Anôk kriê dlăng bruă Đảng Cộng sản Việt Nam gưl dlông, Anôk bruă kƀĭn ala mơ̆ng Ala čar Việt Nam, Khua lăn čar Việt Nam yang ƀuôn ngă phŭn, Knŭk kna ala čar Việt Nam yang ƀuôn ngă phŭn, Dhar bruă Mặt trận čar kwar Việt Nam gưl dlông hưn mthâo: Khamtay Siphandone; kkiêng hruê 08/02/1924; Khua hđăp Anôk kriê dlăng bruă Đảng gưl dlông mnuih ƀuôn sang Cách mạng Lào, Khua lăn čar hđăp, Khua knŭk kna hđăp, Khua hđăp Phŭn bruă lĭng kahan ala čar Cộng hòa Dân chủ Nhân dân Lào mrâo djiê hlăk 10h30 mnĭt, hdĭp jŏk 101 thŭn.

Khamtay Siphandone jing sa hlăm phung khua kiă kriê ba akŏ hlăm hdră mkŏ mkra hdră cách mạng mơ̆ng Lao. Ñu mbĭt hŏng phung khua kiă kriê mkăn mkŏ mjing, gĭt gai leh hdră bruă cách mạng lehanăn mâo mă leh lu boh tŭ dưn, ba Cách mạng Lào truh kơ hruê tŭ dưi, ƀrư̆ ƀrư̆ ba lăn čar Lao truh giăm hŏng mta kñăm hdră êlan yang ƀuôn ngă phŭn. Ñu jing ƀĭng găp sĭt suôr, jĕ giăm hŏng Đảng, Knŭk kna lehanăn mnuih ƀuôn sang Việt Nam, mđing dlăng nanao lehanăn mâo lu klei đru mguôp yuôm bhăn hlăm bruă mkŏ mkra, bi kjăp lehanăn mđĭ kyar klei bi mjĕ prŏng kdrưh, jăk siam, hgŭm bruă kluôm dhuôm Việt Nam-Lào dăl hlăm wưng êgao. Ñu djiê jing sa klei luič liê prŏng hŏng lăn čar Lao lehanăn klei bi mjĕ Việt Nam-Lào.

Čiăng bi êdah klei ênguôt hnĭng kơ Khamtay Siphandone lehanăn kbiă hriê mŏng klei bi mjĕ Việt Nam – Lao, Anôk kriê dlăng bruă Đảng Cộng sản Việt Nam gưl dlông, Anôk bruă kƀĭn ala mơ̆ng Ala čar Việt Nam, Khua lăn čar Việt Nam yang ƀuôn ngă phŭn, Knŭk kna ala čar Việt Nam yang ƀuôn ngă phŭn, Dhar bruă Mặt trận čar kwar Việt Nam gưl dlông bi mklă ngă knăm kơŭ kyăm ala čar kơ Khamtay Siphandone hluê klei bhiăn Ala čar hlăm 2 hruê, mơ̆ng hruê 4 truh 5/4/2025.

Hlăm wưng anei, dŭm anôk bruă hlăm kluôm ala čar lehanăn anôk bi ala Việt Nam ti ala tač êngao kă hla čhiăm gru kơŭ kyăm djŏ si klei kčah mtrŭn, amâo mkŏ mjing hdră hlăp čhưn, hơ̆k mơak ti anôk mâo lu mnuih./.