VOV4.Êđê - Tlam mbruê 8/6, Khua knŭk kna Phạm Minh Chính tŭ drông leh khua phŭn bruă lĭng kahan India Rajnath Singh dôk hriê čuă ala čar Việt Nam. Hlăm mmông tŭ drông, Khua knŭk kna mñă klă, Đảng, knŭk kna leh anăn mnuih ƀuôn sang Việt Nam yap yuôm bhăn leh anăn hmăng hmưi mtrŭt mđĭ klei mjĕ giăm ƀĭng hgŭm, knhuah gru, bi mguôp hdră êlan kluôm ênŭm Việt Nam – India hluê si tur knơ̆ng dŭm klei bi mguôp hƀuê ênuk leh anăn dhar kreh mơ̆ng đưm, dŭm klei yuôm bhăn leh anăn klei tŭ msĕ, klei đăo knang leh anăn thâo săng hdơ̆ng pô, ăt msĕ hŏng dŭm klei ƀuăn rơ̆ng mbĭt hŏng klei bhiăn tar rŏng lăn.

Hlăm klei bi tuôm, 2 tĭng bi trông kơ dŭm boh klei hlăm alŭ wăl leh anăn tar rŏng lăn 2 tĭng dôk mđing, tŭ ư mđĭ hĭn klei ksiêm êmuh, bi mguôp hlăm dŭm klei kƀĭn lu tĭng, bi mguôp nao hgŭm rang mgang klei êđăp ênang hŏng Êpul hgŭm lu ala čar, mtrŭt mđĭ klei mjĕ giăm ASEAN – India, mñă klă bruă klam jing mta kñam mơ̆ng ASEAN hlăm klei êđăp ênang alŭ wăl. Dua tĭng ăt bi kah mbha klei mĭn kơ klei yuôm bhăn hlăm bruă rơ̆ng klei êđăp ênang, hơĭt kjăp, klei êngiê dŭ mdiăng êlan êa leh anăn êlan êdeh phiơr ti êa ksĭ Ngŏ, mgaih msir klei amâo thâo bi djŏ hŏng dŭm hdră êđăp ênang hluê si klei bhiăn tar rŏng lăn.

Y-Ƀel pô mblang