VOV4.Êđê - Lŏ dơ̆ng hdră gưl nao čhưn leh anăn mă bruă ti Mi, Khua knŭk kna Phạm Minh Chính bi tuôm leh hŏng John McAuliff, sa čô ƀĭng găp sui thŭn, siă suôr hŏng Việt Nam leh anăn bi ala kơ phung Mi nao ai hŏng phung djŏ êa drao ruă đioxin ti Việt Nam.

Hlăm mmông drông, Khua knŭk kna brei thâo sa hlăm dŭm hdră kñăm mơ̆ng gưl nao čhưn ti Mi jing đru mđĭ kyar msir mgaih boh jhat mơ̆ng klei blah ngă. Hlăm wưng êgao, hlăm ai tiê “lăm lui klei leh êgao, mđing truh kơ êdei anăp”, Việt Nam leh anăn Mĭ lŏ dơ̆ng mđĭ dŭm hdră msir tŭ dưn, sĭt hĭn čiăng lăm jih klei ênguôt hnĭng mơ̆ng klei blah ngă. Khua knŭk kna mni lač jăk kơ John McAuliff leh anăn phung ƀĭng găp kơ klei ñu gĭr ktưn hŏng bruă hŏng tač êngao mnuih ƀuôn sang Việt Nam hlăm êbeh 50 thŭn êgao, đru msir mgaih boh jhat mơ̆ng klei bi blah ti Việt Nam; boh nik brei leh lu klei khăp, jih ai tiê, hruê mmông đru kơ phung djŏ êa drao đioxin./.

 H’Zawut pô mblang