VOV4.Êđê - Ti anăp klei mgei lăn mâo nanao ti kdriêk Kon Plông, čar Kon Tum, K’iăng Khua knŭk kna Lê Văn Thành jao leh kơ Phŭn bruă kreh knhâo leh anăn kdrăp mrâo gĭt gai mkŏ mjing ksiêm dlăng mta phŭn, hnơ̆ng leh anăn klei hmaĭ leh anăn hưn mdah čiăng kơ bruă sang čư̆ êa, mnuih ƀuôn sang thâo pral mdrơ̆ng, ñĕ kơ klei mnuih ƀuôn sang rŭng răng. Hlăm hruê kăm, Anôk bruă gĭt gai ala čar kơ hdră gang mkhư̆ klei yan adiê ngă mkŏ mjing Êpul mă bruă nao ti Kon Tum ksiêm dlăng boh sĭt, mbĭt anăn pŏk ngă bruă bi hgŭm hlăm hdră mdrơ̆ng hŏng klei mgei lăn.

Êpul ngă bruă mơ̆ng êpul gĭt gai ala čar kơ bruă mdrơ̆ng hŏng klei truh yan adiê nao ksiêm dlăng leh ti sang măi leh anăn alŭ wăl ênao êa, knơ̆ng bi êran pui kmlă hŏng ai êa Kon Tum ti alŭ wăl 2 să Ngọc Tem leh anăn Đăk Tăng, kdriêk Kon Plông. Hŏng hnơ̆ng mkra mjing 220MW, hnơ̆ng kdơ̆ng êa truh kơ 145 êklăk m³ êa, knơ̆ng bi êran pui kmlă hŏng ai êa Kon Tum dôk dưi yap jing sa hlăm dŭm mta phŭn djŏ tuôm hŏng dŭm klei ktư̆ mgei lăn giăm anei ti alŭ wăl anei.

Hưn mdah hŏng êpul ngă bruă, Trần Công Đoàn, khua kiă kriê knơ̆ng bruă bi êran hŏng pui kmlă Kon Tum, knơ̆ng bi êran pui mkra anei mkra mjing dưi bi kdơ̆ng hŏng klei ktư̆ mgei lăn gưl 7. Hruê 26/2/2020 knơ̆ng anei kčưm ngă klei kdơ̆ng êa, truh kơ hruê 20/11 thŭn 2020 dưi bi kdơ̆ng bŏ êa.

Leh giăm sa thŭn truh kơ hruê 08/02/2021, sang măi kčưm čih yap mâo dŭm klei mgei lăn. Hlăm brô mơ̆ng mlan 2 truh kơ mlan 5 thŭn 2021 mâo lu klei mgei lăn leh anăn ƀiă ƀrư̆ ƀrư̆ ti mlan 6, amâo lŏ mâo ôh ti mlan 7 leh anăn mlan 8, truh kơ knhal krah mlan 9 lŏ wĭt mâo klei mgei lăn leh anăn mâo lu blư̆ hĭn ti mlan 3 leh anăn mlan 4/2022.

Knŏng ti hruê 18/4 mrâo êgao mâo klei ktư̆ mgei lăn prŏng hĭn mơ̆ng êlâo truh kơ ară anei hŏng hnơ̆ng 4,5^o Richter. Hlăm mmông klei ktư̆ mgei lăn anăn, ênao êa dôk mâo 106 êklăk m³ êa, msăt klei mgei lăn dôk ti alŭ wăl să Hiếu leh anăn să Pơ Ê, kdriêk Kon Plông, kbưi hŏng sang măi kơ dlông 14 km leh anăn kbưi hŏng ênao êa 25km, Trần Công Đoàn ăt mâo klei bi klă sơnei “Hlăm klei ksiêm dlăng boh sĭt, dŭm gưl klei mgei lăn anei amâo djŏ kyua hnơ̆ng êa hlăm ênao ôh, knơ̆ng bruă bi mguôp leh hŏng anôk bruă vật lý boh lăn mdưm 3 anôk mkă dlăng jŭm dar knơ̆ng bi êran pui kmă hŏng ai êa Kon Tum čiăng mkă dlăng hnơ̆ng mgei lăn. Leh dŭm gưl ktư̆ mgei lăn, knơ̆ng bruă ăt mkŏ mjing bruă ksiêm dlăng ƀiădah ăt dôk jăk sơăi”.

