏ klă, tŭ dưn…

Čih yap bi mni klei tŭ dưn leh 35 thŭn êgao mơ̆ng hră klei mrâo Nhân Dân knhal jih hruê kăm, Trương Thị Mai mtă hlăm wưng kơ anăp, hŏng bruă klam yuôm bhăn, hră klei mrâo Nhân Dân brei lŏ dơ̆ng gĭr ktưn ba anăp hlăm bruă hâo hưn mtô mblang hdră êlan mơ̆ng Đảng, lač kơ klei mâo jăk siam, kơrŭ wĭt ai tiê khăp kơ ala čar, ai ktang bi hgŭm, đru mkŏ mjing lăn čar mdrŏng sah jăk mơak, mđĭ rup kơhưm Việt Nam hlăm dlông rŏng lăn.