Mkŏ mjing hlăm thŭn 2021 mơ̆ng phung mda asei. Anôk bruă mnia mblei Epis, kdriêk Mdrak, čar Dak Lak, čhĭ dŭm mta mnơ̆ng bi msiam ƀô̆ mta mâo mkra mơ̆ng dŭm mta mnơ̆ng jăk mâo ti alŭ wăl. Thâo klei găl mơ̆ng bruă ba yua kdrăp mrô, lu phung hđeh hưn mthâo hŏng mnuih blei yua hluê êlan hla pŏk web yang ƀuôn lehanăn bi mklă mnơ̆ng dhơ̆ng hlăm anôk mnia mblei điện tử. Amai  Lê Thị Hồng Thơm, K’iăng khua anôk bruă brei thâo, ară anei mnơ̆ng dhơ̆ng ti anôk bruă mâo leh hlăm wăl anôk mnia mblei điện tử mâo lu mnuih thâo msĕ si hlăm: Shoppee, tiki, lazada, tiktokshop… Klei anei đru kơ anôk bruă duh mkra bi hrŏ ênoh bi liê hlăm bruă hưn mthâo mnơ̆ng dhơ̆ng.

“Jing sa anôk bruă duh mkra mphŭn čô̆ kơ bruă kyua anăn ăt dôk lu klei êdu kƀah kơ prăk kăk snăn hdră mnia mblei hlăm wăl anôk blei mnia điện tử lehanăn Internet jing sa klei găl lehanăn đru kơ hmei mkiêt mkriêm lu prăk bi liê hlăm lu mta bruă djŏ tuôm.

Ăt ruah hdră pŏk mlar wăl anôk mnia mblei mơ̆ng dŭm klei jăk găl hlăm wăl anôk blei mnia điện tử. Anôk bruă mnia mblei Kim Long, ti kdriêk Krông Ƀŭk, čar Dak Lak pral mâo leh mnuih blei ti lu čar, ƀuôn prŏng hlăm kluôm ala. Đỗ Ngọc Anh, bi ala anôk bruă duh mkra brei thâo:

“Mnơ̆ng mơ̆ng anôk bruă pô jing mnơ̆ng mrâo, kyua anăn ruah hdră mnia mblei hlăm online jing phŭn. Hdră anei mâo êbeh 50% ênoh prăk bi mnia mblei mnơ̆ng dhơ̆ng, kbiă hriê mơ̆ng websize čhĭ mnơ̆ng. Kyua anăn, bruă ba yua websize lehanăn dŭm hdră mnia mblei online mkăn hlăm bruă čhĭ mnơ̆ng jing sa kdrêč yuôm bhăn hlăm hdră mbnia mblei mơ̆ng dŭm anôk bruă duh mkra pô”.

Hluê si Hoàng Minh Ngọc Hải, Khua Anôk bruă bi hgŭm lehanăn bi mlih mrô hlăm Êpul hgŭm Anôk bruă duh mkra čar Dak Lak, mrô ksiêm yap ară anei, mâo 70% ênoh mnuih Việt Nam ba yua Internet lehanăn mâo lu jing phung mda asei. Blei mprăp hlăm êlan online hlăk jing klei mưng mơ̆ng lu mnuih blei yua. Anôk bruă duh mkra dưi mâo lu mnuih blei yua hluê hdră anei. Êpul hgŭm mâo leh lu hdră msir đru kơ anôk bruă duh mkra Dak Lak bi hgŭm hrui blei mnơ̆ng dhơ̆ng, boh nik mnơ̆ng lŏ hma alŭ wăl hlăm wăl anôk mnia mblei online. Hoàng Minh Ngọc Hải brei thâo:

“Hmei pŏk mlar lehanăn bi hgŭm hŏng 28 ƀĭng hgŭm bruă kdrăp mrâo čiăng mkŏ mjing sa wăl anôk jăk, bi ktưn kñăm đru kơ anôk bruă duh mkra dưi mâo hdră msir jăk hĭn. Dŭm hdră msir mrâo anei dưi bi mklă leh klei hgăm lehanăn tŭ dưn. Tơdah anôk bruă duh mkra hrăm mbĭt hŏng dŭm êpul êya mâo klei thâo ăt msĕ mơh iêu mthưr bi mlih klei thâo săng ƀrư̆ ƀrư̆, kâo đăo knang anôk bruă duh mkra srăng dưi msir mghaih jih klei kpăk đuôm hlăm wăl anôk mnia mblei điện tử lehanăn ba wĭt boh tŭ dưn hlăm wăl anôk mnia mblei mrô, kdrăp mrâo anei”./.