Tlam mbrue 29/5, ti ƀuôn prŏng Hồ Chí Minh, knơ̆ng bruă sang čư̆ êa dua boh čar Hậu Giang, Bình Định, knơ̆ng bruă sang čư̆ êa ƀuôn prŏng Thủ Đức lehanăn Êpul hgŭm bruă hla pŏk ƀuôn prŏng Hồ Chí Minh (HCA) mâo leh klei bi kƀĭn hŏng bruă klei mrâo hrue kăm NASA ti Việt Nam- Vietnam Space Week.  Tui si êpul hgŭm  bruă hla pŏk ƀuôn prŏng Hồ Chí Minh, Anei jing gưl tal êlâo hrue kăm NASA mâo mkŏ mjing ti ala čar Ngŏ Dhŭng Asi.  

NASA jing anôk bruăksiêm duah kơ wăl adiê  knŭk kna Mi, mâo mkŏ mjing mơ̆ng hlăk thŭn 1958, ksiêm hlăm êngĭt adiê kơ bruă siwil lehanăn klei ksiêm duah kơ bruă êdeh phiơr. Hrue kăm NASA ti Việt Nam- Vietnam Space Week srăng mkŏ mjing ti 3 anôk anăn jing: ƀuôn prŏng Vị Thanh, čar Hậu Giang hlăm hrue 5/6 lehanăn 6/6; ƀuôn prŏng Thủ Đức, hlăm ƀuôn prŏng Hồ Chí Minh hlăm hrue 7/6; ƀuôn prŏng Quy Nhơn, čar Bình Định hlăm hrue 8/6 lehanăn 9/6/2023. Hrue kăm NASA ti Việt Nam rang mdah lu mta bruă mơ̆ng NASA kơbruăksiêm duah leh hlăm êngĭt adiê. Bruă ngă anei kñăm mđĭai kơphung hđeh gưl mrâo hŏng jih jang bruă ngă mơ̆ng phung đĭ hiu hlăm êngĭt adiê. Lehanăn yăl dliê kơ bruă kreh knhâo mâo ksiêm duah leh kñăm răng mgang boh lăn, bi hrŏ klei čhŏ djhan wăl hdĭp mda./.