Hlăm dŭm hrue êgao, mơ̆ng klei Khua gĭt gai Đảng Nguyễn Phú Trọng djiê, phung khua kiă kriê dŭm ala čar, lehanăn êpul bruă mơ̆ng 103 ala čar lehanăn krĭng lăn, mbĭt hŏng 32 êpul bruă mơ̆ng ala tač êngao mơĭt leh giăm 500 pŏk hră, asăp bi juh truh kơ êpul khua kiă kriê bruă Đảng Cộng sản Việt Nam, Khua lăn čar Tô Lâm, Khua knŭk kna Phạm Minh Chính, Khua bruă kƀĭn ala Trần Thanh Mẫn, Khua kiă kriê êpul gĭt gai bruă Đảng gưl dlông Lương Cường, lehanăn phung khua prŏng mkăn, mbĭt hŏng mnuih ƀuôn sang Việt Nam lehanăn găp djuê khua gĭt gai Đảng Nguyễn Phú Trọng. 100 êpul mơ̆ng ala tač êngao hriê čang ênuh, lehanăn mơĭt mnga bi juh truh hŏng Việt Nam lehanăn êbeh 3.500 êpul nao čang ti anôk bruă bi ala knŭk kna Việt Nam ti lu ala čar dlông rŏng lăn.

Hlăm hră mơĭt, klei bi juh phung khua kiă kriê dŭm ala čar, êpul bruă, dŭm đảng mah jiăng ala tač êngao bi êdah ai tiê klei khăp hŏng khua gĭt gai Đảng Nguyễn Phú Trọng, mpŭ kơ khua gĭt gai Đảng mâo đru leh hlăm bruă mđĭ kyar Việt Nam lehanăn klei Việt Nam bi mguôp hŏng dŭm ala čar, bi êdah klei čiăng bi hgŭm lu hĭn hŏng Việt Nam hlăm djăp mta bruă. Mpŭ kơ klei thâo bi mguôp, klei thâo bi đru hŏng dŭm ala čar hgŭm hŏng dŭm đảng lehanăn mah jiăng ala tač êngao, Phung khua kiă kriê Đảng, knŭk kna ala čar drei mâo leh hră čih lač jăk kơ ai tiê klei khăp prŏng prĭn   lehanăn klei mđĭ ai bi juh kơ Đảng, Knŭk kna, mnuih ƀuôn sang Việt Nam lehanăn găp djuê Khua gĭt gai Đảng Nguyễn Phú Trọng. Phung khua kiă kriê ala čar drei čang hmăng mđram mbĭt hŏng dŭm ala čar mâo nanao klei thâo bi mguôp, mđĭ kyar êlam hĭn hlăm jih jang klei ba wĭt klei tŭ dưn kơ mnuih ƀuôn sang kơ grăp ala čar, bi mguôp kơ klei êđăp ênang hgŭm mbĭt mđĭ kyar mdrŏng sah hlăm alŭ wăl lehanăn tar rŏng lăn./.