Hluê si klei blŭ mơ̆ng pô bi ala phŭn bruă tuh tia, phŭn bruă mkrŏ mkra, knơ̆ng bruă pui kmlă Việt Nam, knơ̆ng bruă bi êran pui kmlă hŏng ai êa Vĩnh Sơn-Krông Hing leh anăn phung thơ̆ng kơ bruă nao mbĭt hŏng êpul ngă bruă mâo sơăi klei msĕ, anăn jing bruă bi klă phŭn agha ngă truh klei ktư̆ mgei lăn čiăng mâo klei tui duah mtam, ƀiădah srăng mâo klei răng hluê si tur knơ̆ng klei kreh knhâo. Ti anăp, knơ̆ng bruă bi êran pui kmlă hŏng ai êa Kon Tum srăng bi mguôp hŏng anôk bruă vật lý boh lăn čih yap, ksiêm duah, lŏ mdưm thiăm dŭm anôk mkă dlăng. Bi kơ 3 anôk mkă dlăng mâo leh čiăng ngă bruă mkŏ hŏng anôk bruă čiăng hmao mâo klei hâo hưn leh anăn hưn djŏ. Bruă sang čư êa kdriêk Kon Plong leh anăn čar Kon Tum čiăng mâo dŭm hdră êlan  mdrơ̆ng hŏng djăp klei truh mjêč. Bruă kdơ̆ng êa hlăm ênao êa knơ̆ng bi êran pui kmlă hŏng ai êa Kon Tum hlăm wưng kơ anăp čiăng mâo klei tĭng mkă jăk… Nguyễn Đức Quang, khua kiă kriê anôk bruă bi mdrơ̆ng leh anăn mgiah msir klei truh yan adiê, k’iăng khua adŭ bruă êpul gĭt gai mơ̆ng ala čar kơ bruă bi mdrơ̆ng hŏng klei truh yan adiê, khua êpul ngă bruă brei thâo: “Ka mâo ôh klei bi klă kơ klei ktư̆ mgei lăn jing mơ̆ng ênao êa knơ̆ng bi êran pui kmlă hŏng ai êa amâodah knơ̆ng mkăp êa, ƀiădah srăng ƀuh hlăm dŭm klei čih yap kơ klei đĭ hlăm dŭm blư̆ leh anăn boh prŏng giăm anei ñu mâo klei bi djŏ hŏng hruê mmông kdơ̆ng êa hlăm ênao êa knơ̆ng bi êran pui kmlă hŏng ai êa Kon Tum, anei jing sa boh klei drei čiăng mâo klei mkă dlăng leh anăn ksiêm duah. Hlăm anăn dŭm hdră êlan ti anăp leh anăn wăt kơ êdei dih, ăt brei ƀuh drei dôk mâo sa anôk huâng hlăm hdră êlan mdrơ̆ng hŏng klei truh yan adiê anăn jing klei mgei lăn. Khădah hlăm hdră mtrŭn mâo leh, klei mtô mâo leh mơh, bi klă jing drei srăng mâo klei čŏng ngă, amâo luč klei răng”.

Ti hruê mă bruă tal êlâo hĭn hlăm anôk mgei lăn ti kdriêk Kon Plông, čar Kon Tum. Êpul ngă bruă mơ̆ng êpul gĭt gai ala čar kơ bruă mdrơ̆ng hŏng klei truh yan adiê ăt mâo klei nao ksiêm dlăng, bi klă boh sĭt ti alŭ wăl ênao êa knơ̆ng bi êran pui kmlă hŏng ai êa Kon Tum ti să Đăk Tăng leh anăn Đăk Ring. Aguah hruê 21/4, êpul srăng mâo mmông mă bruă hŏng êpul gĭt gai bruă gang mkhư̆ klei truh yan adiê leh anăn tui duah, đru dŏng čar Kon Tum.

Ăt hlăm hruê kăm, adŭ bruă knŭk kna mâo leh hră mơar hưn mdah klei gĭt gai mơ̆ng k’iăng Khua knŭk kna Lê Văn Thành kơ bruă mgaih msir klei ktư̆ mgei lăn ti alŭ wăl kdriêk Kon Plông, čar Kon Tum. Hluê anăn k’iăng Khua knŭk kna Lê Văn Thành jao kơ anôk bruă ksiêm duah klei kreh knhâo, mrâo mrang Việt Nam gĭt gai kơ anôk bruă vật lý boh lăn lŏ dơ̆ng ngă bruă mkă dlăng, ksiêm dlăng klei ktư̆ mgei lăn ti alŭ wăl mrâo lač, hmao hưn mdah hŏng dŭm anôk bruă leh anăn mnuih ƀuôn sang dưi thâo čiăng mâo hdră mdrơ̆ng djŏ guôp.

Dŭm phŭn bruă: Phŭn bruă tuh tia, phŭn bruă lŏ hma leh anăn mđĭ kyar krĭng ƀuôn sang, phŭn bruă êlan klông gĭt gai ktuê dlăng, čih yap, čŏng hluê ngă dŭm hdră êlan rơ̆ng klei êđăp ênang ênao êa knơ̆ng bi êran pui kmklă, knơ̆ng mkăp êa leh anăn bruă mkŏ mkra hlăm alŭ wăl dưi mdrơ̆ng hŏng klei hmăi mơ̆ng klei mgei lăn, amâo lui mâo klei truh kdjăt ñhăr, luč klei êđăp ênang.